Sukta 8

8.1

Rajyabhishekah, 1-7 atharvangirah, chandramah, apah, rajyabhishekah; 1 raja, 2 devah, 3 vishvarupah, 4-5 apah, anushtup; 1, 7 bhurik trishtup, 3 trishtup, 5 virat prastarapanktih

भू॒तो भू॒तेषु॒ पय॒ आ द॑धाति॒ स भू॒ताना॒मधि॑पतिर्बभूव ।
तस्य॑ मृ॒त्युश्च॑रति राज॒सूयं॒ स राजा॑ रा॒ज्यमनु॑ मन्यतामि॒दम् ॥१॥

Bhuto bhuteshu paya a dadhati sa bhutanamadhipatirbabhuva
Tasya mrityushcharati rajasuyam sa raja rajyamanu manyatamidam

8.2

अ॒भि प्रेहि॒ माप॑ वेन उ॒ग्रश्चे॒त्ता स॑पत्न॒हा।
आ ति॑ष्ठ मित्रवर्धन॒ तुभ्यं॑ दे॒वा अधि॑ ब्रुवन् ॥२॥

Abhi prehi mapa vena ugrashchetta sapatnaha
A tishtha mitravardhana tubhyam deva adhi bruvan

8.3

आ॒तिष्ठ॑न्तं॒ परि॒ विश्वे॑ अभूषं॒छ्रियं॒ वसा॑नश्चरति॒ स्वरो॑चिः ।
म॒हत् तद् वृष्णो॒ असु॑रस्य॒ नामा वि॒श्वरू॑पो अ॒मृता॑नि तस्थौ ॥३॥

Atishthantam pari vishve abhushanchhriyam vasanashcharati svarochih
Mahat tad vrishno asurasya nama vishvarupo amritani tasthau

8.4

व्या॒घ्रो अधि॒ वैया॑घ्रे॒ वि क्र॑मस्व॒ दिशो॑ म॒हीः ।
विश॑स्त्वा॒ सर्वा॑ वाञ्छ॒न्त्वापो॑ दिव्याः पय॑स्वतीः ॥४॥

Vyaghro adhi vaiyaghre vi kramasva disho mahih
Vishastva sarva vanchhantvapo divyah payasvatih

8.5

या आपो॑ दि॒व्याः पय॑सा॒ मद॑न्त्य॒न्तरि॑क्ष उ॒त वा॑ पृथि॒व्याम्।
तासां॑ त्वा॒ सर्वा॑साम॒पाम॒भि॑ षि॑ञ्चामि॒ वर्च॑सा ॥५॥

Ya apo divyah payasa madantyantariksha uta va prithivyam
Tasam tva sarvasamapamabhi shinchami varchasa

8.6

अ॒भि त्वा॒ वर्च॑सासिच॒न्नापो॑ दि॒व्याः पय॑स्वतीः ।
यथासो॑ मित्र॒वर्ध॑न॒स्तथा॑ त्वा सवि॒ता क॑रत् ॥६॥

Abhi tva varchasasichannapo divyah payasvatih
Yathaso mitravardhanastatha tva savita karat

8.7

ए॒ना व्या॒घ्रं प॑रिषस्वजा॒नाः सिं॒हं हि॑न्वन्ति मह॒ते सौभ॑गाय ।
स॒मु॒द्रं न सु॒भुव॑स्तस्थि॒वांसं॑ मर्मृ॒ज्यन्ते॑ द्वी॒पिन॑म॒प्स्व॑१न्तः ॥७॥

Ena vyaghram parishasvajanah sinham hinvanti mahate saubhagaya
Samudram na subhuvastasthivansam marmrijyante dvipinamapsva1ntah