UtshovSukta 67
67.1
सव॒नोति॒ हि सु॒न्वन् क्षयं॒ परी॑णसः सुन्वा॒नो हि ष्मा॒ यज॒त्यव॒ द्विषो॑ दे॒वाना॒मव॒ द्विषः॑ ।
सु॒न्वा॒न इत् सि॑षासति स॒हस्रा॑ वा॒ज्यवृ॑तः ।
सु॒न्वा॒नायेन्द्रो॑ ददात्या॒भुवं॑ र॒यिं द॑दात्या॒भुव॑म् ॥१॥
Savanoti hi sunvan kshayam parinasah sunvano hi shma yajatyava dvisho devanamava dvishah
Sunvana it sishasati sahasra vajyavritah
Sunvanayendro dadatyabhuvam rayim dadatyabhuvam
67.2
मो षु वो॑ अ॒स्मद॒भि तानि॒ पौंस्या॒ सना॑ भूवन् द्यु॒म्नानि॒ मोत जा॑रिषुर॒स्मत् पु॒रोत जा॑रिषुः ।
यद् व॑श्चि॒त्रं यु॒गेयु॑गे॒ नव्यं॒ घोषा॒दम॑र्त्यम्।
अ॒स्मासु॒ तन्म॑रुतो॒ यच्च॑ दु॒ष्टृरं॑ दिधृ॒ता यच्च॑ दु॒ष्टर॑म् ॥२॥
Mo shu vo asmadabhi tani paunsya sana bhuvan dyumnani mota jarishurasmat purota jarishuh
Yad vashchitram yugeyuge navyam ghoshadamartyam
Asmasu tanmaruto yachcha dushtriram didhrita yachcha dushtaram
67.3
अ॒ग्निं होता॑रं मन्ये॒ दास्व॑न्तं॒ वसुं॑ सू॒नुं सह॑सो जा॒तवे॑दसं॒ विप्रं॒ न जा॒तवे॑दसम्।
य ऊ॒र्ध्वया॑ स्वध्व॒रो दे॒वो दे॒वाच्या॑ कृ॒पा।
घृ॒तस्य॒ विभ्रा॑ष्टि॒मनु॑ वष्टि शो॒चिषा॒जुह्वा॑नस्य स॒र्पिषः॑ ॥३॥
Agnim hotaram manye dasvantam vasum sunum sahaso jatavedasam vipram na jatavedasam
Ya urdhvaya svadhvaro devo devachya kripa
Ghritasya vibhrashtimanu vashti shochishajuhvanasya sarpishah
67.4
य॒ज्ञैः समि॑श्लाः॒ पृष॑तीभिरृ॒ष्टिभि॒र्यामं॑ छु॒भ्रासो॑ अ॒ञ्जिषु॑ प्रि॒या उ॒त।
आ॒सद्या॑ ब॒र्हिर्भ॑रतस्य सूनवः पो॒त्रादा सोमं॑ पिबता दिवो नरः ॥४॥
Yagyaih samishlah prishatibhirrishtibhiryamam chhubhraso anjishu priya uta
Asadya barhirbharatasya sunavah potrada somam pibata divo narah
67.5
आ व॑क्षि दे॒वां इ॒ह वि॑प्र॒ यक्षि॑ चो॒शन् हो॑त॒र्नि ष॑दा॒ योनि॑षु त्रि॒षु।
प्रति॑ वीहि॒ प्रस्थि॑तं सो॒म्यं मधु॒ पिबाग्नी॑ध्रा॒त् तव॑ भा॒गस्य॑ तृष्णुहि ॥५॥
A vakshi devam iha vipra yakshi choshan hotarni shada yonishu trishu
Prati vihi prasthitam somyam madhu pibagnidhrat tava bhagasya trishnuhi
67.6
ए॒ष स्य ते॑ त॒न्वो नृम्ण॒वर्ध॑नः॒ सह॒ ओजः॑ प्र॒दिवि॑ बा॒ह्वोर्हि॒तः ।
तुभ्यं॑ सु॒तो म॑घवन् तुभ्य॒माभृ॑त॒स्त्वम॑स्य॒ ब्राह्म॑णा॒दा तृ॒पत् पि॑ब ॥६॥
Esha sya te tanvo nrimnavardhanah saha ojah pradivi bahvorhitah
Tubhyam suto maghavan tubhyamabhritastvamasya brahmanada tripat piba
67.7
यमु॒ पूर्वमहु॑वे॒ तमि॒दं हु॑वे॒ सेदु॒ हव्यो॑ द॒दिर्यो नाम॒ पत्य॑ते ।
अ॒ध्व॒र्युभिः॒ प्रस्थि॑तं सो॒म्यं मधु॑ पो॒त्रात् सोमं॑ द्रविणोदः॒ पिब॑ ऋ॒तुभिः॑ ॥७॥
Yamu purvamahuve tamidam huve sedu havyo dadiryo nama patyate
Adhvaryubhih prasthitam somyam madhu potrat somam dravinodah piba ritubhih