সূক্ত 86

86.1

(১-৪৮ ) ১-১০ অকৃষ্টা মাষাঃ, ১১-২০ সিকতা নিবাবরী, ২১-৩০ পৃশ্নিয়োঽজাঃ, ৩১-৪০ অকৃষ্টমাষাদয়স্ত্রয়ঃ,৪১-৪৫ ভৌমোঽত্রিঃ, ৪৬-৪৮ গৃত্সমদঃ শৌনকঃ । পবমানঃ সোমঃ ।জগতী ।

প্র ত আশবঃ পবমান ধীজবো মদা অর্ষন্তি রঘুজা ইব ত্মনা ।
দিব্যাঃ সুপর্ণা মধুমন্ত ইন্দবো মদিন্তমাসঃ পরি কোশমাসতে ॥১॥

86.2

প্র তে মদাসো মদিরাস আশবোঽসৃক্ষত রথ্যাসো যথা পৃথক্ ।
ধেনুর্ন বত্সং পয়সাভি বজ্রিণমিন্দ্রমিন্দবো মধুমন্ত ঊর্ময়ঃ ॥২॥

86.3

অত্যো ন হিয়ানো অভি বাজমর্ষ স্বর্বিত্কোশং দিবো অদ্রিমাতরম্ ।
বৃষা পবিত্রে অধি সানো অব্যয়ে সোমঃ পুনান ইন্দ্রিয়ায় ধায়সে ॥৩॥

86.4

প্র ত আশ্বিনীঃ পবমান ধীজুবো দিব্যা অসৃগ্রন্পয়সা ধরীমণি ।
প্রান্তৠষয়ঃ স্থাবিরীরসৃক্ষত যে ত্বা মৃজন্ত্যৃষিষাণ বেধসঃ ॥৪॥

86.5

বিশ্বা ধামানি বিশ্বচক্ষ ঋভ্বসঃ প্রভোস্তে সতঃ পরি যন্তি কেতবঃ ।
ব্যানশিঃ পবসে সোম ধর্মভিঃ পতির্বিশ্বস্য ভুবনস্য রাজসি ॥৫॥

86.6

উভয়তঃ পবমানস্য রশ্ময়ো ধ্রুবস্য সতঃ পরি যন্তি কেতবঃ ।
যদী পবিত্রে অধি মৃজ্যতে হরিঃ সত্তা নি যোনা কলশেষু সীদতি ॥৬॥

86.7

যজ্ঞস্য কেতুঃ পবতে স্বধ্বরঃ সোমো দেবানামুপ যাতি নিষ্কৃতম্ ।
সহস্রধারঃ পরি কোশমর্ষতি বৃষা পবিত্রমত্যেতি রোরুবৎ ॥৭॥

86.8

রাজা সমুদ্রং নদ্যো৩ বি গাহতেঽপামূর্মিং সচতে সিন্ধুষু শ্রিতঃ ।
অধ্যস্থাত্সানু পবমানো অব্যয়ং নাভা পৃথিব্যা ধরুণো মহো দিবঃ ॥৮॥

86.9

দিবো ন সানু স্তনয়ন্নচিক্রদদ্দ্যৌশ্চ যস্য পৃথিবী চ ধর্মভিঃ ।
ইন্দ্রস্য সখ্যং পবতে বিবেবিদত্সোমঃ পুনানঃ কলশেষু সীদতি ॥৯॥

86.10

জ্যোতির্যজ্ঞস্য পবতে মধু প্রিয়ং পিতা দেবানাং জনিতা বিভূবসুঃ ।
দধাতি রত্নং স্বধয়োরপীচ্যং মদিন্তমো মত্সর ইন্দ্রিয়ো রসঃ ॥১০॥

86.11

অভিক্রন্দন্কলশং বাজ্যর্ষতি পতির্দিবঃ শতধারো বিচক্ষণঃ ।
হরির্মিত্রস্য সদনেষু সীদতি মর্মৃজানোঽবিভিঃ সিন্ধুভির্বৃষা ॥১১॥

