Sukta 13

13.1

Roganivaranam 1-7 shantatih, chandramah, vishve devah, 1 devah, 2-3 vatah, 4 marutah, 6-7 hastah, anushtup

उ॒त दे॑वा॒ अव॑हितं॒ देवा॒ उन्न॑यथा॒ पुनः॑ ।
उ॒ताग॑श्च॒क्रुषं॑ देवा॒ देवा॑ जी॒वय॑था॒ पुनः॑ ॥१॥

Uta deva avahitam deva unnayatha punah
Utagashchakrusham deva deva jivayatha punah

13.2

द्वावि॒मौ वातौ॒ वात॒ आ सिन्धो॒रा प॑रावतः॑ ।
दक्षं॑ ते अ॒न्य आ॒वातु॒ व्य॑१न्यो वा॑तु॒ यद् रपः॑ ॥२॥

Dvavimau vatau vata a sindhora paravatah
Daksham te anya avatu vya1nyo vatu yad rapah

13.3

आ वा॑त वाहि भेष॒जं वि वा॑त वाहि॒ यद्रपः॑ ।
त्वं हि वि॑श्वभेषज दे॒वानां॑ दू॒त ईय॑से ॥३॥

A vata vahi bheshajam vi vata vahi yadrapah
Tvam hi vishvabheshaja devanam duta iyase

13.4

त्राय॑न्तामि॒मं दे॒वास्त्राय॑न्तां म॒रुतां॑ ग॒णाः ।
त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त् ॥४॥

Trayantamimam devastrayantam marutam ganah
Trayantam vishva bhutani yathayamarapa asat

13.5

आ त्वा॑गमं॒ शंता॑तिभि॒रथो॑ अरि॒ष्टता॑तिभिः ।
दक्षं॑ त उ॒ग्रमाभा॑रिषं॒ परा॒ यक्ष्मं॑ सुवामि ते ॥५॥

A tvagamam shantatibhiratho arishtatatibhih
Daksham ta ugramabharisham para yakshmam suvami te

13.6

अ॒यं मे॒ हस्तो॒ भग॑वान॒यं मे॒ भग॑वत्तरः ।
अ॒यं मे॑ वि॒श्वभे॑षजो॒ऽयं शि॒वाभि॑मर्शनः ॥६॥

Ayam me hasto bhagavanayam me bhagavattarah
Ayam me vishvabheshajoyam shivabhimarshanah

13.7

हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी।
अ॒ना॒म॒यि॒त्नुभ्यां॒ हस्ता॑भ्यां॒ ताभ्यां॑ त्वा॒भि मृ॑शामसि ॥७॥

Hastabhyam dashashakhabhyam jihva vachah purogavi
Anamayitnubhyam hastabhyam tabhyam tvabhi mrishamasi