Sukta 57

57.1

Duhshvapnanashanam, 1-5 yamah, duhshvapnanashanam, 1 anushtup, 2-3 trishtup (tryavasana), 4 shatpada ushnigbrihatigarbha virat shakvari, 5 tryavasana panchapada parashakvaratijagati

यथा॑ क॒लां यथा॑ श॒फं यथ॒र्णं सं॒नय॑न्ति ।
ए॒वा दु॒ष्वप्न्यं॒ सर्व॒मप्रि॑ये॒ सं न॑यामसि ॥१॥

Yatha kalam yatha shapham yatharnam sannayanti
Eva dushvapnyam sarvamapriye sam nayamasi

57.2

सं राजा॑नो अगुः॒ समृ॒णाम्य॑गुः॒ सं कु॒ष्ठा अ॑गुः॒ सं क॒ला अ॑गुः ।
सम॒स्मासु॒ यद् दु॒ष्वप्न्यं॒ निर्द्वि॑ष॒ते दु॒ष्वप्न्यं॑ सुवाम ॥२॥

Sam rajano aguh samrinamyaguh sam kushtha aguh sam kala aguh
Samasmasu yad dushvapnyam nirdvishate dushvapnyam suvama

57.3

देवा॑नां पत्नीनां गर्भ॒ यम॑स्य कर॒ यो भ॒द्रः स्व॑प्न ।
स मम॒ यः पा॒पस्तद् द्वि॑ष॒ते प्र हि॑ण्मः ।
मा तृ॒ष्टाना॑मसि कृष्णशकु॒नेर्मुख॑म् ॥३॥

Devanam patninam garbha yamasya kara yo bhadrah svapna
Sa mama yah papastad dvishate pra hinmah
Ma trishtanamasi krishnashakunermukham

57.4

तं त्वा॑ स्वप्न॒ तथा॒ सं वि॑द्म॒ स त्वं स्व॒प्नाश्व॑ इव का॒यमश्व॑ इव नीना॒हम्।
अ॒ना॒स्मा॒कं दे॑वपी॒युं पिया॑रुं वप॒ यद॒स्मासु॑ दु॒ष्वप्न्यं॒ यद् गोषु॒ यच्च॑ नो गृ॒हे ॥४॥

Tam tva svapna tatha sam vidma sa tvam svapnashva iva kayamashva iva ninaham
Anasmakam devapiyum piyarum vapa yadasmasu dushvapnyam yad goshu yachcha no grihe

57.5

अ॒ना॒स्मा॒कस्तद् दे॑वपी॒युः पिया॑रुर्नि॒ष्कमि॑व॒ प्रति॑ मुञ्चताम्।
नवा॑र॒त्नीनप॑मया अ॒स्माकं॒ ततः॒ परि॑ ।
दु॒ष्वप्न्यं॒ सर्वं॑ द्विष॒ते निर्द॑यामसि ॥५॥

Anasmakastad devapiyuh piyarurnishkamiva prati munchatam
Navaratninapamaya asmakam tatah pari
Dushvapnyam sarvam dvishate nirdayamasi