Sukta 10

10.1

Rayasposhapraptih, 1-13 atharva, ashtaka, dhenuh, 2-4 ratrih, dhenuh, 5 ekashtaka, 6 jatavedah, pashavah, 7 ratrih, yagya 8 sanvatsarah, 9 ritavah, 10 dhata vidhatarau, ritavah, 11 devah, 12 indrah, devah, 13 prajapatih, anushtup, 4-6, 12 trishtup 7 tryavasana shatpada virad garbhatijagati

प्र॒थ॒मा ह॒ व्युऽवास॒ सा धे॒नुर॑भवद् य॒मे।
सा नः॒ पय॑स्वती दुहा॒मुत्त॑रामुत्तरां॒ समा॑म् ॥१॥

Prathama ha vyuvasa sa dhenurabhavad yame
Sa nah payasvati duhamuttaramuttaram samam

10.2

यां दे॒वाः प्र॑ति॒नन्द॑न्ति॒ रात्रिं॑ धे॒नुमु॑पाय॒तीम्।
सं॒व॒त्स॒रस्य॒ या पत्नी॒ सा नो॑ अस्तु सुमङ्ग॒ली ॥२॥

Yam devah pratinandanti ratrim dhenumupayatim
Sanvatsarasya ya patni sa no astu sumangali

10.3

सं॒व॒त्स॒रस्य॑ प्रति॒मां यां त्वा॑ रात्र्यु॒पास्म॑हे ।
सा न॒ आयु॑ष्मतीं प्र॒जां रा॒यस्पोषे॑ण॒ सं सृ॑ज ॥३॥

Sanvatsarasya pratimam yam tva ratryupasmahe
Sa na ayushmatim prajam rayasposhena sam srija

10.4

इ॒यमे॒व सा या प्र॑थ॒मा व्यौच्छ॑दा॒स्वित॑रासु चरति॒ प्रवि॑ष्टा ।
म॒हान्तो॑ अस्यां महि॒मानो॑ अ॒न्तर्व॒धूर्जि॑गाय नव॒गज्जनि॑त्री ॥४॥

Iyameva sa ya prathama vyauchchhadasvitarasu charati pravishta
Mahanto asyam mahimano antarvadhurjigaya navagajjanitri

10.5

वा॒न॒स्प॒त्या ग्रावा॑णो॒ घोष॑मक्रत ह॒विष्कृ॒ण्वन्तः॑ परिवत्स॒रीण॑म्।
एका॑ष्टके सुप्र॒जसः॑ सु॒वीरा॑ व॒यं स्या॑म॒ पत॑यो रयी॒णाम् ॥५॥

Vanaspatya gravano ghoshamakrata havishkrinvantah parivatsarinam
Ekashtake suprajasah suvira vayam syama patayo rayinam

10.6

इडा॑यास्प॒दं घृ॒तव॑त् सरीसृ॒पं जात॑वेदः॒ प्रति॑ ह॒व्या गृ॑भाय ।
ये ग्रा॒म्याः प॒शवो॑ वि॒श्वरू॑पा॒स्तेषां सप्ता॒नां मयि॒ रन्ति॑रस्तु ॥६॥

Idayaspadam ghritavat sarisripam jatavedah prati havya gribhaya
Ye gramyah pashavo vishvarupastesham saptanam mayi rantirastu

10.7

आ मा॑ पु॒ष्टे च॒ पोषे॑ च॒ रात्रि॑ दे॒वानां॑ सुम॒तौ स्या॑म ।
पू॒र्णा द॑र्वे॒ परा॑ पत॒ सुपू॑र्णा॒ पुन॒रा प॑त ।
सर्वान् य॒ज्ञान्त्सं॑भुञ्ज॒तीषमूर्जं॑ न॒ आ भ॑र ॥७॥

A ma pushte cha poshe cha ratri devanam sumatau syama
Purna darve para pata supurna punara pata
Sarvan yagyantsambhunjatishamurjam na a bhara

10.8

आयम॑गन्त्संवत्स॒रः पति॑रेकाष्टके॒ तव॑ ।
सा न॒ आयु॑ष्मतीं प्र॒जां रा॒यस्पोषे॑ण॒ सं सृ॑ज ॥८॥

Ayamagantsanvatsarah patirekashtake tava
Sa na ayushmatim prajam rayasposhena sam srija

10.9

ऋ॒तून् य॑ज ऋतु॒पती॑नार्त॒वानु॒त हा॑य॒नान्।
समाः॑ संवत्स॒रान् मासा॑न् भू॒तस्य॒ पत॑ये यजे ॥९॥

Ritun yaja ritupatinartavanuta hayanan
Samah sanvatsaran masan bhutasya pataye yaje

10.10

ऋ॒तुभ्य॑ष्ट्वार्त॒वेभ्यो॑ मा॒द्भ्यः सं॑वत्स॒रेभ्यः॑ ।
धा॒त्रे वि॑धा॒त्रे स॒मृधे॑ भू॒तस्य॒ पत॑ये यजे ॥१०॥

Ritubhyashtvartavebhyo madbhyah sanvatsarebhyah
Dhatre vidhatre samridhe bhutasya pataye yaje

10.11

इड॑या॒ जुह्व॑तो व॒यं दे॒वान् घृ॒तव॑ता यजे ।
गृ॒हानलु॑भ्यतो व॒यं सं वि॑शे॒मोप॒ गोम॑तः ॥११॥

Idaya juhvato vayam devan ghritavata yaje
Grihanalubhyato vayam sam vishemopa gomatah

10.12

ए॒का॒ष्ट॒का तप॑सा त॒प्यमा॑ना ज॒जान॒ गर्भं॑ महि॒मान॒मिन्द्र॑म्।
तेन॑ दे॒वा व्यऽसहन्त॒ शत्रू॑न् ह॒न्ता दस्यू॑नामभव॒च्छची॒पतिः॑ ॥१२॥

Ekashtaka tapasa tapyamana jajana garbham mahimanamindram
Tena deva vyasahanta shatrun hanta dasyunamabhavachchhachipatih

10.13

इन्द्र॑पुत्रे॒ सोम॑पुत्रे दुहि॒तासि॑ प्र॒जाप॑तेः ।
कामा॑न॒स्माकं॑ पूरय॒ प्रति॑ गृह्णाहि नो ह॒विः ॥१३॥

Indraputre somaputre duhitasi prajapateh
Kamanasmakam puraya prati grihnahi no havih