Utshovঅধ্যায় 23
23.1
হিরণ্যগর্ভঃ সমবর্ততাগ্রে ভূতস্য জাতঃ পতিরেক আসীৎ ।
স দাধার পৃথিবীং দ্যামুতেমাং কস্মৈ দেবায় হবিষা বিধেম ॥১॥
23.2
উপয়ামগৃহীতোঽসি প্রজাপতয়ে ত্বা জুষ্টং গৃহ্ণাম্যেষ তে যোনিঃ সূর্যস্তে মহিমা ।
যস্তেঽহন্ত্সংবত্সরে মহিমা সম্বভূব যস্তে বায়াবন্তরিক্ষে মহিমা সম্বভূব যস্তে দিবি সূর্যে মহিমা সম্বভূব তস্মৈ তে মহিম্নে প্রজাপতয়ে স্বাহা দেবেভ্যঃ ॥২॥
23.3
যঃ প্রাণতো নিমিষতো মহিত্বৈক ইদ্রাজা জগতো বভূব ।
য ঈশে অস্য দ্বিপদশ্চতুষ্পদঃ কস্মৈ দেবায় হবিষা বিধেম ॥৩॥
23.4
উপয়ামগৃহীতোঽসি প্রজাপতয়ে ত্বা জুষ্টং গৃহ্ণাম্যেষ তে যোনিশ্চন্দ্রমাস্তে মহিমা ।
যস্তে রাত্রৌ সংবত্সরে মহিমা সম্বভূব যস্তে পৃথিব্যামগ্নৌ মহিমা সম্বভূব যস্তে নক্ষত্রেষু চন্দ্রমসি মহিমা সম্বভূব তস্মৈ তে মহিম্নে প্রজাপতয়ে দেবেভ্যঃ স্বাহা ॥৪॥
23.5
যুঞ্জন্তি ব্রধ্নমরুষং চরন্তং পরি তস্থুষঃ । রোচন্তে রোচনা দিবি ॥৫॥
23.6
যুঞ্জন্ত্যস্য কাম্যা হরী বিপক্ষসা রথে । শোণা ধৃষ্ণূ নৃসাহসা ॥৬॥
23.7
যদ্বাতো অপো অগনীগন্প্রিয়ামিন্দ্রস্য তন্বম্ । এতং স্তোতরনেন পথা পুনরশ্বমাবর্তয়াসি নঃ ॥৭॥
23.8
বসবস্ত্বাঞ্জন্তু গায়ত্রেণ ছন্দসা রুদ্রাস্ত্বাঞ্জন্তু ত্রৈষ্টুভেন ছন্দসা ঽঽদিত্যাস্ত্বাঞ্জন্তু জাগতেন ছন্দসা ।
ভূর্ভুবঃ স্বর্লাজী৩ঞ্ছাচী৩ন্যব্যে গব্য এতদন্নমত্ত দেবা এতদন্নমদ্ধি প্রজাপতে ॥৮॥
23.9
কঃ স্বিদেকাকী চরতি ক উ স্বিজ্জায়তে পুনঃ । কিং স্বিদ্ধিমস্য ভেষজং কিম্বাবপনং মহৎ ॥৯॥
23.10
সূর্য একাকী চরতি চন্দ্রমা জায়তে পুনঃ । অগ্নির্হিমস্য ভেষজং ভূমিরাবপনং মহৎ ॥১০॥
23.11
কা স্বিদাসীত্পূর্বচিত্তিঃ কিং স্বিদাসীদ্ বৃহদ্বয়ঃ ।
কা স্বিদাসীত্পিলিপ্পিলা কা স্বিদাসীত্পিশঙ্গিলা ॥১১॥
23.12
দ্যৌরাসীত্পূর্বচিত্তিরশ্ব আসীদ্ বৃহদ্বয়ঃ ।
অবিরাসীত্পিলিপ্পিলা রাত্রিরাসীত্পিশঙ্গিলা ॥১২॥
23.13
বায়ুষ্ট্বা পচতৈরবত্বসিতগ্রীবশ্ছাগৈর্ন্যগ্রোধশ্চমসৈঃ শল্মলির্বৃদ্ধ্যা ।
এষ স্য রাথ্যো বৃষা পড্ভিশ্চতুর্ভিরেদগন্ব্রহ্মা কৃষ্ণশ্চ নোঽবতু নমোঽগ্নয়ে ॥১৩॥
23.14
সংশিতো রশ্মিনা রথঃ সংশিতো রশ্মিনা হয়ঃ ।
সংশিতো অপ্স্বপ্সুজা ব্রহ্মা সোমপুরোগবঃ ॥১৪॥
23.15
