Sukta 13

13.1

Dirghayuhpraptih, 1-5 atharva, agnih, 2-3 brihaspatih, 4-5 vishve devah, trishtup, 4 anushtup, 5 virad jagati

आ॒युर्दा अ॑ग्ने ज॒रसं॑ वृणा॒नो घृ॒तप्र॑तीको घृ॒तपृ॑ष्ठो अग्ने ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रान॒भि र॑क्षतादि॒मम् ॥१॥

Ayurda agne jarasam vrinano ghritapratiko ghritaprishtho agne
Ghritam pitva madhu charu gavyam piteva putranabhi rakshatadimam

13.2

परि॑ धत्त ध॒त्त नो॒ वर्च॑से॒मं ज॒रामृ॑त्युं कृणुत दी॒र्घमायुः॑ ।
बृह॒स्पतिः॒ प्राय॑च्छ॒द् वास॑ ए॒तत् सोमा॑य॒ राज्ञे॒ परि॑धात॒वा उ॑ ॥२॥

Pari dhatta dhatta no varchasemam jaramrityum krinuta dirghamayuh
Brihaspatih prayachchhad vasa etat somaya ragye paridhatava u

13.3

परी॒दं वासो॑ अधिथाः स्व॒स्तयेऽभू॑र्गृष्टी॒नाम॑भिशस्ति॒पा उ॑ ।
श॒तं च॒ जीव॑ श॒रदः॑ पुरू॒ची रा॒यश्च॒ पोष॑मुप॒संव्य॑यस्व ॥३॥

Paridam vaso adhithah svastayebhurgrishtinamabhishastipa u
Shatam cha jiva sharadah puruchi rayashcha poshamupasanvyayasva

13.4

एह्यश्मा॑न॒मा ति॒ष्ठाश्मा॑ भवतु ते त॒नूः ।
कृ॒ण्वन्तु॒ विश्वे॑ दे॒वा आयु॑ष्टे श॒रदः॑ श॒तम् ॥४॥

Ehyashmanama tishthashma bhavatu te tanuh
Krinvantu vishve deva ayushte sharadah shatam

13.5

यस्य॑ ते॒ वासः॑ प्रथमवा॒स्यं॑१ हरा॑म॒स्तं त्वा॒ विश्वे॑ऽवन्तु दे॒वाः ।
तं त्वा॒ भ्रात॑रः सु॒वृधा॒ वर्ध॑मान॒मनु॑ जातन्तां ब॒हवः॒ सुजा॑तम् ॥५॥

Yasya te vasah prathamavasyan1 haramastam tva vishvevantu devah
Tam tva bhratarah suvridha vardhamanamanu jatantam bahavah sujatam