সূক্ত 85

85.1

১২ বেনো ভার্গবঃ । পবমানঃ সোমঃ ।জগতী , ১১-১২ ত্রিষ্টুপ্ ।

ইন্দ্রায় সোম সুষুতঃ পরি স্রবাঽপামীবা ভবতু রক্ষসা সহ ।
মা তে রসস্য মত্সত দ্বয়াবিনো দ্রবিণস্বন্ত ইহ সন্ত্বিন্দবঃ ॥১॥

85.2

অস্মান্ত্সমর্যে পবমান চোদয় দক্ষো দেবানামসি হি প্রিয়ো মদঃ ।
জহি শত্রূঁরভ্যা ভন্দনায়তঃ পিবেন্দ্র সোমমব নো মৃধো জহি ॥২॥

85.3

অদব্ধ ইন্দো পবসে মদিন্তম আত্মেন্দ্রস্য ভবসি ধাসিরুত্তমঃ ।
অভি স্বরন্তি বহবো মনীষিণো রাজানমস্য ভুবনস্য নিংসতে ॥৩॥

85.4

সহস্রণীথঃ শতধারো অদ্ভুত ইন্দ্রায়েন্দুঃ পবতে কাম্যং মধু ।
জয়ন্ক্ষেত্রমভ্যর্ষা জয়ন্নপ উরুং নো গাতুং কৃণু সোম মীঢ্বঃ ॥৪॥

85.5

কনিক্রদত্কলশে গোভিরজ্যসে ব্য১ব্যয়ং সময়া বারমর্ষসি ।
মর্মৃজ্যমানো অত্যো ন সানসিরিন্দ্রস্য সোম জঠরে সমক্ষরঃ ॥৫॥

85.6

স্বাদুঃ পবস্ব দিব্যায় জন্মনে স্বাদুরিন্দ্রায় সুহবীতুনাম্নে ।
স্বাদুর্মিত্রায় বরুণায় বায়বে বৃহস্পতয়ে মধুমাঁ অদাভ্যঃ ॥৬॥

85.7

অত্যং মৃজন্তি কলশে দশ ক্ষিপঃ প্র বিপ্রাণাং মতয়ো বাচ ঈরতে ।
পবমানা অভ্যর্ষন্তি সুষ্টুতিমেন্দ্রং বিশন্তি মদিরাস ইন্দবঃ ॥৭॥

85.8

পবমানো অভ্যর্ষা সুবীর্যমুর্বীং গব্যূতিং মহি শর্ম সপ্রথঃ ।
মাকির্নো অস্য পরিষূতিরীশতেন্দো জয়েম ত্বয়া ধনংধনম্ ॥৮॥

85.9

অধি দ্যামস্থাদ্বৃষভো বিচক্ষণোঽরূরুচদ্বি দিবো রোচনা কবিঃ ।
রাজা পবিত্রমত্যেতি রোরুবদ্দিবঃ পীয়ূষং দুহতে নৃচক্ষসঃ ॥৯॥

85.10

দিবো নাকে মধুজিহ্বা অসশ্চতো বেনা দুহন্ত্যুক্ষণং গিরিষ্ঠাম্ ।
অপ্সু দ্রপ্সং বাবৃধানং সমুদ্র আ সিন্ধোরূর্মা মধুমন্তং পবিত্র আ ॥১০॥

85.11

নাকে সুপর্ণমুপপপ্তিবাংসং গিরো বেনানামকৃপন্ত পূর্বীঃ ।
শিশুং রিহন্তি মতয়ঃ পনিপ্নতং হিরণ্যয়ং শকুনং ক্ষামণি স্থাম্ ॥১১॥

85.12

ঊর্ধ্বো গন্ধর্বো অধি নাকে অস্থাদ্বিশ্বা রূপা প্রতিচক্ষাণো অস্য ।
ভানুঃ শুক্রেণ শোচিষা ব্যদ্যৌত্প্রারূরুচদ্রোদসী মাতরা শুচিঃ ॥১২॥