Sukta 27

27.1

Suraksha, 1-15 bhrigvangirah, trivrit, chandramashcha, anushtup, 3, 9 trishtup, 10 jagati, 11 archi ushnik, 12 archyanushtup, 13 samni trishtup (11-13 ekavasanah)

गोभि॑ष्ट्वा पात्वृष॒भो वृषा॑ त्वा पातु वा॒जिभिः॑ ।
वा॒युष्त्वा॒ ब्रह्म॑णा पा॒त्विन्द्र॑स्त्वा पात्विन्द्रि॒यैः ॥१॥

Gobhishtva patvrishabho vrisha tva patu vajibhih
Vayushtva brahmana patvindrastva patvindriyaih

27.2

सोम॑स्त्वा पा॒त्वोष॑धीभि॒र्नक्ष॑त्रैः पातु॒ सूर्यः॑ ।
मा॒द्भ्यस्त्वा॑ च॒न्द्रो वृ॑त्र॒हा वातः॑ प्रा॒णेन॑ रक्षतु ॥२॥

Somastva patvoshadhibhirnakshatraih patu suryah
Madbhyastva chandro vritraha vatah pranena rakshatu

27.3

ति॒स्रो दिव॑स्ति॒स्रः पृ॑थि॒वीस्त्रीण्य॒न्तरि॑क्षाणि च॒तुरः॑ समु॒द्रान्।
त्रि॒वृतं॒ स्तोमं॑ त्रि॒वृत॒ आप॑ आहु॒स्तास्त्वा॑ रक्षन्तु त्रि॒वृता॑ त्रि॒वृद्भिः॑ ॥३॥

Tisro divastisrah prithivistrinyantarikshani chaturah samudran
Trivritam stomam trivrita apa ahustastva rakshantu trivrita trivridbhih

27.4

त्रीन्नाकां॒स्त्रीन्त्स॑मु॒द्रांस्त्रीन् ब्र॒ध्नांस्त्रीन् वै॑ष्ट॒पान्।
त्रीन् मा॑त॒रिश्व॑न॒स्त्रीन्त्सूर्या॑न् गो॒प्तॄन् क॑ल्पयामि ॥४॥

Trinnakanstrintsamudranstrin bradhnanstrin vaishtapan
Trin matarishvanastrintsuryan goptrin kalpayami

27.5

घृ॒तेन॑ त्वा॒ समु॑क्षा॒म्यग्न॒ आज्ये॑न व॒र्धय॑न्।
अ॒ग्नेश्च॒न्द्रस्य॒ सूर्य॑स्य॒ मा प्रा॒णं मा॒यिनो॑ दभन् ॥५॥

Ghritena tva samukshamyagna ajyena vardhayan
Agneshchandrasya suryasya ma pranam mayino dabhan

27.6

मा वः॑ प्रा॒णं मा वो॑ऽपा॒नं मा हरो॑ मा॒यिनो॑ दभन्।
भ्राज॑न्तो वि॒श्ववे॑दसो दे॒वा दैव्ये॑न धावत ॥६॥

Ma vah pranam ma vopanam ma haro mayino dabhan
Bhrajanto vishvavedaso deva daivyena dhavata

27.7

प्रा॒नेना॒ग्निं सं सृ॑जति॒ वातः॑ प्रा॒णेन॑ संहि॑तः ।
प्रा॒णेन॑ वि॒श्वतो॑मुखं॒ सुर्यं॑ दे॒वा अ॑जनयन् ॥७॥

Pranenagnim sam srijati vatah pranena sanhitah
Pranena vishvatomukham suryam deva ajanayan

27.8

आयु॑षायुः॒कृतां॑ जी॒वायु॑ष्मान् जीव॒ मा मृ॑थाः ।
प्रा॒णेना॑त्म॒न्वतां जीव॒ मा मृ॒त्योरुद॑गा॒ वश॑म् ॥८॥

Ayushayuhkritam jivayushman jiva ma mrithah
Pranenatmanvatam jiva ma mrityorudaga vasham

27.9

दे॒वानां॒ निहि॑तं नि॒धिं यमिन्द्रो॒ऽन्ववि॑न्दत् प॒थिभि॑र्देव॒यानैः॑ ।
आपो॒ हिर॑ण्यं जुगुपुस्त्रि॒वृद्भि॒स्तास्त्वा॑ रक्षन्तु त्रि॒वृता॑ त्रि॒वृद्भिः॑ ॥९॥

Devanam nihitam nidhim yamindronvavindat pathibhirdevayanaih
Apo hiranyam jugupustrivridbhistastva rakshantu trivrita trivridbhih

27.10

त्रय॑स्त्रिंशद् दे॒वता॒स्त्रीणि॑ च वी॒र्याऽणि प्रिया॒यमा॑णा जुगुपुर॒प्स्व॑१न्तः ।
अ॒स्मिंश्च॒न्द्रे अधि॒ यद्धिर॑ण्यं॒ तेना॒यं कृ॑णवद् वी॒र्या॑णि ॥१०॥

Trayastrinshad devatastrini cha viryani priyayamana jugupurapsva1ntah
Asminshchandre adhi yaddhiranyam tenayam krinavad viryani

27.11

ये दे॑वा दि॒व्येका॑दश॒ स्थ ते दे॑वासो ह॒विरि॒दं जु॑षध्वम् ॥११॥

Ye deva divyekadasha stha te devaso haviridam jushadhvam

27.12

ये दे॑वा अ॒न्तरि॑क्ष॒ एका॑दश॒ स्थ ते दे॑वासो ह॒विरि॒दं जु॑षध्वम् ॥१२॥

Ye deva antariksha ekadasha stha te devaso haviridam jushadhvam

27.13

ये दे॑वा पृथि॒व्यामेका॑दश॒ स्थ ते दे॑वासो ह॒विरि॒दं जु॑षध्वम् ॥१३॥

Ye deva prithivyamekadasha stha te devaso haviridam jushadhvam

27.14

अ॒स॒प॒त्नं पु॒रस्ता॑त् प॒श्चान्नो॒ अभ॑यं कृतम्।
स॒वि॒ता मा॑ दक्षिण॒त उ॑त्त॒रान्मा॒ शची॒पतिः॑ ॥१४॥

Asapatnam purastat pashchanno abhayam kritam
Savita ma dakshinata uttaranma shachipatih

27.15

दि॒वो मा॑दि॒त्या र॑क्षन्तु॒ भूम्या॑ रक्षन्त्व॒ग्नयः॑ ।
इ॒न्द्रा॒ग्नी र॑क्षतां मा पु॒रस्ता॑द॒श्विना॑व॒भितः॒ शर्म॑ यच्छताम्।
ति॒र॒श्चीन॒घ्न्या र॑क्षतु जा॒तवे॑दा भूत॒कृतो॑ मे स॒र्वतः॑ सन्तु॒ वर्म॑ ॥१५॥

Divo maditya rakshantu bhumya rakshantvagnayah
Indragni rakshatam ma purastadashvinavabhitah sharma yachchhatam
Tirashchinaghnya rakshatu jataveda bhutakrito me sarvatah santu varma