স্বয়ং বাজিঁস্তন্বং কল্পয়স্ব স্বয়ং যজস্ব স্বয়ং জুষস্ব । মহিমা তেঽন্যেন ন সন্নশে ॥১৫॥
23.16
ন বা উ এতন্ম্রিয়সে ন রিষ্যসি দেবাঁ২ ইদেষি পথিভিঃ সুগেভিঃ ।
যত্রাসতে সুকৃতো যত্র তে যয়ুস্তত্র ত্বা দেবঃ সবিতা দধাতু ॥১৬॥
23.17
অগ্নিঃ পশুরাসীত্তেনায়জন্ত স এতঁল্লোকমজয়দ্যস্মিন্নগ্নিঃ স তে লোকো ভবিষ্যতি তং জেষ্যসি পিবৈতা অপঃ ।
বায়ুঃ পশুরাসীত্তেনায়জন্ত স এতঁল্লোকমজয়দ্যস্মিন্বায়ুঃ স তে লোকো ভবিষ্যতি তং জেষ্যসি পিবৈতা অপঃ ।
সূর্যঃ পশুরাসীত্তেনায়জন্ত স এতঁল্লোকমজয়দ্যস্মিন্ত্সূর্যঃ স তে লোকো ভবিষ্যতি তং জেষ্যসি পিবৈতা অপঃ ॥১৭॥
23.18
প্রাণায় স্বাহা ঽপানায় স্বাহা ব্যানায় স্বাহা ।
অম্বে অম্বিকেঽম্বালিকে ন মা নয়তি কশ্চন ।
সসস্ত্যশ্বকঃ সুভদ্রিকাং কাম্পীলবাসিনীম্ ॥১৮॥
23.19
গণানাং ত্বা গণপতিং হবামহে প্রিয়াণাং ত্বা প্রিয়পতিং হবামহে নিধীনাং ত্বা নিধিপতিং হবামহে বসো মম ।
আহমজানি গর্ভধমা ত্বমজাসি গর্ভধম্ ॥১৯॥
23.20
তা উভৌ চতুরঃ পদঃ সংপ্রসারয়াব স্বর্গে লোকে প্রোর্ণুবাথাং বৃষা বাজী রেতোধা রেতো দধাতু ॥২০॥
23.21
উত্সক্থ্যা অব গুদং ধেহি সমঞ্জিং চারয়া বৃষন্ । য স্ত্রীণাং জীবভোজনঃ ॥২১॥
23.22
যকাসকৌ শকুন্তিকাঽঽহলগিতি বঞ্চতি । আহন্তি গভে পসো নিগল্গলীতি ধারকা ॥২২॥
23.23
যকোঽসকৌ শকুন্তক আহলগিতি বঞ্চতি । বিবক্ষত ইব তে মুখমধ্বর্যো মা নস্ত্বমভি ভাষথাঃ ॥২৩॥
23.24
মাতা চ তে পিতা চ তেঽগ্রং বৃক্ষস্য রোহতঃ । প্রতিলামীতি তে পিতা গভে মুষ্টিমতংসয়ৎ ॥২৪॥
23.25
মাতা চ তে পিতা চ তেঽগ্রে বৃক্ষস্য ক্রীডতঃ । বিবক্ষত ইব তে মুখং ব্রহ্মন্মা ত্বং বদো বহু ॥২৫॥
23.26
ঊর্ধ্বমেনামুচ্ছ্রাপয় গিরৌ ভারং হরন্নিব । অথাস্যৈ মধ্যমেধতাং শীতে বাতে পুনন্নিব ॥২৬॥
23.27
ঊর্ধ্বমেনমুচ্ছ্রয়তাদ্গিরৌ ভারং হরন্নিব । অথাস্য মধ্যমেজতু শীতে বাতে পুনন্নিব ॥২৭॥
23.28
যদস্যা অংহুভেদ্যাঃ কৃধু স্থূলমুপাতসৎ । মুষ্কাবিদস্যা এজতো গোশফে শকুলাবিব ॥২৮॥
23.29
যদ্দেবাসো ললামগুং প্র বিষ্টীমিনমাবিষুঃ । সক্থ্না দেদিশ্যতে নারী সত্যস্যাক্ষিভুবো যথা ॥২৯॥
23.30
যদ্ধরিণো যবমত্তি ন পুষ্টং পশু মন্যতে । শূদ্রা যদর্যজারা ন পোষায় ধনায়তি ॥৩০॥
23.31
