UtshovSukta 143
143.1
तं वां॒ रथं॑ व॒यम॒द्या हु॑वेम पृथु॒ज्रय॑मश्विना॒ संग॑तिं॒ गोः ।
यः सू॒र्यां वह॑ति वन्धुरा॒युर्गिर्वा॑हसं पुरु॒तमं॑ वसू॒युम् ॥१॥
Tam vam ratham vayamadya huvema prithujrayamashvina sangatim goh
Yah suryam vahati vandhurayurgirvahasam purutamam vasuyum
143.2
यु॒वं श्रिय॑मश्विना दे॒वता॒ तां दिवो॑ नपाता वनथः॒ शची॑भिः ।
यु॒वोर्वपु॑र॒भि पृक्षः॑ सचन्ते॒ वह॑न्ति॒ यत्क॑कु॒हासो॒ रथे॑ वाम् ॥२॥
Yuvam shriyamashvina devata tam divo napata vanathah shachibhih
Yuvorvapurabhi prikshah sachante vahanti yatkakuhaso rathe vam
143.3
को वा॑म॒द्या क॑रते रा॒तह॑व्य ऊ॒तये॑ वा सुत॒पेया॑य वा॒र्कैः ।
ऋ॒तस्य॑ वा व॒नुषे॑ पू॒र्व्याय॒ नमो॑ येमा॒नो अ॑श्वि॒ना व॑वर्तत् ॥३॥
Ko vamadya karate ratahavya utaye va sutapeyaya varkaih
Ritasya va vanushe purvyaya namo yemano ashvina vavartat
143.4
हि॒र॒ण्यये॑न पुरुभू॒ रथे॑ने॒मं य॒ज्ञं ना॑स॒त्योप॑ यातम्।
पिबा॑थ॒ इन्मधु॑नः सो॒म्यस्य॒ दध॑थो॒ रत्नं॑ विध॒ते जना॑य ॥४॥
Hiranyayena purubhu rathenemam yagyam nasatyopa yatam
Pibatha inmadhunah somyasya dadhatho ratnam vidhate janaya
143.5
आ नो॑ यातं दि॒वो अच्छा॑ पृथि॒व्या हि॑र॒ण्यये॑न सु॒वृता॒ रथे॑न ।
मा वा॑म॒न्ये नि य॑मन्देव॒यन्तः॒ सं यद्द॒दे नाभिः॑ पू॒र्व्या वा॑म् ॥५॥
A no yatam divo achchha prithivya hiranyayena suvrita rathena
Ma vamanye ni yamandevayantah sam yaddade nabhih purvya vam
143.6
नू नो॑ र॒यिं पु॑रु॒वीरं॑ बृ॒हन्तं॒ दस्रा॒ मिमा॑थामु॒भये॑ष्व॒स्मे।
नरो॒ यद्वा॑मश्विना॒ स्तोम॒माव॑न्त्स॒धस्तु॑तिमाजमी॒ल्हासो॑ अग्मन् ॥६॥
Nu no rayim puruviram brihantam dasra mimathamubhayeshvasme
Naro yadvamashvina stomamavantsadhastutimajamilhaso agman
143.7
इ॒हेह॒ यद्वां॑ सम॒ना प॑पृ॒क्षे सेयम॒स्मे सु॑म॒तिर्वा॑जरत्ना ।
उ॒रु॒ष्यतं॑ जरि॒तारं॑ यु॒वं ह॑ श्रि॒तः कामो॑ नासत्या युव॒द्रिक् ॥७॥
Iheha yadvam samana paprikshe seyamasme sumatirvajaratna
Urushyatam jaritaram yuvam ha shritah kamo nasatya yuvadrik
143.8
मधु॑मती॒रोष॑धी॒र्द्याव॒ आपो॒ मधु॑मन्नो भवत्व॒न्तरि॑क्षम्।
क्षेत्र॑स्य॒ पति॒र्मधु॑मान्नो अ॒स्त्वरि॑ष्यन्तो॒ अन्वे॑नं चरेम ॥८॥
Madhumatiroshadhirdyava apo madhumanno bhavatvantariksham
Kshetrasya patirmadhumanno astvarishyanto anvenam charema
143.9
प॒नाय्यं॒ तद॑श्विना कृ॒तं वां॑ वृष॒भो दि॒वो रज॑सः पृथि॒व्याः ।
स॒हस्रं॒ शंसा॑ उ॒त ये गवि॑ष्टौ॒ सर्वाँ॒ इत्ताँ उप॑ याता॒ पिब॑ध्यै ॥९॥
Panayyam tadashvina kritam vam vrishabho divo rajasah prithivyah
Sahasram shansa uta ye gavishtau sarvam ittam upa yata pibadhyai