Sukta 58

58.1

Yagyah, 1-6 brahma, yagyah, bahudaivatyam, trishtup, 2 puronushtup, 3 chatushpadatishakvari, 5 bhurik

घृ॒तस्य॑ जू॒तिः सम॑ना॒ सदे॑वा संवत्स॒रं ह॒विषा॑ व॒र्धय॑न्ती ।
श्रोत्रं॒ चक्षुः॑ प्रा॒णोच्छि॑न्नो नो अ॒स्त्वच्छि॑न्ना व॒यमायु॑षो॒ वर्च॑सः ॥१॥

Ghritasya jutih samana sadeva sanvatsaram havisha vardhayanti
Shrotram chakshuh pranochchhinno no astvachchhinna vayamayusho varchasah

58.2

उपा॒स्मान् प्रा॒णो ह्व॑यता॒मुप॑ व॒यं प्रा॒णं ह॑वामहे ।
वर्चो॑ जग्राह पृथि॒व्य॑१न्तरि॑क्षं॒ वर्चः॒ सोमो॒ बृह॒स्पति॑र्विध॒त्ता ॥२॥

Upasman prano hvayatamupa vayam pranam havamahe
Varcho jagraha prithivya1ntariksham varchah somo brihaspatirvidhatta

58.3

वर्च॑सो॒ द्यावा॑पृथि॒वी सं॒ग्रह॑णी बभू॒वथु॒र्वर्चो॑ गृही॒त्वा पृ॑थि॒वीमनु॒ सं च॑रेम ।
य॒शसं॒ गावो॒ गोप॑ति॒मुप॑ तिष्ठन्त्याय॒तीर्यशो॑ गृही॒त्वा पृ॑थि॒वीमनु॒ सं च॑रेम ॥३॥

Varchaso dyavaprithivi sangrahani babhuvathurvarcho grihitva prithivimanu sam charema
Yashasam gavo gopatimupa tishthantyayatiryasho grihitva prithivimanu sam charema

58.4

व्र॒जं कृ॑णुध्वं॒ स हि वो॑ नृ॒पाणो॒ वर्मा॑ सीव्यध्वं बहु॒ला पृ॒थूनि॑ ।
पुरः॑ कृणुध्व॒माय॑सी॒रधृ॑ष्टा॒ मा वः॑ सुस्रोच्चम॒सो दृं॑हता॒ तम् ॥४॥

Vrajam krinudhvam sa hi vo nripano varma sivyadhvam bahula prithuni
Purah krinudhvamayasiradhrishta ma vah susrochchamaso drinhata tam

58.5

य॒ज्ञस्य॒ चक्षुः॒ प्रभृ॑ति॒र्मुखं॑ च वा॒चा श्रोत्रे॑ण॒ मन॑सा जुहोमि ।
इ॒मं य॒ज्ञं वित॑तं वि॒श्वक॑र्म॒णा दे॒वा य॑न्तु सुमन॒स्यमा॑नाः ॥५॥

Yagyasya chakshuh prabhritirmukham cha vacha shrotrena manasa juhomi
Imam yagyam vitatam vishvakarmana deva yantu sumanasyamanah

58.6

ये दे॒वाना॑मृ॒त्विजो॒ ये च॑ य॒ज्ञिया॒ येभ्यो॑ ह॒व्यं क्रि॒यते॑ भाग॒धेय॑म्।
इ॒मं य॒ज्ञं स॒ह पत्नी॑भि॒रेत्य॒ याव॑न्तो दे॒वास्त॑वि॒षा मा॑दयन्ताम् ॥६॥

Ye devanamritvijo ye cha yagyiya yebhyo havyam kriyate bhagadheyam
Imam yagyam saha patnibhiretya yavanto devastavisha madayantam