Sukta 8

8.1

Kshetriyaroganashanam, 1-5 bhrigvangirah, vanaspatih, yakshma nashanam, anushtup, 3 pathyapanktih, 4 virat, 5 nichritpathyapanktih

उद॑गातां॒ भग॑वती वि॒चृतौ॒ नाम॒ तार॑के ।
वि क्षे॑त्रि॒यस्य॑ मुञ्चतामध॒मं पाश॑मुत्त॒मम् ॥१॥

Udagatam bhagavati vichritau nama tarake
Vi kshetriyasya munchatamadhamam pashamuttamam

8.2

अपे॒यं रात्र्यु॑च्छ॒त्वपो॑च्छन्त्वभि॒कृत्व॑रीः ।
वी॒रुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥२॥

Apeyam ratryuchchhatvapochchhantvabhikritvarih
Virut kshetriyanashanyapa kshetriyamuchchhatu

8.3

ब॒भ्रोरर्जु॑नकाण्डस्य॒ यव॑स्य ते पला॒ल्या तिल॑स्य तिलपि॒ञ्ज्या।
वीरुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥३॥

Babhrorarjunakandasya yavasya te palalya tilasya tilapinjya
Virut kshetriyanashanyapa kshetriyamuchchhatu

8.4

नम॑स्ते॒ लाङ्ग॑लेभ्यो॒ नम॑ ईषायु॒गेभ्यः॑ ।
वी॒रुत् क्षे॑त्रिय॒नाश॒न्यप॑ क्षेत्रि॒यमु॑च्छतु ॥४॥

Namaste langalebhyo nama ishayugebhyah
Virut kshetriyanashanyapa kshetriyamuchchhatu

8.5

नमः॑ सनिस्रसा॒क्षेभ्यो॒ नमः॑ संदे॒श्येऽभ्यः ।
नमः॒ क्षेत्र॑स्य॒ पत॑ये वी॒रुत् क्षे॑त्रिय॒नाश॒न्यप॑ क्षेत्रि॒यमु॑छतु ॥५॥

Namah sanisrasakshebhyo namah sandeshyebhyah
Namah kshetrasya pataye virut kshetriyanashanyapa kshetriyamuchhatu