Sukta 24

24.1

1-9 vishvamitrah, indrah, gayatri

उप॑ नः सु॒तमा ग॑हि॒ सोम॑मिन्द्र॒ गवा॑शिरम्। हरि॑भ्यां॒ यस्ते॑ अस्म॒युः ॥१॥

Upa nah sutama gahi somamindra gavashiram, haribhyam yaste asmayuh

तमि॑न्द्र॒ मद॒मा ग॑हि बर्हि॒ष्ठां ग्राव॑भिः सु॒तम्। क॒विन्न्वऽस्य तृ॒प्णवः॑ ॥२॥

Tamindra madama gahi barhishtham gravabhih sutam, kavinnvasya tripnavah

इन्द्रमि॒त्था गिरो॒ ममाच्छा॑गुरिषि॒ता इ॒तः । आ॒वृते॒ सोम॑पीतये ॥३॥

Indramittha giro mamachchhagurishita itah, avrite somapitaye

इन्द्रं॒ सोम॑स्य पी॒तये॒ स्तोमै॑रि॒ह ह॑वामहे । उ॒क्थेभिः॑ कु॒विदा॒गम॑त् ॥४॥

Indram somasya pitaye stomairiha havamahe, ukthebhih kuvidagamat

इन्द्र॒ सोमाः॑ सु॒ता इ॒मे तान् द॑धिष्व शतक्रतो । ज॒ठरे॑ वाजिनीवसो ॥५॥

Indra somah suta ime tan dadhishva shatakrato, jathare vajinivaso

वि॒द्मा हि त्वा॑ धनंज॒यं वाजे॑षु दधृ॒षं क॑वे । अधा॑ ते सु॒म्नमी॑महे ॥६॥

Vidma hi tva dhananjayam vajeshu dadhrisham kave, adha te sumnamimahe

इ॒ममि॑न्द्र॒ गवा॑शिरं॒ यवा॑शिरं च नः पिब । आ॒गत्या॒ वृष॑भिः सु॒तम् ॥७॥

Imamindra gavashiram yavashiram cha nah piba, agatya vrishabhih sutam

तुभ्येदि॑न्द्र॒ स्व ओ॒क्ये॒३ सोमं॑ चोदामि पी॒तये॑ । ए॒ष रा॑रन्तु ते हृ॒दि ॥८॥

Tubhyedindra sva okye3 somam chodami pitaye, esha rarantu te hridi

त्वां सु॒तस्य॑ पी॒तये॑ प्र॒त्नमि॑न्द्र हवामहे । कु॒शि॒कासो॑ अव॒स्यवः॑ ॥९॥

Tvam sutasya pitaye pratnamindra havamahe, kushikaso avasyavah