Sukta 36

36.1

Pativedanam, 1-8 pativedanah, 1agnih, 2 somah, aryama, dhata, 3 agnishomau, 4 indrah, 5 suryah, 6 dhanapatih, 7 bhagah, 8 aushadhih, trishtup, 1bhurik, 2, 5-7 anushtup, 8 nichritpuraushnik

आ नो॑ अग्ने सुम॒तिं सं॑भ॒लो ग॑मेदि॒मां कु॑मा॒रीं स॒ह नो॒ भगे॑न ।
जु॒ष्टा व॒रेषु॒ सम॑नेषु व॒ल्गुरो॒षं पत्या॒ सौभ॑गमस्त्व॒स्यै ॥१॥

A no agne sumatim sambhalo gamedimam kumarim saha no bhagena
Jushta vareshu samaneshu valgurosham patya saubhagamastvasyai

36.2

सोम॑जुष्टं॒ ब्रह्म॑जुष्टमर्य॒म्णा संभृ॑तं॒ भग॑म्।
धा॒तुर्दे॒वस्य॑ स॒त्येन॑ कृ॒णोमि॑ पति॒वेद॑नम् ॥२॥

Somajushtam brahmajushtamaryamna sambhritam bhagam
Dhaturdevasya satyena krinomi pativedanam

36.3

इ॒यम॑ग्ने॒ नारी॒ पतिं॑ विदेष्ट॒ सोमो॒ हि राजा॑ सु॒भगां॑ कृ॒णोति॑ ।
सुवा॑ना पु॒त्रान् महि॑षी भवाति ग॒त्वा पतिं॑ सु॒भगा॒ वि रा॑जतु ॥३॥

Iyamagne nari patim videshta somo hi raja subhagam krinoti
Suvana putran mahishi bhavati gatva patim subhaga vi rajatu

36.4

यथा॑ख॒रो म॑घवं॒श्चारु॑रे॒ष प्रि॒यो मृ॒गाणां॑ सु॒षदा॑ ब॒भूव॑ ।
ए॒वा भग॑स्य जु॒ष्टेयम॑स्तु॒ नारी॒ संप्रि॑या॒ पत्यावि॑राधयन्ती ॥४॥

Yathakharo maghavanshcharuresha priyo mriganam sushada babhuva
Eva bhagasya jushteyamastu nari sampriya patyaviradhayanti

36.5

भग॑स्य॒ नाव॒मा रो॑ह पू॒र्णामनु॑पदस्वतीम्।
तयो॑पप्रता॑रय॒ यो वरः प्र॑तिका॒म्यः ॥५॥

Bhagasya navama roha purnamanupadasvatim
Tayopaprataraya yo varah pratikamyah

36.6

आ क्र॑न्दय धनपते व॒रमाम॑नसं कृणु ।
सर्वं॑ प्रदक्षि॒णं कृ॑णु॒ यो व॒रः प्र॑तिका॒म्यः ॥६॥

A krandaya dhanapate varamamanasam krinu
Sarvam pradakshinam krinu yo varah pratikamyah

36.7

इ॒दं हिर॑ण्यं॒ गुल्गु॑ल्व॒यमौ॒क्षो अथो॒ भगः॑ ।
ए॒ते पति॑भ्य॒स्त्वाम॑दुः प्रतिका॒माय॒ वेत्त॑वे ॥७॥

Idam hiranyam gulgulvayamauksho atho bhagah
Ete patibhyastvamaduh pratikamaya vettave

36.8

आ ते॑ नयतु सवि॒ता न॑यतु॒ पति॒र्यः प्र॑तिका॒म्यः ।
त्वम॑स्यै धेह्योषधे ॥८॥

A te nayatu savita nayatu patiryah pratikamyah
Tvamasyai dhehyoshadhe