Sukta 20

20.1

Shatrunivaranam, 1-4 atharva, 1 somah, marutah, 2 mitravarunau, 3 varunah 4 indrah, anushtup, trishtup

अदा॑रसृद् भवतु देव सोमा॒स्मिन् य॒ज्ञे म॑रुतो मृ॒डता॑ नः ।
मा नो॑ विददभि॒भा मो अश॑स्ति॒र्मा नो॑ विदद् वृजि॒ना द्वेष्या॒ या ॥१॥

Adarasrid bhavatu deva somasmin yagye maruto mridata nah
Ma no vidadabhibha mo ashastirma no vidad vrijina dveshya ya

20.2

यो अ॒द्य सेन्यो॑ व॒धोऽघा॒यूना॑मु॒दीर॑ते ।
यु॒वं तं मि॑त्रावरुणाव॒स्मद्या॑वयतं॒ परि॑ ॥२॥

Yo adya senyo vadhoghayunamudirate
Yuvam tam mitravarunavasmadyavayatam pari

20.3

इ॒तश्च॒ यद॒मुत॑श्च॒ यद् व॒धं व॑रुण यावय ।
वि म॒हच्छर्म॑ यच्छ॒ वरी॑यो यावया व॒धम् ॥३॥

Itashcha yadamutashcha yad vadham varuna yavaya
Vi mahachchharma yachchha variyo yavaya vadham

20.4

शा॒स इ॒त्था म॒हाँ अ॑स्यमित्रसा॒हो अ॑स्तृ॒तः ।
न यस्य॑ ह॒न्यते॒ सखा॒ न जी॒यते॑ क॒दा च॒न ॥४॥

Shasa ittha maham asyamitrasaho astritah
Na yasya hanyate sakha na jiyate kada chana