Sukta 25

25.1

(1-7) 1-5 gotamah, 7 ashtakah, indrah, jagati, 7 trishtup

अश्वा॑वति प्रथ॒मो गोषु॑ गच्छति सुप्रा॒वीरि॑न्द्र॒ मर्त्य॒स्तवो॒तिभिः॑ ।
तमित् पृ॑णक्षि॒ वसु॑ना॒ भवी॑यसा॒ सिन्धु॒मापो॒ यथा॒भितो॒ विचे॑तसः ॥१॥

Ashvavati prathamo goshu gachchhati supravirindra martyastavotibhih
Tamit prinakshi vasuna bhaviyasa sindhumapo yathabhito vichetasah

25.2

आपो॒ न दे॒वीरुप॑ यन्ति हो॒त्रिय॑म॒वः प॑श्यन्ति॒ वित॑तं॒ यथा॒ रजः॑ ।
प्रा॒चैर्दे॒वासः॒ प्र ण॑यन्ति देव॒युं ब्र॑ह्म॒प्रियं॑ जोषयन्ते व॒रा इ॑व ॥२॥

Apo na devirupa yanti hotriyamavah pashyanti vitatam yatha rajah
Prachairdevasah pra nayanti devayum brahmapriyam joshayante vara iva

25.3

अधि॒ द्वयो॑रदधा उ॒क्थ्यं॑१ वचो॑ य॒तस्रु॑चा मिथु॒ना या स॑प॒र्यतः॑ ।
असं॑यत्तो व्र॒ते ते॑ क्षेति॒ पुष्य॑ति भ॒द्रा श॒क्तिर्यज॑मानाय सुन्व॒ते ॥३॥

Adhi dvayoradadha ukthyan1 vacho yatasrucha mithuna ya saparyatah
Asanyatto vrate te ksheti pushyati bhadra shaktiryajamanaya sunvate

25.4

आदङ्गि॑राः प्रथ॒मं द॑धिरे॒ वय॑ इ॒द्धाग्न॑यः॒ शम्या॒ ये सु॑कृ॒त्यया॑ ।
सर्वं॑ प॒णेः सम॑विन्दन्त॒ भोज॑न॒मश्वा॑वन्तं॒ गोम॑न्त॒मा प॒शुं नरः॑ ॥४॥

Adangirah prathamam dadhire vaya iddhagnayah shamya ye sukrityaya
Sarvam paneh samavindanta bhojanamashvavantam gomantama pashum narah

25.5

य॒ज्ञैरथ॑र्वा प्रथ॒मः प॒थस्त॑ते॒ ततः॒ सूर्यो॑ व्रत॒पा वे॒न आज॑नि ।
आ गा आ॑जदु॒शना॑ का॒व्यः सचा॑ य॒मस्य॑ जा॒तम॒मृतं॑ यजामहे ॥५॥

Yagyairatharva prathamah pathastate tatah suryo vratapa vena ajani
A ga ajadushana kavyah sacha yamasya jatamamritam yajamahe

25.6

ब॒र्हिर्वा॒ यत् स्व॑प॒त्याय॑ वृ॒ज्यते॒ऽर्को वा॒ श्लोक॑मा॒घोष॑ते दि॒वि।
ग्रावा॒ यत्र॒ वद॑ति का॒रुरु॒क्थ्य॑१स्तस्येदिन्द्रो॑ अभिपि॒त्वेषु॑ रण्यति ॥६॥

Barhirva yat svapatyaya vrijyaterko va shlokamaghoshate divi
Grava yatra vadati karurukthya1stasyedindro abhipitveshu ranyati

25.7

प्रोग्रां पी॒तिं वृष्ण॑ इयर्मि स॒त्यां प्र॒यै सु॒तस्य॑ हर्यश्व॒ तुभ्य॑म्।
इन्द्र॒ धेना॑भिरि॒ह मा॑दयस्व धी॒भिर्विश्वा॑भिः॒ शच्या॑ गृणा॒नः ॥७॥

Program pitim vrishna iyarmi satyam prayai sutasya haryashva tubhyam
Indra dhenabhiriha madayasva dhibhirvishvabhih shachya grinanah