Sukta 128

128.1

Khilani

यः स॒भेयो॑ विद॒थ्यः सु॒त्वा य॒ज्वाथ॒ पूरु॑षः ।
सूर्यं॒ चामू॑ रि॒शादस॒स्तद् दे॒वाः प्राग॑कल्पयन् ॥१॥

Yah sabheyo vidathyah sutva yajvatha purushah
Suryam chamu rishadasastad devah pragakalpayan

128.2

यो जा॒म्या अप्र॑थय॒स्तद् यत् सखा॑यं॒ दुधू॑र्षति ।
ज्येष्ठो॒ यद॑प्रचेता॒स्तदा॑हु॒रध॑रा॒गिति॑ ॥२॥

Yo jamya aprathayastad yat sakhayam dudhurshati
Jyeshtho yadaprachetastadahuradharagiti

128.3

यद् भ॒द्रस्य॒ पुरु॑षस्य पु॒त्रो भ॑वति दाधृ॒षिः ।
तद् वि॒प्रो अब्र॑वीदु॒ तद् ग॑न्ध॒र्वः काम्यं॒ वचः॑ ॥३॥

Yad bhadrasya purushasya putro bhavati dadhrishih
Tad vipro abravidu tad gandharvah kamyam vachah

128.4

यश्च॑ प॒णि रघु॑जि॒ष्ठ्यो यश्च॑ दे॒वां अदा॑शुरिः ।
धीरा॑णां॒ शश्व॑ताम॒हं तद॑पा॒गिति॑ शुश्रुम ॥४॥

Yashcha pani raghujishthyo yashcha devam adashurih
Dhiranam shashvatamaham tadapagiti shushruma

128.5

ये च॑ दे॒वा अय॑ज॒न्ताथो॒ ये च॑ पराद॒दिः ।
सूर्यो॒ दिव॑मिव ग॒त्वाय॑ म॒घवा॑ नो॒ वि र॑प्शते ॥५॥

Ye cha deva ayajantatho ye cha paradadih
Suryo divamiva gatvaya maghava no vi rapshate

128.6

योना॒क्ताक्षो॑ अनभ्य॒क्तो अम॑णि॒वो अहि॑र॒ण्यवः॑ ।
अब्र॑ह्मा॒ ब्रह्म॑णः पु॒त्रस्तो॒ता कल्पे॑षु सं॒मिता॑ ॥६॥

Yonaktaksho anabhyakto amanivo ahiranyavah
Abrahma brahmanah putrastota kalpeshu sammita

128.7

य आ॒क्ताक्षः॑ सुभ्य॒क्तः सुम॑णिः॒ सुहि॑र॒ण्यवः॑ ।
सुब्र॑ह्मा॒ ब्रह्म॑णः पु॒त्रस्तो॒ता कल्पे॑षु सं॒मिता॑ ॥७॥

Ya aktakshah subhyaktah sumanih suhiranyavah
Subrahma brahmanah putrastota kalpeshu sammita

128.8

अप्र॑पा॒णा च॑ वेश॒न्ता रे॒वां अप्रति॑दिश्ययः ।
अय॑भ्या क॒न्या कल्या॒णी तो॒ता कल्पे॑षु सं॒मिता॑ ॥८॥

Aprapana cha veshanta revam apratidishyayah
Ayabhya kanya kalyani tota kalpeshu sammita

128.9

सुप्र॑पा॒णा च॑ वेश॒न्ता रे॒वान्त्सुप्रति॑दिश्ययः ।
सुय॑भ्या क॒न्या कल्या॒णी तो॒ता कल्पे॑षु सं॒मिता॑ ॥९॥

Suprapana cha veshanta revantsupratidishyayah
Suyabhya kanya kalyani tota kalpeshu sammita

128.10

परि॑वृ॒क्ता च॒ महि॑षी स्व॒स्त्या च यु॒धिंग॒मः ।
अना॑शुर॑श्चाया॒मी तो॒ता कल्पे॑षु सं॒मिता॑ ॥१०॥

Parivrikta cha mahishi svastya cha yudhingamah
Anashurashchayami tota kalpeshu sammita

128.11

वा॒वा॒ता च॒ महि॑षी स्व॒स्त्या च यु॒धिंग॒मः ।
श्वा॒शुर॑श्चाया॒मी तो॒ता कल्पे॑षु सं॒मिता॑ ॥११॥

Vavata cha mahishi svastya cha yudhingamah
Shvashurashchayami tota kalpeshu sammita

128.12

यदि॑न्द्रा॒दो दा॑शरा॒ज्ञे मानु॑षं॒ वि गा॑हथाः ।
विरू॑पः॒ सर्व॑स्मा आसीत् सह य॒क्षाय॒ कल्प॑ते ॥१२॥

Yadindrado dasharagye manusham vi gahathah
Virupah sarvasma asit saha yakshaya kalpate

128.13

त्वं वृ॑षा॒क्षुं म॑घव॒न्नम्रं॑ म॒र्याकरो॒ रविः॑ ।
त्वं रौ॑हि॒णं व्यास्यो॒ वि वृ॒त्रस्याभि॑न॒च्छिरः॑ ॥१३॥

Tvam vrishakshum maghavannamram maryakaro ravih
Tvam rauhinam vyasyo vi vritrasyabhinachchhirah

128.14

यः पर्व॑ता॒न् व्य॑दधा॒द् यो अ॒पो व्य॑गाहथाः ।
इन्द्रो॒ यो वृ॑त्र॒हान्म॒हं तस्मा॑दिन्द्र॒ नमो॑ऽस्तु ते ॥१४॥

Yah parvatan vyadadhad yo apo vyagahathah
Indro yo vritrahanmaham tasmadindra namostu te

128.15

पृ॒ष्ठं धाव॑न्तं ह॒र्योरौच्चैः॑ श्रव॒सम॑ब्रुवन्।
स्व॒स्त्यश्व॒ जैत्रा॒येन्द्र॒मा व॑ह सु॒स्र॑म् ॥१५॥

Prishtham dhavantam haryorauchchaih shravasamabruvan
Svastyashva jaitrayendrama vaha susram

128.16

ये त्वा॑ श्वे॒ता अजै॑श्रव॒सो हार्यो॑ युञ्जन्ति॒ दक्षि॑णम्।
पूर्वा॒ नम॑स्य दे॒वानां॒ बिभ्र॑दिन्द्र महीयते ॥१६॥

Ye tva shveta ajaishravaso haryo yunjanti dakshinam
Purva namasya devanam bibhradindra mahiyate