Sukta 9

9.1

Duhkhanashanam, 1-6 vamadevah, dyavaprithivi, devah, anushtup, 4 chatushpada nichridbrihati, 6bhurik

क॒र्शफ॑स्य विश॒फस्य॒ द्यौः पि॒ता पृ॑थि॒वी मा॒ता।
यथा॑भिच॒क्र दे॑वा॒स्तथाप॑ कृणुता॒ पुनः॑ ॥१॥

Karshaphasya vishaphasya dyauh pita prithivi mata
Yathabhichakra devastathapa krinuta punah

अ॒श्रे॒ष्माणो॑ अधारय॒न् तथा॒ तन्मनु॑ना कृ॒तम्।
कृणोमि॒ वध्रि॒ विष्क॑न्धं मुष्काब॒र्हो गवा॑मिव ॥२॥

Ashreshmano adharayan tatha tanmanuna kritam
Krinomi vadhri vishkandham mushkabarho gavamiva

पि॒शङ्गे॒ सूत्रे॒ खृग॑लं॒ तदा ब॑ध्नन्ति वे॒धसः॑ ।
श्र॒व॒स्युं शुष्मं॑ काब॒वं वध्रिं॑ कृण्वन्तु ब॒न्धुरः॑ ॥३॥

Pishange sutre khrigalam tada badhnanti vedhasah
Shravasyum shushmam kabavam vadhrim krinvantu bandhurah

येना॑ श्रवस्यव॒श्चर॑थ दे॒वा इ॑वासुरमा॒यया॑ ।
शुनां॑ क॒पिरि॑व॒ दूष॑णो॒ बन्धु॑रा काब॒वस्य॑ च ॥४॥

Yena shravasyavashcharatha deva ivasuramayaya
Shunam kapiriva dushano bandhura kabavasya cha

दुष्ट्यै॒ हि त्वा॑ भ॒त्स्यामि॑ दूषयि॒ष्यामि॑ काब॒वम्।
उदा॒शवो॒ रथा॑ इव श॒पथे॑भिः सरिष्यथ ॥५॥

Dushtyai hi tva bhatsyami dushayishyami kabavam
Udashavo ratha iva shapathebhih sarishyatha

एक॑शतं॒ विष्क॑न्धानि॒ विष्ठि॑ता पृथि॒वीमनु॑ ।
तेषां॒ त्वामग्रे॒ उज्ज॑हरुर्म॒णिं वि॑ष्कन्ध॒दूष॑णम् ॥६॥

Ekashatam vishkandhani vishthita prithivimanu
Tesham tvamagre ujjaharurmanim vishkandhadushanam