86.12

অগ্রে সিন্ধূনাং পবমানো অর্ষত্যগ্রে বাচো অগ্রিয়ো গোষু গচ্ছতি ।
অগ্রে বাজস্য ভজতে মহাধনং স্বায়ুধঃ সোতৃভিঃ পূয়তে বৃষা ॥১২॥

86.13

অয়ং মতবাঞ্ছকুনো যথা হিতোঽব্যে সসার পবমান ঊর্মিণা ।
তব ক্রত্বা রোদসী অন্তরা কবে শুচির্ধিয়া পবতে সোম ইন্দ্র তে ॥১৩॥

86.14

দ্রাপিং বসানো যজতো দিবিস্পৃশমন্তরিক্ষপ্রা ভুবনেষ্বর্পিতঃ ।
স্বর্জজ্ঞানো নভসাভ্যক্রমীত্প্রত্নমস্য পিতরমা বিবাসতি ॥১৪॥

86.15

সো অস্য বিশে মহি শর্ম যচ্ছতি যো অস্য ধাম প্রথমং ব্যানশে ।
পদং যদস্য পরমে ব্যোমন্যতো বিশ্বা অভি সং যাতি সংয়তঃ ॥১৫॥

86.16

প্রো অয়াসীদিন্দুরিন্দ্রস্য নিষ্কৃতং সখা সখ্যুর্ন প্র মিনাতি সংগিরম্ ।
মর্য ইব যুবতিভিঃ সমর্ষতি সোমঃ কলশে শতয়াম্না পথা ॥১৬॥

86.17

প্র বো ধিয়ো মন্দ্রয়ুবো বিপন্যুবঃ পনস্যুবঃ সংবসনেষ্বক্রমুঃ ।
সোমং মনীষা অভ্যনূষত স্তুভোঽভি ধেনবঃ পয়সেমশিশ্রয়ুঃ ॥১৭॥

86.18

আ নঃ সোম সংয়তং পিপ্যুষীমিষমিন্দো পবস্ব পবমানো অস্রিধম্ ।
যা নো দোহতে ত্রিরহন্নসশ্চুষী ক্ষুমদ্বাজবন্মধুমত্সুবীর্যম্ ॥১৮॥

86.19

বৃষা মতীনাং পবতে বিচক্ষণঃ সোমো অহ্নঃ প্রতরীতোষসো দিবঃ ।
ক্রাণা সিন্ধূনাং কলশাঁ অবীবশদিন্দ্রস্য হার্দ্যাবিশন্মনীষিভিঃ ॥১৯॥

86.20

মনীষিভিঃ পবতে পূর্ব্যঃ কবির্নৃভির্যতঃ পরি কোশাঁ অচিক্রদৎ ।
ত্রিতস্য নাম জনয়ন্মধু ক্ষরদিন্দ্রস্য বায়োঃ সখ্যায় কর্তবে ॥২০॥

86.21

অয়ং পুনান উষসো বি রোচয়দয়ং সিন্ধুভ্যো অভবদু লোককৃৎ ।
অয়ং ত্রিঃ সপ্ত দুদুহান আশিরং সোমো হৃদে পবতে চারু মত্সরঃ ॥২১॥

86.22

পবস্ব সোম দিব্যেষু ধামসু সৃজান ইন্দো কলশে পবিত্র আ ।
সীদন্নিন্দ্রস্য জঠরে কনিক্রদন্নৃভির্যতঃ সূর্যমারোহয়ো দিবি ॥২২॥

86.23

অদ্রিভিঃ সুতঃ পবসে পবিত্র আঁ ইন্দবিন্দ্রস্য জঠরেষ্বাবিশন্ ।
ত্বং নৃচক্ষা অভবো বিচক্ষণ সোম গোত্রমঙ্গিরোভ্যোঽবৃণোরপ ॥২৩॥

