Sukta 7

7.1

Vishanashanam 1-7 garutman, vanaspatih, anushtup, 4 svarit

वारि॒दं वा॑रयातै वर॒णाव॑त्या॒मधि॑ ।
तत्रा॒मृत॒स्यासि॑क्त॒ तेना॑ ते वारये वि॒षम् ॥१॥

Varidam varayatai varanavatyamadhi
Tatramritasyasikta tena te varaye visham

7.2

अ॒र॒सं प्रा॒च्यंऽवि॒षम॑र॒सं यदु॑दी॒च्यऽम्।
अथे॒दम॑धरा॒च्यं॑ कर॒म्भेण॒ वि क॑ल्पते ॥२॥

Arasam prachyanvishamarasam yadudichyam
Athedamadharachyam karambhena vi kalpate

7.3

क॒र॒म्भं कृ॒त्वा ति॒र्यंऽपीबस्पा॒कमु॑दार॒थिम्।
क्षु॒धा किल॑ त्वा दुष्टनो जक्षि॒वान्त्स न रू॑रुपः ॥३॥

Karambham kritva tiryanpibaspakamudarathim
Kshudha kila tva dushtano jakshivantsa na rurupah

7.4

वि ते॒ मदं॑ मदावति श॒रमि॑व पातयामसि ।
प्र त्वा॑ च॒रुमि॑व॒ येष॑न्तं॒ वच॑सा स्थापयामसि ॥४॥

Vi te madam madavati sharamiva patayamasi
Pra tva charumiva yeshantam vachasa sthapayamasi

7.5

परि॒ ग्राम॑मि॒वाचि॑तं॒ वच॑सा स्थापयामसि ।
तिष्ठा॑ वृ॒क्ष इ॑व॒ स्थाम्न्यभ्रि॑खाते॒ न रू॑रुपः ॥५॥

Pari gramamivachitam vachasa sthapayamasi
Tishtha vriksha iva sthamnyabhrikhate na rurupah

7.6

प॒वस्तै॑स्त्वा॒ पर्य॑क्रीणन् दू॒र्शेभि॑र॒जिनै॑रु॒त।
प्र॒क्रीर॑सि॒ त्वमो॑ष॒धेऽभ्रि॑खाते॒ न रू॑रुपः ॥६॥

Pavastaistva paryakrinan durshebhirajinairuta
Prakrirasi tvamoshadhebhrikhate na rurupah

7.7

अना॑प्ता॒ ये वः॑ प्रथ॒मा यानि॒ कर्मा॑णि चक्रि॒रे॑।
वी॒रान्नो॒ अत्र॒ मा द॑भ॒न् तद् व॑ ए॒तत्पु॒रो द॑धे ॥७॥

Anapta ye vah prathama yani karmani chakrire
Viranno atra ma dabhan tad va etatpuro dadhe