Sukta 31

31.1

Pashamochanam, 1-4 brahma, ashapalah, (vastoshpatih), anushtup, 3 virat trishtup, 4 paranushtup trishtup

आशा॑नामाशापा॒लेभ्य॑श्च॒तुर्भ्यो॑ अ॒मृते॑भ्यः ।
इ॒दं भू॒तस्याध्य॑क्षेभ्यो वि॒धेम॑ ह॒विषा॑ व॒यम् ॥१॥

Ashanamashapalebhyashchaturbhyo amritebhyah
Idam bhutasyadhyakshebhyo vidhema havisha vayam

य आशा॑नामाशापा॒लाश्च॒त्वार॒ स्थन॑ देवाः ।
ते नो॒ निरृ॑त्याः॒ पाशे॑भ्यो मु॒ञ्चतांह॑सो अंहसः ॥२॥

Ya ashanamashapalashchatvara sthana devah
Te no nirrityah pashebhyo munchatanhaso anhasah

अस्रा॑मस्त्वा ह॒विषा॑ यजा॒म्यश्लो॑णस्त्वा घृ॒तेन॑ जुहोमि ।
य आशा॑नामाशापा॒लस्तु॒रीयो॑ दे॒वः स नः॑ सुभू॒तमेह व॑क्षत् ॥३॥

Asramastva havisha yajamyashlonastva ghritena juhomi
Ya ashanamashapalasturiyo devah sa nah subhutameha vakshat

स्व॒स्ति मा॒त्र उ॒त पि॒त्रे नो॑ अस्तु स्व॒स्ति गोभ्यो॒ जग॑ते॒ पुरु॑षेभ्यः ।
विश्वं॑ सुभू॒तं सु॑वि॒दत्रं॑ नो अस्तु॒ ज्योगे॒व दृ॑शेम॒ सूर्य॑म् ॥४॥

Svasti matra uta pitre no astu svasti gobhyo jagate purushebhyah
Vishvam subhutam suvidatram no astu jyogeva drishema suryam