সূক্ত 72

72.1

৯ হরিমন্ত আঙ্গিরসঃ । পবমানঃ সোমঃ ।জগতী ।

হরিং মৃজন্ত্যরুষো ন যুজ্যতে সং ধেনুভিঃ কলশে সোমো অজ্যতে ।
উদ্বাচমীরয়তি হিন্বতে মতী পুরুষ্টুতস্য কতি চিত্পরিপ্রিয়ঃ ॥১॥

72.2

সাকং বদন্তি বহবো মনীষিণ ইন্দ্রস্য সোমং জঠরে যদাদুহুঃ ।
যদী মৃজন্তি সুগভস্তয়ো নরঃ সনীলাভির্দশভিঃ কাম্যং মধু ॥২॥

72.3

অরমমাণো অত্যেতি গা অভি সূর্যস্য প্রিয়ং দুহিতুস্তিরো রবম্ ।
অন্বস্মৈ জোষমভরদ্বিনংগৃসঃ সং দ্বয়ীভিঃ স্বসৃভিঃ ক্ষেতি জামিভিঃ ॥৩॥

72.4

নৃধূতো অদ্রিষুতো বর্হিষি প্রিয়ঃ পতির্গবাং প্রদিব ইন্দুৠত্বিয়ঃ ।
পুরংধিবান্মনুষো যজ্ঞসাধনঃ শুচির্ধিয়া পবতে সোম ইন্দ্র তে ॥৪॥

72.5

নৃবাহুভ্যাং চোদিতো ধারয়া সুতোঽনুষ্বধং পবতে সোম ইন্দ্র তে ।
আপ্রাঃ ক্রতূন্ত্সমজৈরধ্বরে মতীর্বের্ন দ্রুষচ্চম্বো৩রাসদদ্ধরিঃ ॥৫॥

72.6

অংশুং দুহন্তি স্তনয়ন্তমক্ষিতং কবিং কবয়োঽপসো মনীষিণঃ ।
সমী গাবো মতয়ো যন্তি সংয়ত ঋতস্য যোনা সদনে পুনর্ভুবঃ ॥৬॥

72.7

নাভা পৃথিব্যা ধরুণো মহো দিবো৩ঽপামূর্মৌ সিন্ধুষ্বন্তরুক্ষিতঃ ।
ইন্দ্রস্য বজ্রো বৃষভো বিভূবসুঃ সোমো হৃদে পবতে চারু মত্সরঃ ॥৭॥

72.8

স তূ পবস্ব পরি পার্থিবং রজঃ স্তোত্রে শিক্ষন্নাধূন্বতে চ সুক্রতো ।
মা নো নির্ভাগ্বসুনঃ সাদনস্পৃশো রয়িং পিশঙ্গং বহুলং বসীমহি ॥৮॥

72.9

আ তূ ন ইন্দো শতদাত্বশ্ব্যং সহস্রদাতু পশুমদ্ধিরণ্যবৎ ।
উপ মাস্ব বৃহতী রেবতীরিষোঽধি স্তোত্রস্য পবমান নো গহি ॥৯॥