Sukta 23

23.1

Shatrunivaranam, 1-4 atharva, vanaspatih(asiknih), anushtup

न॒क्तं॒जा॒तास्यो॑षधे॒ रामे॒ कृष्णे॒ असि॑क्नि च ।
इ॒दं र॑जनि रजय कि॒लासं॑ पलि॒तं च॒ यत् ॥१॥

Naktanjatasyoshadhe rame krishne asikni cha
Idam rajani rajaya kilasam palitam cha yat

कि॒लासं॑ च पलि॒तं च॒ निरि॒तो ना॑शया॒ पृष॑त्।
आ त्वा॒ स्वो वि॑शतां॒ वर्णः॒ परा॑ शु॒क्लानि॑ पातय ॥२॥

Kilasam cha palitam cha nirito nashaya prishat
A tva svo vishatam varnah para shuklani pataya

असि॑तं ते प्र॒लय॑नमा॒स्थान॒मसि॑तं॒ तव॑ ।
असि॑क्न्यस्योषधे॒ निरि॒तो ना॑शया॒ पृष॑त् ॥३॥

Asitam te pralayanamasthanamasitam tava
Asiknyasyoshadhe nirito nashaya prishat

अ॒स्थि॒जस्य॑ कि॒लास॑स्य तनू॒जस्य॑ च॒ यत् त्व॒चि।
दूष्या॑ कृ॒तस्य॒ ब्रह्म॑णा॒ लक्ष्म॑ श्वे॒तम॑नीनशम् ॥४॥

Asthijasya kilasasya tanujasya cha yat tvachi
Dushya kritasya brahmana lakshma shvetamaninasham