86.24

ত্বাং সোম পবমানং স্বাধ্যোঽনু বিপ্রাসো অমদন্নবস্যবঃ ।
ত্বাং সুপর্ণ আভরদ্দিবস্পরীন্দো বিশ্বাভির্মতিভিঃ পরিষ্কৃতম্ ॥২৪॥

86.25

অব্যে পুনানং পরি বার ঊর্মিণা হরিং নবন্তে অভি সপ্ত ধেনবঃ ।
অপামুপস্থে অধ্যায়বঃ কবিমৃতস্য যোনা মহিষা অহেষত ॥২৫॥

86.26

ইন্দুঃ পুনানো অতি গাহতে মৃধো বিশ্বানি কৃণ্বন্ত্সুপথানি যজ্যবে ।
গাঃ কৃণ্বানো নির্ণিজং হর্যতঃ কবিরত্যো ন ক্রীলন্পরি বারমর্ষতি ॥২৬॥

86.27

অসশ্চতঃ শতধারা অভিশ্রিয়ো হরিং নবন্তেঽব তা উদন্যুবঃ ।
ক্ষিপো মৃজন্তি পরি গোভিরাবৃতং তৃতীয়ে পৃষ্ঠে অধি রোচনে দিবঃ ॥২৭॥

86.28

তবেমাঃ প্রজা দিব্যস্য রেতসস্ত্বং বিশ্বস্য ভুবনস্য রাজসি ।
অথেদং বিশ্বং পবমান তে বশে ত্বমিন্দো প্রথমো ধামধা অসি ॥২৮॥

86.29

ত্বং সমুদ্রো অসি বিশ্ববিত্কবে তবেমাঃ পঞ্চ প্রদিশো বিধর্মণি ।
ত্বং দ্যাং চ পৃথিবীং চাতি জভ্রিষে তব জ্যোতীংষি পবমান সূর্যঃ ॥২৯॥

86.30

ত্বং পবিত্রে রজসো বিধর্মণি দেবেভ্যঃ সোম পবমান পূয়সে ।
ত্বামুশিজঃ প্রথমা অগৃভ্ণত তুভ্যেমা বিশ্বা ভুবনানি যেমিরে ॥৩০॥

86.31

প্র রেভ এত্যতি বারমব্যয়ং বৃষা বনেষ্বব চক্রদদ্ধরিঃ ।
সং ধীতয়ো বাবশানা অনূষত শিশুং রিহন্তি মতয়ঃ পনিপ্নতম্ ॥৩১॥

86.32

স সূর্যস্য রশ্মিভিঃ পরি ব্যত তন্তুং তন্বানস্ত্রিবৃতং যথা বিদে ।
নয়ন্নৃতস্য প্রশিষো নবীয়সীঃ পতির্জনীনামুপ যাতি নিষ্কৃতম্ ॥৩২॥

86.33

রাজা সিন্ধূনাং পবতে পতির্দিব ঋতস্য যাতি পথিভিঃ কনিক্রদৎ ।
সহস্রধারঃ পরি ষিচ্যতে হরিঃ পুনানো বাচং জনয়ন্নুপাবসুঃ ॥৩৩॥

86.34

পবমান মহ্যর্ণো বি ধাবসি সূরো ন চিত্রো অব্যয়ানি পব্যয়া ।
গভস্তিপূতো নৃভিরদ্রিভিঃ সুতো মহে বাজায় ধন্যায় ধন্বসি ॥৩৪॥

86.35

ইষমূর্জং পবমানাভ্যর্ষসি শ্যেনো ন বংসু কলশেষু সীদসি ।
ইন্দ্রায় মদ্বা মদ্যো মদঃ সুতো দিবো বিষ্টম্ভ উপমো বিচক্ষণঃ ॥৩৫॥

86.36

সপ্ত স্বসারো অভি মাতরঃ শিশুং নবং জজ্ঞানং জেন্যং বিপশ্চিতম্ ।
অপাং গন্ধর্বং দিব্যং নৃচক্ষসং সোমং বিশ্বস্য ভুবনস্য রাজসে ॥৩৬॥

