সর্গ 49

49.1

অথ অংগদঃ তদা সর্বান্ বানরান্ ইদম্ অব্রবীৎ ।
পরিশ্রান্তো মহা প্রাজ্ঞঃ সমাশ্বাস্য শনৈর্ বচঃ ॥৪-৪৯-১॥

বনানি গিরয়ো নদ্যো দুর্গাণি গহনানি চ ।
দরী গিরি গুহাঃ চৈব বিচিতা নঃ সমংততঃ ॥৪-৪৯-২॥

তত্র তত্র সহ অস্মাভিঃ জানকী ন চ দৃশ্যতে ।
তথা রক্ষঃ অপহর্তা চ সীতায়াঃ চৈব দুষ্কৃতী ॥৪-৪৯-৩॥

কালঃ চ নঃ মহান্ যাতঃ সুগ্রীবঃ চ উগ্র শাসনঃ ।
তস্মাৎ ভবন্তঃ সহিতা বিচিন্বন্তু সমংততঃ ॥৪-৪৯-৪॥

বিহায় তন্দ্রীম্ শোকম্ চ নিদ্রাম্ চৈব সমুত্থিতাম্ ।
বিচিনুধ্বম্ তথা সীতাম্ পশ্যামো জনক আত্মজাম্ ॥৪-৪৯-৫॥

অনির্বেদম্ চ দাক্ষ্যম্ চ মনসঃ চ অপরাজয়ম্ ।
কার্য সিদ্ধি করাণি আহুঃ তস্মাৎ এতৎ ব্রবীমি অহম্ ॥৪-৪৯-৬॥

অদ্য অপি ইদম্ বনম্ দুর্গম্ বিচিন্বন্তু বন ওকসঃ ।
খেদম্ ত্যক্ত্বা পুনঃ সর্বম্ বনম্ এতৎ বিচিন্বতাম্ ॥৪-৪৯-৭॥

অবশ্যম্ কুর্বতাম্ দৃশ্যতে কর্মণঃ ফলম্ ।
পরম্ নির্বেদম্ আগম্য ন হি নঃ মীলনম্ ক্ষমম্ ॥৪-৪৯-৮॥

সুগ্রীবঃ ক্রোধনো রাজা তীক্ষ্ণ দণ্ডঃ চ বানরাঃ ।
ভেতব্যম্ তস্য সততম্ রামস্য চ মহাত্মনঃ ॥৪-৪৯-৯॥

হিতার্থম্ এতৎ উক্তম্ বঃ ক্রিয়তাম্ যদি রোচতে ।
উচ্যতাম্ হি ক্ষমম্ যৎ তৎ সর্বেষাম্ এব বানরাঃ ॥৪-৪৯-১০॥

অংগদস্য বচঃ শ্রুত্বা বচনম্ গংধমাদনঃ ।
উবাচ ব্যক্তয়া বাচা পিপাসা শ্রম খিন্নয়া ॥৪-৪৯-১১॥

সদৃশম্ খলু বঃ বাক্যম্ অংগদো যৎ উবাচ হ ।
হিতম্ চ এব অনুকূলম্ চ ক্রিয়তাম্ অস্য ভাষিতম্ ॥৪-৪৯-১২॥

পুনঃ মার্গামহে শৈলান্ কন্দরাম্ চ শিলান্ তথা ।
কাননানি চ শূন্যানি গিরি প্রস্রবণানি চ ॥৪-৪৯-১৩॥

যথা উদ্দিষ্ঠানি সর্বাণি সুগ্রীবেণ মহাত্মনা ।
বিচিন্বন্তু বনম্ সর্বে গিরি দুর্গাণি সংগতাঃ ॥৪-৪৯-১৪॥

ততঃ সমুত্থায় পুনঃ বানরাঃ তে মহাবলাঃ ।
বিন্ধ্য কানন সংকীর্ণাম্ বিচেরুর্ দক্ষিণাম্ দিশম্ ॥৪-৪৯-১৫॥

তে শারদ অভ্র প্রতিমম্ শ্রীমৎ রজত পর্বতম্ ।
শৃংগবন্তম্ দরীবংতম্ অধিরুহ্য চ বানরাঃ ॥৪-৪৯-১৬॥

তত্র লোধ্র বনম্ রম্যম্ সপ্ত পর্ণ বনানি চ ।
বিচিন্বন্তো হরি বরাঃ সীতা দর্শন কান্ক্ষিণঃ ॥৪-৪৯-১৭॥

তস্য অগ্রম্ অধিরূঢাঃ তে শ্রান্তা বিপুল বিক্রমাঃ ।
ন পশ্যন্তি স্ম বৈদেহীম্ রামস্য মহিষীম্ প্রিয়াম্ ॥৪-৪৯-১৮॥

তে তু দৃষ্টি গতম্ দৃষ্ট্বা তম্ শৈলম্ বহু কংদরম্ ।
অধ্যারোহন্ত হরয়ো বীক্ষমাণাঃ সমংততঃ ॥৪-৪৯-১৯॥

অবরুহ্য ততো ভূমিম্ শ্রান্তা বিগত চেতসঃ ।
স্থিত্বা মুহূর্তম্ তত্র অথ বৃক্ষ মূলম্ উপাশ্রিতাঃ ॥৪-৪৯-২০॥

তে মুহূর্তম্ সমাশ্বস্তাঃ কিংচিৎ ভগ্ন পরিশ্রমাঃ ।
পুনর্ এব উদ্যতাঃ কৃত্স্নাম্ মার্গিতুম্ দক্ষিণাম্ দিশম্ ॥৪-৪৯-২১॥

হনুমৎ প্রমুখাঃ তে তু প্রস্থিতাঃ প্লবগ ঋষভাঃ ।
বিংধ্যম্ এব আদিতঃ কৃত্বা বিচেরুঃ তে সমংততঃ ॥৪-৪৯-২২॥