যদ্ধরিণো যবমত্তি ন পুষ্টং বহু মন্যতে । শূদ্রো যদর্যায়ৈ জারো ন পোষমনু মন্যতে ॥৩১॥
23.32
দধিক্রাব্ণো অকারিষং জিষ্ণোরশ্বস্য বাজিনঃ ।
সুরভি নো মুখা করত্প্র ণ আয়ূংষি তারিষৎ ॥৩২॥
23.33
গায়ত্রী ত্রিষ্টুব্জগত্যনুষ্টুপ্পঙ্ক্ত্যা সহ । বৃহত্যুষ্ণিহা ককুপ্সূচীভিঃ শম্যন্তু ত্বা ॥৩৩॥
23.34
দ্বিপদা যাশ্চতুষ্পদাস্ত্রিপদা যাশ্চ ষট্পদাঃ ।
বিচ্ছন্দা যাশ্চ সচ্ছন্দাঃ সূচীভিঃ শম্যন্তু ত্বা ॥৩৪॥
23.35
মহানাম্ন্যো রেবত্যো বিশ্বা আশাঃ প্রভূবরীঃ ।
মৈঘীর্বিদ্যুতো বাচঃ সূচীভিঃ শম্যন্তু ত্বা ॥৩৫॥
23.36
নার্যস্তে পত্ন্যো লোম বিচিন্বন্তু মনীষয়া ।
দেবানাং পত্ন্যো দিশঃ সূচীভিঃ শম্যন্তু ত্বা ॥৩৬॥
23.37
রজতা হরিণীঃ সীসা যুজো যুজ্যন্তে কর্মভিঃ ।
অশ্বস্য বাজিনস্ত্বচি সিমাঃ শম্যন্তু শম্যন্তীঃ ॥৩৭॥
23.38
কুবিদঙ্গ যবমন্তো যবঞ্চিদ্যথা দান্ত্যনুপূর্বং বিয়ূয় ।
ইহেহৈষাং কৃণুহি ভোজনানি যে বর্হিষো নম উক্তিং যজন্তি ॥৩৮॥
23.39
কস্ত্বা ছ্যতি কস্ত্বা বিশাস্তি কস্তে গাত্রাণি শম্যতি । ক উ তে শমিতা কবিঃ ॥৩৯॥
23.40
ঋতবস্ত ঋতুথা পর্ব শমিতারো বি শাসতু । সংবত্সরস্য তেজসা শমীভিঃ শম্যন্তু ত্বা ॥৪০॥
23.41
অর্ধমাসাঃ পরূংষি তে মাসা আ চ্ছ্যন্তু শম্যন্তঃ । অহোরাত্রাণি মরুতো বিলিষ্টং সূদয়ন্তু তে ॥৪১॥
23.42
দৈব্যা অধ্বর্যবস্ত্বা চ্ছ্যন্তু বি চ শাসতু । গাত্রাণি পর্বশস্তে সিমাঃ কৃণ্বন্তু শম্যন্তীঃ ॥৪২॥
23.43
দ্যৌস্তে পৃথিব্যন্তরিক্ষং বায়ুশ্ছিদ্রং পৃণাতু তে । সূর্যস্তে নক্ষত্রৈঃ সহ লোকং কৃণোতু সাধুয়া ॥৪৩॥
23.44
শং তে পরেভ্যো গাত্রেভ্যঃ শমস্ত্ববরেভ্যঃ । শমস্থভ্যো মজ্জভ্যঃ শম্বস্তু তন্বৈ তব ॥৪৪॥
23.45
কঃ স্বিদেকাকী চরতি ক উ স্বিজ্জায়তে পুনঃ । কিং স্বিদ্ধিমস্য ভেষজং কিম্বাবপনং মহৎ ॥৪৫॥
23.46
সূর্য একাকী চরতি চন্দ্রমা জায়তে পুনঃ । অগ্নির্হিমস্য ভেষজং ভূমিরাবপনং মহৎ ॥৪৬॥
23.47
কিং স্বিত্সূর্যসমং জ্যোতিঃ কিং সমুদ্রসমং সরঃ । কিং স্বিত্পৃথিব্যৈ বর্ষীয়ঃ কস্য মাত্রা ন বিদ্যতে ॥৪৭॥
23.48
ব্রহ্ম সূর্যসমং জ্যোতির্দ্যৌঃ সমুদ্রসমং সরঃ । ইন্দ্রঃ পৃথিব্যৈ বর্ষীয়ান্ গোস্তু মাত্রা ন বিদ্যতে ॥৪৮॥
23.49
পৃচ্ছামি ত্বা চিতয়ে দেবসখ যদি ত্বমত্র মনসা জগন্থ ।