86.37

ঈশান ইমা ভুবনানি বীয়সে যুজান ইন্দো হরিতঃ সুপর্ণ্যঃ ।
তাস্তে ক্ষরন্তু মধুমদ্ঘৃতং পয়স্তব ব্রতে সোম তিষ্ঠন্তু কৃষ্টয়ঃ ॥৩৭॥

86.38

ত্বং নৃচক্ষা অসি সোম বিশ্বতঃ পবমান বৃষভ তা বি ধাবসি ।
স নঃ পবস্ব বসুমদ্ধিরণ্যবদ্বয়ং স্যাম ভুবনেষু জীবসে ॥৩৮॥

86.39

গোবিত্পবস্ব বসুবিদ্ধিরণ্যবিদ্রেতোধা ইন্দো ভুবনেষ্বর্পিতঃ ।
ত্বং সুবীরো অসি সোম বিশ্ববিত্তং ত্বা বিপ্রা উপ গিরেম আসতে ॥৩৯॥

86.40

উন্মধ্ব ঊর্মির্বননা অতিষ্ঠিপদপো বসানো মহিষো বি গাহতে ।
রাজা পবিত্ররথো বাজমারুহত্সহস্রভৃষ্টির্জয়তি শ্রবো বৃহৎ ॥৪০॥

86.41

স ভন্দনা উদিয়র্তি প্রজাবতীর্বিশ্বায়ুর্বিশ্বাঃ সুভরা অহর্দিবি ।
ব্রহ্ম প্রজাবদ্রয়িমশ্বপস্ত্যং পীত ইন্দবিন্দ্রমস্মভ্যং যাচতাৎ ॥৪১॥

86.42

সো অগ্রে অহ্নাং হরির্হর্যতো মদঃ প্র চেতসা চেতয়তত অনু দ্যুভিঃ ।
দ্বা জনা যাতয়ন্নন্তরীয়তে নরা চ শংসং দৈব্যং চ ধর্তরি ॥৪২॥

86.43

অঞ্জতে ব্যঞ্জতে সমঞ্জতে ক্রতুং রিহন্তি মধুনাভ্যঞ্জতে ।
সিন্ধোরুচ্ছ্বাসে পতয়ন্তমুক্ষণং হিরণ্যপাবাঃ পশুমাসু গৃভ্ণতে ॥৪৩॥

86.44

বিপশ্চিতে পবমানায় গায়ত মহী ন ধারাত্যন্ধো অর্ষতি ।
অহির্ন জূর্ণামতি সর্পতি ত্বচমত্যো ন ক্রীলন্নসরদ্বৃষা হরিঃ ॥৪৪॥

86.45

অগ্রেগো রাজাপ্যস্তবিষ্যতে বিমানো অহ্নাং ভুবনেষ্বর্পিতঃ ।
হরির্ঘৃতস্নুঃ সুদৃশীকো অর্ণবো জ্যোতীরথঃ পবতে রায় ওক্যঃ ॥৪৫॥

86.46

অসর্জি স্কম্ভো দিব উদ্যতো মদঃ পরি ত্রিধাতুর্ভুবনান্যর্ষতি ।
অংশুং রিহন্তি মতয়ঃ পনিপ্নতং গিরা যদি নির্ণিজমৃগ্মিণো যয়ুঃ ॥৪৬॥

86.47

প্র তে ধারা অত্যণ্বানি মেষ্যঃ পুনানস্য সংয়তো যন্তি রংহয়ঃ ।
যদ্গোভিরিন্দো চম্বোঃ সমজ্যস আ সুবানঃ সোম কলশেষু সীদসি ॥৪৭॥

86.48

পবস্ব সোম ক্রতুবিন্ন উক্থ্যোঽব্যো বারে পরি ধাব মধু প্রিয়ম্ ।
জহি বিশ্বান্রক্ষস ইন্দো অত্রিণো বৃহদ্বদেম বিদথে সুবীরাঃ ॥৪৮॥