Sukta 6

6.1

Jagadbija purushah, 1-16 narayanah, purushah, anushtup

स॒हस्र॑बाहुः॒ पुरु॑षः सहस्रा॒क्षः स॒हस्र॑पात्।
स भूमिं॑ वि॒श्वतो॑ वृ॒त्वात्य॑तिष्ठद् दशाङ्गु॒लम् ॥१॥

Sahasrabahuh purushah sahasrakshah sahasrapat
Sa bhumim vishvato vritvatyatishthad dashangulam

6.2

त्रि॒भिः प॒द्भिर्द्याम॑रोह॒त् पाद॑स्ये॒हाभ॑व॒त् पुनः॑ ।
तथा॒ व्यऽक्राम॒द् विष्व॑ङशनानश॒ने अनु॑ ॥२॥

Tribhih padbhirdyamarohat padasyehabhavat punah
Tatha vyakramad vishvangashananashane anu

6.3

ताव॑न्तो अस्य महि॒मान॒स्ततो॒ ज्यायां॑श्च॒ पूरु॑षः ।
पादो॑ऽस्य॒ विश्वा॑ भू॒तानि॑ त्रि॒पाद॑स्यृ॒तं॑ दि॒वि ॥३॥

Tavanto asya mahimanastato jyayanshcha purushah
Padosya vishva bhutani tripadasyritam divi

6.4

पुरु॑ष ए॒वेदं सर्वं॒ यद् भू॒तं यच्च॑ भा॒व्यम्।
उ॒तामृ॑त॒त्वस्ये॑श्व॒रो यद॒न्येनाभ॑वत् स॒ह ॥४॥

Purusha evedam sarvam yad bhutam yachcha bhavyam
Utamritatvasyeshvaro yadanyenabhavat saha

6.5

यत् पुरु॑षं॒ व्यद॑धुः कति॒धा व्यऽकल्पयन्।
मुखं॒ किम॑स्य॒ किं बा॒हू किमू॒रू पादा॑ उच्येते ॥५॥

Yat purusham vyadadhuh katidha vyakalpayan
Mukham kimasya kim bahu kimuru pada uchyete

6.6

ब्रा॒ह्म॒णोऽस्य॒ मुख॑मासीद् बा॒हू रा॑ज॒न्योऽभवत्।
मध्यं॒ तद॑स्य॒ यद् वैश्यः॑ प॒द्भ्यां शू॒द्रो अ॑जायत ॥६॥

Brahmanosya mukhamasid bahu rajanyobhavat
Madhyam tadasya yad vaishyah padbhyam shudro ajayata

6.7

चन्द्र॑मा म॑नसो जात॑श्च॑क्षोः सू॑र्यो अजायत ।
मुखा॒दिन्द्र॑श्चा॒ग्निश्च॑ प्रा॒णाद् वा॒युर॑जायत ॥७॥

Chandrama manaso jatashchakshoh suryo ajayata
Mukhadindrashchagnishcha pranad vayurajayata

6.8

नाभ्या॑ आसीद॒न्तरि॑क्षं शी॒र्ष्णो द्यौः सम॑वर्तत ।
प॒द्भ्यां भूमि॒र्दिशः॒ श्रोत्रा॒त् तथा॑ लो॒कां अ॑कल्पयन् ॥८॥

Nabhya asidantariksham shirshno dyauh samavartata
Padbhyam bhumirdishah shrotrat tatha lokam akalpayan

6.9

वि॒राडग्रे॒ सम॑भवद् वि॒राजो॒ अधि॒ पूरु॑षः ।
स जा॒तो अत्य॑रिच्यत प॒श्चाद् भूमि॒मथो॑ पु॒रः ॥९॥

Viradagre samabhavad virajo adhi purushah
Sa jato atyarichyata pashchad bhumimatho purah

6.10

यत् पुरु॑षेण ह॒विषा॑ दे॒वा य॒ज्ञमत॑न्वत ।
व॒स॒न्तो अ॑स्यासी॒दाज्यं॑ ग्री॒ष्म इ॒ध्मः श॒रद्ध॒विः ॥१०॥

Yat purushena havisha deva yagyamatanvata
Vasanto asyasidajyam grishma idhmah sharaddhavih

6.11

तं य॒ज्ञं प्रा॒वृषा॒ प्रौक्ष॒न् पुरु॑षं जा॒तम॑ग्र॒शः ।
तेन॑ दे॒वा अ॑यजन्त सा॒ध्या वस॑वश्च॒ ये ॥११॥

Tam yagyam pravrisha praukshan purusham jatamagrashah
Tena deva ayajanta sadhya vasavashcha ye

6.12

तस्मा॒दश्वा॑ अजायन्त॒ ये च॒ के चो॑भ॒याद॑तः ।
गावो॑ ह जज्ञिरे॒ तस्मा॒त् तस्मा॑ज्जा॒ता अ॑जा॒वयः॑ ॥१२॥

Tasmadashva ajayanta ye cha ke chobhayadatah
Gavo ha jagyire tasmat tasmajjata ajavayah

6.13

तस्मा॑द् य॒ज्ञात् स॑र्व॒हुत॒ ऋचः॒ सामा॑नि जज्ञिरे ।
छन्दो॑ ह जज्ञिरे॒ तस्मा॒द् यजु॒स्तस्मा॑दजायत ॥१३॥

Tasmad yagyat sarvahuta richah samani jagyire
Chhando ha jagyire tasmad yajustasmadajayata

6.14

तस्मा॑द् य॒ज्ञात् स॑र्व॒हुतः॒ संभृ॑तं पृषदा॒ज्यऽम्।
प॒शूंस्तांश्च॑क्रे वाय॒व्याऽनार॒ण्या ग्रा॒म्याश्च॒ ये ॥१४॥

Tasmad yagyat sarvahutah sambhritam prishadajyam
Pashunstanshchakre vayavyanaranya gramyashcha ye

6.15

स॒प्तास्या॑सन् परि॒धय॒स्त्रिः स॒प्त स॒मिधः॑ कृ॒ताः ।
दे॒वा यद् य॒ज्ञं त॑न्वा॒ना अब॑ध्न॒न् पुरु॑षं प॒शुम् ॥१५॥

Saptasyasan paridhayastrih sapta samidhah kritah
Deva yad yagyam tanvana abadhnan purusham pashum

6.16

मू॒र्ध्नो दे॒वस्य॑ बृह॒तो अं॒शवः॑ स॒प्त स॑प्त॒तीः ।
राज्ञः॒ सोम॑स्याजायन्त जा॒तस्य॒ पुरु॑षा॒दधि॑ ॥१६॥

Murdhno devasya brihato anshavah sapta saptatih
Ragyah somasyajayanta jatasya purushadadhi