UtshovSukta 57
57.1
सु॒रू॒प॒कृ॒त्नुमू॒तये॑ सु॒दुघा॑मिव गो॒दुहे॑ ।जु॒हूमसि॒ द्यवि॑द्यवि ॥१॥
Surupakritnumutaye sudughamiva goduhe, juhumasi dyavidyavi
57.2
उप॑ नः॒ सव॒ना ग॑हि॒ सोम॑स्य सोमपाः पिब । गो॒दा इद् रे॒वतो॒ मदः॑ ॥२॥
Upa nah savana gahi somasya somapah piba, goda id revato madah
57.3
अथा॑ ते॒ अन्त॑मानां वि॒द्याम॑ सुमती॒नाम्। मा नो॒ अति॑ ख्य॒ आ ग॑हि ॥३॥
Atha te antamanam vidyama sumatinam, ma no ati khya a gahi
57.4
शु॒ष्मिन्त॑मं न ऊ॒तये॑ द्यु॒म्निनं॑ पाहि॒ जागृ॑विम्। इन्द्र॒ सोमं॑ शतक्रतो ॥४॥
Shushmintamam na utaye dyumninam pahi jagrivim, indra somam shatakrato
57.5
इ॒न्द्रि॒याणि॑ शतक्रतो॒ या ते॒ जने॑षु प॒ञ्चसु॑ । इन्द्र॒ तानि॑ त॒ आ वृ॑णे ॥५॥
Indriyani shatakrato ya te janeshu panchasu, indra tani ta a vrine
57.6
अग॑न्निन्द्र॒ श्रवो॑ बृ॒हद् द्यु॒म्नं द॑धिष्व दु॒ष्टर॑म्। उत् ते॒ शुष्मं॑ तिरामसि ॥६॥
Agannindra shravo brihad dyumnam dadhishva dushtaram, ut te shushmam tiramasi
57.7
अ॒र्वा॒वतो॑ न॒ आ ग॒ह्यथो॑ शक्र परा॒वतः॑ । उ॒ लो॒को यस्ते॑ अद्रिव॒ इन्द्रे॒ह तत॒ आ ग॑हि ॥७॥
Arvavato na a gahyatho shakra paravatah, u loko yaste adriva indreha tata a gahi
57.8
इन्द्रो॑ अ॒ङ्ग म॒हद् भ॒यम॒भी षदप॑ चुच्यवत्। स हि स्थि॒रो विच॑र्षणिः ॥८॥
Indro anga mahad bhayamabhi shadapa chuchyavat, sa hi sthiro vicharshanih
57.9
इन्द्र॑श्च मृ॒लया॑ति नो॒ न नः॑ प॒श्चाद॒घं न॑शत्। भ॒द्रं भ॑वाति नः पु॒रः ॥९॥
Indrashcha mrilayati no na nah pashchadagham nashat, bhadram bhavati nah purah
57.10
इन्द्र॒ आशा॑भ्य॒स्परि॒ सर्वा॑भ्यो॒ अभ॑यं करत्। जेता॒ शत्रू॒न् विच॑र्षणिः ॥१०॥
Indra ashabhyaspari sarvabhyo abhayam karat, jeta shatrun vicharshanih
57.11
क ईं॑ वेद सु॒ते सचा॒ पिब॑न्तं॒ कद् वयो॑ दधे ।
अ॒यं यः पुरो॑ विभि॒नत्त्योज॑सा मन्दा॒नः शि॒प्र्यन्ध॑सः ॥११॥
Ka im veda sute sacha pibantam kad vayo dadhe
Ayam yah puro vibhinattyojasa mandanah shipryandhasah
57.12
दा॒ना मृ॒गो न वा॑र॒णः पु॑रु॒त्रा च॒रथं॑ दधे ।
नकि॑ष्ट्वा॒ नि य॑म॒दा सु॒ते ग॑मो म॒हांश्च॑र॒स्योज॑सा ॥१२॥
Dana mrigo na varanah purutra charatham dadhe
Nakishtva ni yamada sute gamo mahanshcharasyojasa
57.13
य उ॒ग्रः सन्ननि॑ष्टृत स्थि॒रो रणा॑य॒ संस्कृ॑तः ।
यदि॑ स्तो॒तुर्म॒घवा॑ शृ॒णव॒द्धवं॒ नेन्द्रो॑ योष॒त्या ग॑मत् ॥१३॥
Ya ugrah sannanishtrita sthiro ranaya sanskritah
Yadi stoturmaghava shrinavaddhavam nendro yoshatya gamat
57.14
व॒यं घ॑ त्वा सु॒ताव॑न्त॒ आपो॒ न वृ॒क्तब॑र्हिषः ।
प॒वित्र॑स्य प्र॒स्रव॑णेषु वृत्रह॒न् परि॑ स्तो॒तार॑ आसते ॥१४॥
Vayam gha tva sutavanta apo na vriktabarhishah
Pavitrasya prasravaneshu vritrahan pari stotara asate
57.15
स्वर॑न्ति त्वा सु॒ते नरो॒ वसो॑ निरे॒क उ॒क्थिनः॑ ।
क॒दा सु॒तं तृ॑षा॒ण ओक॒ आ ग॑म॒ इन्द्र॑ स्व॒ब्दीव॒ वंस॑गः ॥१५॥
Svaranti tva sute naro vaso nireka ukthinah
Kada sutam trishana oka a gama indra svabdiva vansagah
57.16
कण्वे॑भिर्धृष्ण॒वा धृ॒षद् वाजं॑ दर्षि सह॒स्रिण॑म्।
पि॒शङ्ग॑रूपं मघवन् विचर्षणे म॒क्षू गोम॑न्तमीमहे ॥१६॥
Kanvebhirdhrishnava dhrishad vajam darshi sahasrinam
Pishangarupam maghavan vicharshane makshu gomantamimahe