Sukta 14

14.1

Svarjyotih praptih, 1-9 bhriguh, ajyam, agnih, trishtup, 2, 4 anushtup, 3 prastarapanktih, 7, 9 jagati, 8 panchapadatishakvari

अ॒जो ह्य॑१ग्नेरज॑निष्ट॒ शोका॒त् सो अ॑पश्यज्जनि॒तार॒मग्रे॑ ।
तेन॑ दे॒वा दे॒वता॒मग्रा॑ आय॒न् तेन॒ रोहा॑न् रुरुहु॒र्मेध्या॑सः ॥१॥

Ajo hya1gnerajanishta shokat so apashyajjanitaramagre
Tena deva devatamagra ayan tena rohan ruruhurmedhyasah

14.2

क्रम॑ध्वम॒ग्निना॒ नाक॒मुख्या॒न् हस्ते॑षु॒ बिभ्र॑तः ।
दि॒वस्पृ॒ष्ठं स्वऽर्ग॒त्वा मि॒श्रा दे॒वेभि॑राध्वम् ॥२॥

Kramadhvamagnina nakamukhyan hasteshu bibhratah
Divasprishtham svargatva mishra devebhiradhvam

14.3

पृ॒ष्ठात् पृ॑थि॒व्या अ॒हम॒न्तरि॑क्ष॒मारु॑हम॒न्तरि॑क्षा॒द् दिव॒मारु॑हम्।
दि॒वो नाक॑स्य पृ॒ष्ठात् स्व॑१र्ज्योति॑रगाम॒हम् ॥३॥

Prishthat prithivya ahamantarikshamaruhamantarikshad divamaruham
Divo nakasya prishthat sva1rjyotiragamaham

14.4

स्व॑१र्यन्तो॒ नापे॑क्षन्त॒ आ द्यां रो॑हन्ति॒ रोद॑सी ।
य॒ज्ञं ये वि॒श्वतो॑धारं॒ सुवि॑द्वांसो वितेनि॒रे ॥४॥

Sva1ryanto napekshanta a dyam rohanti rodasi
Yagyam ye vishvatodharam suvidvanso vitenire

14.5

अग्ने॒ प्रेहि॑ प्रथ॒मो दे॒वता॑नां॒ चक्षु॑र्दे॒वाना॑मु॒त मानु॑षानाम्।
इय॑क्षमाणा॒ भृगु॑भिः स॒जोषाः॒ स्वऽर्यन्तु॒ यज॑मानाः स्व॒स्ति ॥५॥

Agne prehi prathamo devatanam chakshurdevanamuta manushanam
Iyakshamana bhrigubhih sajoshah svaryantu yajamanah svasti

14.6

अ॒जम॑नज्मि॒ पय॑सा घृ॒तेन॑ दि॒व्यं सु॑प॒र्नं प॑य॒सं बृ॒हन्त॑म्।
तेन॑ गेष्म सुकृ॒तस्य॑ लो॒कं स्वऽरा॒रोह॑न्तो अ॒भि नाक॑मुत्त॒मम् ॥६॥

Ajamanajmi payasa ghritena divyam suparnam payasam brihantam
Tena geshma sukritasya lokam svararohanto abhi nakamuttamam

14.7

पञ्चौ॑दनं प॒ञ्चभि॑र॒ङ्गुलि॑भि॒र्द॑र्व्योद्ध॑र पञ्च॒धैतमो॑द॒नम्।
प्राच्यां॑ दि॒शि शिरो॑ अ॒जस्य॑ धेहि॒ दक्षि॑णायां दि॒शि दक्षि॑णं धेहि पा॒र्श्वम् ॥७॥

Panchaudanam panchabhirangulibhirdarvyoddhara panchadhaitamodanam
Prachyam dishi shiro ajasya dhehi dakshinayam dishi dakshinam dhehi parshvam

14.8

प्र॒तीच्यां॑ दि॒शि भ॒सद॒मस्य धेह्युत्त॑रस्यां दि॒श्युत्त॑रं धेहि पा॒र्श्वम्।
ऊ॒र्ध्वायां॑ दि॒श्य॑१जस्यानू॑कं धेहि दि॒शि ध्रु॒वायां॑ धेहि पाज॒स्यऽम॒न्तरि॑क्षे मध्य॒तो मध्य॑मस्य ॥८॥

Pratichyam dishi bhasadamasya dhehyuttarasyam dishyuttaram dhehi parshvam
Urdhvayam dishya1jasyanukam dhehi dishi dhruvayam dhehi pajasyamantarikshe madhyato madhyamasya

14.9

शृ॒तम॒जं शृ॒तया॒ प्रोर्णु॑हि त्व॒चा सर्वै॒रङ्गैः॒ संभृ॑तं वि॒श्वरू॑पम्।
स उत् ति॑ष्ठे॒तो अ॒भि नाक॑मुत्त॒मं प॒द्भिश्च॒तुर्भिः॒ प्रति॑ तिष्ठ दि॒क्षु ॥९॥

Shritamajam shritaya prornuhi tvacha sarvairangaih sambhritam vishvarupam
Sa ut tishtheto abhi nakamuttamam padbhishchaturbhih prati tishtha dikshu