অধ্যায় 28

28.1

অথাষ্টাবিংশোঽধ্যায়ঃ ।

অগ্নিশ্চ পৃথিবী চ সংনতে তে মে সং নমতামদো বায়ুশ্চাঽন্তরিক্ষং চ সংনতে তে মে সং নমতামদ
আদিত্যশ্চ দ্যৌশ্চ সংনতে তে মে সং নমতামদ আপশ্চ বরুণশ্চ সংনতে তে মে সং নমতামদঃ ।
সপ্ত সংসদো অষ্টমী ভূতসাধনী ॥১॥

28.2

সকামাঁ২ অধ্বনস্কুরু সংজ্ঞানমস্তু মেঽমুনা ।
যথেমাং বাচং কল্যাণীমাবদানি জনেভ্যঃ ॥২॥

28.3

ব্রহ্মরাজন্যাভ্যাং শূদ্রায় চার্যায় চ স্বায় চারণায় চ ।
প্রিয়ো দেবানাং দক্ষিণায়ৈ দাতুরিহ ভূয়াসময়ং মে কামঃ সমৃধ্যতামুপ মাদো নমতু ॥৩॥

28.4

(১) ৩
বৃহস্পতে অতি যদর্যো অর্হাদ্ দ্যুমদ্বিভাতি ক্রতুমজ্জনেষু ।
যদ্দীদয়চ্ছবস ঋতপ্রজাত তদস্মাসু দ্রবিণং ধেহি চিত্রম্ ।
উপয়ামগৃহীতোঽসি বৃহস্পতয়ে ত্বৈষ তে যোনির্বৃহস্পতয়ে ত্বা ॥১॥

28.5

(২) ৪ (১৬২১)
ইন্দ্র গোমন্নিহা যাহি পিবা সোমং শতক্রতো । বিদ্যদ্ভির্গ্রাবভিঃ সুতম্ ।
উপয়ামগৃহীতোঽসীন্দ্রায় ত্বা গোমত এষ তে যোনিরিন্দ্রায় ত্বা গোমতে ॥১॥

28.6

(৩) ৫
ঋতাবানং বৈশ্বানরমৃতস্য জ্যোতিষস্পতিম্ । অজস্রং ঘর্মমীমহে ।
উপয়ামগৃহীতোঽসি বৈশ্বানরায় ত্বৈষ তে যোনির্বৈশ্বানরায় ত্বা ॥১॥

28.7

(৪) ৬
বৈশ্বানরং হবামহ ঋতস্য জ্যোতিষস্পতিম্ । অজস্রং ঘর্মমীমহে ।
উপয়ামগৃহীতোঽসি বৈশ্বানরায় ত্বৈষ তে যোনির্বৈশ্বানরায় ত্বা ॥১॥

28.8

(৫) ৭
বৈশ্বানরো ন ঊতয় আ প্র যাতু পরাবতঃ । অগ্নিরুক্থেন বাহসা ।
উপয়ামগৃহীতোঽসি বৈশ্বানরায় ত্বৈষ তে যোনির্বৈশ্বানরায় ত্বা ॥১॥

28.9

(৬) ৮
বৈশ্বানরস্য সুমতৌ স্যাম রাজা হি কং ভুবনানামভিশ্রীঃ ।
ইতো জাতো বিশ্বমিদং বি চষ্টে বৈশ্বনরো যততে সূর্যেণ।
উপয়ামগৃহীতোঽসি বৈশ্বানরায় ত্বৈষ তে যোনির্বৈশ্বানরায় ত্বা ॥১॥

28.10

(৭) ৯
মরুত্বাঁ২ ইন্দ্র বৃষভো রণায় পিবা সোমমনুষ্বধং মদায় ।
আসিঞ্চস্ব জঠরে মধ্ব ঊর্মিং ত্বং রাজাসি প্রতিপত্সুতানাম্ ।
উপয়ামগৃহীতোঽসীন্দ্রায় ত্বা মরুত্বত এষ তে যোনিরিন্দ্রায় ত্বা মরুত্বতে ॥১॥

28.11

(৮) ১০
মহাঁ২ ইন্দ্রো বজ্রহস্তঃ ষোলশী শর্ম যচ্ছতু । হন্তু পাপ্মানং যোঽস্মান্দ্বেষ্টি ।
উপয়ামগৃহীতোঽসীন্দ্রায় ত্বা ষোলশিন এষ তে যোনিরিন্দ্রায় ত্বা ষোলশিনে ॥১॥

28.12

(৯) ১১
অগ্নিরৃষিঃ পবমানঃ পাঞ্চজন্যঃ পুরোহিতঃ । তমীমহে মহাগয়ম্ ॥১॥

28.13

(১০) ১২
অনু বীরৈরনু পুষ্যাস্ম গোভিরন্বশ্বৈরনু সর্বেণ পুষ্টৈঃ ।
অনু দ্বিপদানু চতুষ্পদা বয়ং দেবা নো যজ্ঞমৃতুথা নয়ন্তু ॥১॥

28.14

(১১) ১৩
আ নো গোত্রা দর্দৃহি গোপতে গাঃ সমস্মভ্যং সনয়ো যন্তু বাজাঃ ।
দিবক্ষা অসি বৃষভ সত্যশুষ্মোঽস্মভ্যং সুমঘবন্ বোধি গোদাঃ ॥১॥

28.15

(১২) ১৪ (১৬৩১)
॥ইতি শুক্লয়জুঃকাণ্বসংহিতায়াং অষ্টাবিংশোঽধ্যায়ঃ ॥২৮॥