Sukta 31

31.1

Audumbaramanih, 1-14 savita (pushtikamah), audumbaramanih, anushtup, 5, 12 trishtup, 6 virat prastarapanktih, 11, 13 panchapada shakvari, 14 viradastarapanktih

औदु॑म्बरेण म॒णिना॒ पुष्टि॑कामाय वे॒धसा ।
प॒शूणां॒ सर्वे॑षां स्फा॒तिं गो॒ष्ठे मे॑ सवि॒ता क॑रत् ॥१॥

Audumbarena manina pushtikamaya vedhasa
Pashunam sarvesham sphatim goshthe me savita karat

31.2

यो नो॑ अ॒ग्निर्गार्ह॑पत्यः पशू॒नाम॑धि॒पा अस॑त्।
औदु॑म्बरो॒ वृषा॑ म॒णिः सं मा॑ सृजतु पु॒ष्ट्या ॥२॥

Yo no agnirgarhapatyah pashunamadhipa asat
Audumbaro vrisha manih sam ma srijatu pushtya

31.3

क॒री॒षिणीं॒ फल॑वतीं स्व॒धामिरां॑ च नो गृ॒हे।
औदु॑म्बरस्य॒ तेज॑सा धा॒ता पु॒ष्टिं द॑धातु मे ॥३॥

Karishinim phalavatim svadhamiram cha no grihe
Audumbarasya tejasa dhata pushtim dadhatu me

31.4

यद् द्वि॒पाच्च॒ चतु॑ष्पाच्च॒ यान्यन्ना॑नि॒ ये रसाः॑ ।
गृ॒ह्णे॒३हं॑ त्वेषां॑ भू॒मानं॒ बिभ्र॒दौदु॑म्बरं म॒णिम् ॥४॥

Yad dvipachcha chatushpachcha yanyannani ye rasah
Grihne3ham tvesham bhumanam bibhradaudumbaram manim

31.5

पु॒ष्टिं प॑शू॒नां परि॑ जग्रभा॒हं चतु॑ष्पदां द्वि॒पदां॒ यच्च॑ धा॒न्यम्।
पयः॑ पशू॒नां रस॒मोष॑धीनां॒ बृह॒स्पतिः॑ सवि॒ता मे॒ नि य॑च्छात् ॥५॥

Pushtim pashunam pari jagrabhaham chatushpadam dvipadam yachcha dhanyam
Payah pashunam rasamoshadhinam brihaspatih savita me ni yachchhat

31.6

अ॒हं प॑शू॒नाम॑धि॒पा अ॑सानि॒ मयि॑ पु॒ष्टं पु॑ष्ट॒पति॑र्दधातु ।
मह्य॒मौदु॑म्बरो म॒णिर्द्रवि॑णानि॒ नि य॑च्छतु ॥६॥

Aham pashunamadhipa asani mayi pushtam pushtapatirdadhatu
Mahyamaudumbaro manirdravinani ni yachchhatu

31.7

उप॒ मौदु॑म्बरो म॒णिः प्र॒जया॑ च॒ धने॑न च ।
इन्द्रे॑ण जिन्वि॒तो म॒णिरा मा॑गन्त्स॒ह वर्च॑सा ॥७॥

Upa maudumbaro manih prajaya cha dhanena cha
Indrena jinvito manira magantsaha varchasa

31.8

दे॒वो म॒णिः स॑पत्न॒हा ध॑न॒सा धन॑सातये ।
प॒शोरन्न॑स्य भू॒मानं॒ गवां॑ स्फा॒तिं नि य॑च्छतु ॥८॥

Devo manih sapatnaha dhanasa dhanasataye
Pashorannasya bhumanam gavam sphatim ni yachchhatu

31.9

यथाग्रे॒ त्वं व॑नस्पते पु॒ष्ठ्या स॒ह ज॑ज्ञि॒षे।
ए॒वा धन॑स्य मे स्फा॒तिमा द॑धातु॒ सर॑स्वती ॥९॥

Yathagre tvam vanaspate pushthya saha jagyishe
Eva dhanasya me sphatima dadhatu sarasvati

31.10

आ मे॒ धनं॒ सर॑स्वती॒ पय॑स्फातिं च धा॒न्यऽम्।
सि॒नी॒वा॒ल्युपा॑ वहाद॒यं चौदु॑म्बरो म॒णिः ॥१०॥

A me dhanam sarasvati payasphatim cha dhanyam
Sinivalyupa vahadayam chaudumbaro manih

31.11

त्वं म॑णी॒नाम॑धि॒पा वृषा॑सि॒ त्वयि॑ पु॒ष्टं पु॑ष्ट॒पति॑र्जजान ।
त्वयी॒मे वाजा॒ द्रवि॑णानि॒ सर्वौदु॑म्बरः॒ स त्वम॒स्मत् स॑हस्वा॒रादरा॑ति॒मम॑तिं॒ क्षुधं॑ च ॥११॥

Tvam maninamadhipa vrishasi tvayi pushtam pushtapatirjajana
Tvayime vaja dravinani sarvaudumbarah sa tvamasmat sahasvaradaratimamatim kshudham cha

31.12

ग्रा॒म॒णीर॑सि ग्राम॒णीरु॒त्थाया॒भिषि॑क्तो॒ऽभि मा॑ सिञ्च॒ वर्च॑सा ।
तेजो॑ऽसि॒ तेजो॒ मयि॑ धार॒याधि॑ र॒यिर॑सि र॒यिं मे॑ धेहि ॥१२॥

Gramanirasi gramanirutthayabhishiktobhi ma sincha varchasa
Tejosi tejo mayi dharayadhi rayirasi rayim me dhehi

31.13

पु॒ष्टिर॑सि पु॒ष्ट्या मा॒ सम॑ङ्ग्धि गृहमे॒धी गृ॒हप॑तिं मा कृणु ।
औदु॑म्बरः॒ स त्वम॒स्मासु॑ धेहि र॒यिं च॑ नः॒ सर्व॑वीरं॒ नि य॑च्छ रा॒यस्पोषा॑य॒ प्रति॑ मुञ्चे अ॒हं त्वाम् ॥१३॥

Pushtirasi pushtya ma samangdhi grihamedhi grihapatim ma krinu
Audumbarah sa tvamasmasu dhehi rayim cha nah sarvaviram ni yachchha rayasposhaya prati munche aham tvam

31.14

अ॒यमौदु॑म्बरो म॒णिर्वी॒रो वी॒राय॑ बध्यते ।
स नः॑ स॒निं मधु॑मतीं कृणोतु र॒यिं च॑ नः॒ सर्व॑वीरं॒ नि य॑च्छात् ॥१४॥

Ayamaudumbaro manirviro viraya badhyate
Sa nah sanim madhumatim krinotu rayim cha nah sarvaviram ni yachchhat