Sukta 39

39.1

Sannati 1-10 angirah, 9-10 brahma cha, 1-2 prithivyagni, 2-4 vayvantarikshe, 5-6 divadityau, 7-8 dik-chandramasah, 9-10 jatavedasognih, sannatih, panktih, 1, 2, 5, 7 tripada mahabrihati, 2, 4, 6, 8 sanstarapanktih, 9-10 trishtup

पृ॒थि॒व्याम॒ग्नये॒ सम॑नम॒न्त्स आ॑र्ध्नोत्।
यथा॑ पृथि॒व्याम॒ग्नये॑ स॒मन॑मन्ने॒वा मह्यं॑ सं॒नमः॒ सं न॑मन्तु ॥१॥

Prithivyamagnaye samanamantsa ardhnot
Yatha prithivyamagnaye samanamanneva mahyam sannamah sam namantu

39.2

पृ॒थि॒वी धे॒नुस्तस्या॑ अ॒ग्निर्व॒त्सः ।
सा मे॒ऽग्निना॑ व॒त्सेनेष॒मूर्जं॒ कामं॑ दुहाम्।
आयुः॑ प्रथ॒मं प्र॒जां पोषं॑ र॒यिं स्वाहा॑ ॥२॥

Prithivi dhenustasya agnirvatsah
Sa megnina vatseneshamurjam kamam duham
Ayuh prathamam prajam posham rayim svaha

39.3

अ॒न्तरि॑क्षे वा॒यवे॒ सम॑नम॒न्त्स आ॑र्ध्नोत्।
यथा॒न्तरि॑क्षे वा॒यवे॑ स॒मन॑मन्ने॒वा मह्यं॑ सं॒नमः॒ सं न॑मन्तु ॥३॥

Antarikshe vayave samanamantsa ardhnot
Yathantarikshe vayave samanamanneva mahyam sannamah sam namantu

39.4

अ॒न्तरि॑क्षं धे॒नुस्तस्या॑ वा॒युर्व॒त्सः ।
सा मे॑ वा॒युना॑ व॒त्सेनेष॒मूर्जं॒ कामं॑ दुहाम्।
आयुः॑ प्रथ॒मं प्र॒जां पोषं॑ र॒यिं स्वाहा॑ ॥४॥

Antariksham dhenustasya vayurvatsah
Sa me vayuna vatseneshamurjam kamam duham
Ayuh prathamam prajam posham rayim svaha

39.5

दि॒व्याऽदि॒त्याय॒ सम॑नम॒न्त्स आ॑र्ध्नोत्।
यथा॑ दि॒व्याऽदि॒त्याय॑ स॒मन॑मन्ने॒वा मह्यं॑ सं॒नमः॒ सं न॑मन्तु ॥५॥

Divyadityaya samanamantsa ardhnot
Yatha divyadityaya samanamanneva mahyam sannamah sam namantu

39.6

द्यैर्धे॒नुस्तस्या॑ आदि॒त्यो व॒त्सः ।
सा म॑ आदि॒त्येन॑ व॒त्सेने॑ष॒मूर्जं॒ कामं॑ दुहाम्।
आयुः॑ प्रथ॒मं प्र॒जां पोषं॑ र॒यिं स्वाहा॑ ॥६॥

Dyairdhenustasya adityo vatsah
Sa ma adityena vatseneshamurjam kamam duham
Ayuh prathamam prajam posham rayim svaha

39.7

दि॒क्षु च॒न्द्राय॒ सम॑नम॒न्त्स आ॑र्ध्नोत्।
यथा॑ दि॒क्षु च॒न्द्राय॑ स॒मन॑मन्ने॒वा मह्यं॑ सं॒नमः॒ सं न॑मन्तु ॥७॥

Dikshu chandraya samanamantsa ardhnot
Yatha dikshu chandraya samanamanneva mahyam sannamah sam namantu

39.8

दिशो॑ धे॒नव॒स्तासां॑ च॒न्द्रो व॒त्सः ।
ता मे॑ च॒न्द्रेण॑ व॒त्सेनेष॒मूर्जं॒ कामं॑ दुहाम् ।
आयुः॑ प्रथ॒मं प्र॒जां पोषं॑ र॒यिं स्वाहा॑ ॥८॥

Disho dhenavastasam chandro vatsah
Ta me chandrena vatseneshamurjam kamam duham
Ayuh prathamam prajam posham rayim svaha

39.9

अ॒ग्नाव॒ग्निश्च॑रति॒ प्रवि॑ष्ट॒ ऋषी॑णां पु॒त्रो अ॑भिशस्ति॒पा उ॑ ।
न॒म॒स्का॒रेण॒ नम॑सा ते जुहोमि॒ मा दे॒वानां॑ मिथु॒या क॑र्म भा॒गम् ॥९॥

Agnavagnishcharati pravishta rishinam putro abhishastipa u
Namaskarena namasa te juhomi ma devanam mithuya karma bhagam

39.10

हृ॒दा पू॒तं मन॑सा जातवेदो॒ विश्वा॑नि देव व॒युना॑नि वि॒द्वान्।
स॒प्तास्या॑नि॒ तव॑ जातवेद॒स्तेभ्यो॑ जुहोमि॒ स जु॑षस्व ह॒व्यम् ॥१०॥

Hrida putam manasa jatavedo vishvani deva vayunani vidvan
Saptasyani tava jatavedastebhyo juhomi sa jushasva havyam