যেষু বিষ্ণুস্ত্রিষু পদেষ্বেষ্টস্তেষু বিশ্বং ভুবনমা বিবেশা৩ ॥৪৯॥
23.50
অপি তেষু ত্রিষু পদেষ্বস্মি যেষু বিশ্বং ভুবনমা বিবেশ ।
সদ্যঃ পর্যেমি পৃথিবীমুত দ্যামেকেনাঙ্গেন দিবো অস্য পৃষ্ঠম্ ॥৫০॥
23.51
কেষ্বন্তঃ পুরুষ আ বিবেশ কান্যন্তঃ পুরুষে অর্পিতানি ।
এতদ্ব্রহ্মন্নুপ বল্হামসি ত্বা কিং স্বিন্নঃ প্রতি বোচাস্যত্র ॥৫১॥
23.52
পঞ্চস্বন্তঃ পুরুষ আ বিবেশ তান্যন্তঃ পুরুষে অর্পিতানি ।
এতত্ত্বাত্র প্রতিমন্বানো অস্মি ন মায়য়া ভবস্যুত্তরো মৎ ॥৫২॥
23.53
কা স্বিদাসীত্পূর্বচিত্তিঃ কিং স্বিদাসীদ্ বৃহদ্বয়ঃ ।
কা স্বিদাসীত্পিলিপ্পিলা কা স্বিদাসীত্পিশঙ্গিলা ॥৫৩॥
23.54
দ্যৌরাসীত্পূর্বচিত্তিরশ্ব আসীদ্ বৃহদ্বয়ঃ ।
অবিরাসীত্পিলিপ্পিলা রাত্রিরাসীত্পিশঙ্গিলা ॥৫৪॥
23.55
কা ঈমরে পিশঙ্গিলা কা ঈং কুরুপিশঙ্গিলা ।
ক ঈমাস্কন্দমর্ষতি ক ঈং পন্থাং বি সর্পতি ॥৫৫॥
23.56
অজারে পিশঙ্গিলা শ্বাবিত্কুরুপিশঙ্গিলা ।
শশ আস্কন্দমর্ষত্যহিঃ পন্থাং বি সর্পতি ॥৫৬॥
23.57
কত্যস্য বিষ্ঠাঃ কত্যক্ষরাণি কতি হোমাসঃ কতিধা সমিদ্ধঃ ।
যজ্ঞস্য ত্বা বিদথা পৃচ্ছমত্র কতি হোতার ঋতুশো যজন্তি ॥৫৭॥
23.58
ষডস্য বিষ্ঠাঃ শতমক্ষরাণ্যশীতির্হোমাঃ সমিধো হ তিস্রঃ ।
যজ্ঞস্য তে বিদথা প্র ব্রবীমি সপ্ত হোতার ঋতুশো যজন্তি ॥৫৮॥
23.59
কো অস্য বেদ ভুবনস্য নাভিং কো দ্যাবাপৃথিবী অন্তরিক্ষম্ ।
কঃ সূর্যস্য বেদ বৃহতো জনিত্রং কো বেদ চন্দ্রমসং যতোজাঃ ॥৫৯॥
23.60
বেদাহমস্য ভুবনস্য নাভিং বেদ দ্যাবাপৃথিবী অন্তরিক্ষম্ ।
বেদ সূর্যস্য বৃহতো জনিত্রমথো বেদ চন্দ্রমসং যতোজাঃ ॥৬০॥
23.61
পৃচ্ছামি ত্বা পরমন্তং পৃথিব্যাঃ পৃচ্ছামি যত্র ভুবনস্য নাভিঃ ।
পৃচ্ছামি ত্বা বৃষ্ণো অশ্বস্য রেতঃ পৃচ্ছামি বাচঃ পরমং ব্যোম ॥৬১॥
23.62
ইয়ং বেদিঃ পরো অন্তঃ পৃথিব্যা অয়ং যজ্ঞো ভুবনস্য নাভিঃ ।
অয়ং সোমো বৃষ্ণো অশ্বস্য রেতো ব্রহ্মায়ং বাচঃ পরমং ব্যোম ॥৬২॥
23.63
সুভূঃ স্বয়ম্ভূঃ প্রথমোঽন্তর্মহত্যর্ণবে । দধে হ গর্ভমৃত্বিয়ং যতো জাতঃ প্রজাপতিঃ ॥৬৩॥
23.64
হোতা যক্ষত্প্রজাপতিং সোমস্য মহিম্নঃ । জুষতাং পিবতু সোমং হোতর্যজ ॥৬৪॥
23.65
প্রজাপতে ন ত্বদেতান্যন্যো বিশ্বা রূপাণি পরি তা বভূব ।
যত্কামাস্তে জুহুমস্তন্নো অস্তু বয়ং স্যাম পতয়ো রয়ীণাম্ ॥৬॥