Sukta 7

7.1

Yatudhananashanam, 1-7 chatanah, agnih (jatavedah), 3 agnindrau, anushtup, 5 trishtup

स्तु॒वा॒नम॑ग्न॒ आ व॑ह यातु॒धानं॑ किमी॒दिन॑म्।
त्वं हि दे॑व वन्दि॒तो ह॒न्ता दस्यो॑र्ब॒भूवि॑थ ॥१॥

Stuvanamagna a vaha yatudhanam kimidinam
Tvam hi deva vandito hanta dasyorbabhuvitha

आज्य॑स्य परमेष्ठिन् जात॑वेद॒स्तनू॑वशिन्।
अग्ने॑ तौ॒लस्य॒ प्राशा॑न यातु॒धाना॒न् वि ला॑पय ॥२॥

Ajyasya parameshthin jatavedastanuvashin
Agne taulasya prashana yatudhanan vi lapaya

वि ल॑पन्तु यातु॒धाना॑ अ॒त्त्रिणो॒ ये कि॑मी॒दिनः॑ ।
अथे॒दम॑ग्ने नो ह॒विरिन्द्र॑श्च प्रति॑ हर्यतम् ॥३॥

Vi lapantu yatudhana attrino ye kimidinah
Athedamagne no havirindrashcha prati haryatam

अ॒ग्नि पूर्व॒ आ र॑भतां॒ प्रेन्द्रो॑ नुदतु बाहु॒मा॑न्।
ब्रवी॑तु॒ सर्वो॑ यातु॒मान॒यम॒स्मीत्येत्य॑ ॥४॥

Agni purva a rabhatam prendro nudatu bahuman
Bravitu sarvo yatumanayamasmityetya

पश्या॑म ते वी॒र्यं॒ जातवेदः॒ प्र णो॑ ब्रूहि यातु॒धाना॑न् नृचक्षः ।
त्वया॒ सर्वे॒ परि॑तप्ताः पु॒रस्तात्त आ य॑न्तु प्रब्रुवा॒णा उपे॒दम् ॥५॥

Pashyama te viryam jatavedah pra no bruhi yatudhanan nrichakshah
Tvaya sarve paritaptah purastatta a yantu prabruvana upedam

आ र॑भस्व जातवेदो॒ऽस्माकार्था॑य जज्ञिषे ।
दू॒तो नो॑ अग्ने भू॒त्वा या॑तु॒धाना॒न् वि ला॑पय ॥६॥

A rabhasva jatavedosmakarthaya jagyishe
Duto no agne bhutva yatudhanan vi lapaya

त्व॑मग्ने यातु॒धाना॒नुप॑बद्धाँ इ॒हा व॑ह ।
अथै॑षा॒मिन्द्रो॒ वज्रे॒णापि॑ शी॒र्षाणि॑ वृश्चतु ॥७॥

Tvamagne yatudhananupabaddham iha vaha
Athaishamindro vajrenapi shirshani vrishchatu