সূক্ত 67

67.1

(১-৩২) ১-৩ ভরদ্বাজো বার্হস্পত্যঃ, ৪-৬ কশ্যপো মারীচঃ, ৭-৯ গোতমো রাহূগণঃ, ১০-১২ অত্রির্ভৌমঃ, ১৩-১৫ বিশ্বামিত্রো গাথিনঃ, ১৬-১৮ জমদগ্নির্ভার্গবঃ, ১৯-২১ বসিষ্ঠো মৈত্রাবরুণিঃ,২২-৩২ পবিত্র আঙ্গিরসো বা বসিষ্ঠো বা উভৌ বা । পবমানঃ সোমঃ, ১০-১২ পবমানঃ পূষা বা, ২৩-২৭ পবমানোঽগ্নিঃ, ২৫ পবমানঃ সবিতা বা, ২৬ পবমানাগ্নিসবিতারঃ, ২৭ বিশ্বে দেবা বা , ৩১-৩২ পবমান্যধ্যেতা ।গায়ত্রী, ১৬ -১৮ নিত্যদ্বিপদা গায়ত্রী , ৩০ পুরউষ্ণিক্; ২৭ ,৩১ ,৩২, অনুষ্টুপ্ ।

ত্বং সোমাসি ধারয়ুর্মন্দ্র ওজিষ্ঠো অধ্বরে । পবস্ব মংহয়দ্রয়িঃ ॥১॥

67.2

ত্বং সুতো নৃমাদনো দধন্বান্মত্সরিন্তমঃ । ইন্দ্রায় সূরিরন্ধসা ॥২॥

67.3

ত্বং সুষ্বাণো অদ্রিভিরভ্যর্ষ কনিক্রদৎ । দ্যুমন্তং শুষ্মমুত্তমম্ ॥৩॥

67.4

ইন্দুর্হিন্বানো অর্ষতি তিরো বারাণ্যব্যয়া । হরির্বাজমচিক্রদৎ ॥৪॥

67.5

ইন্দো ব্যব্যমর্ষসি বি শ্রবাংসি বি সৌভগা । বি বাজান্ত্সোম গোমতঃ ॥৫॥

67.6

আ ন ইন্দো শতগ্বিনং রয়িং গোমন্তমশ্বিনম্ । ভরা সোম সহস্রিণম্ ॥৬॥

67.7

পবমানাস ইন্দবস্তিরঃ পবিত্রমাশবঃ । ইন্দ্রং যামেভিরাশত ॥৭॥

67.8

ককুহঃ সোম্যো রস ইন্দুরিন্দ্রায় পূর্ব্যঃ । আয়ুঃ পবত আয়বে ॥৮॥

67.9

হিন্বন্তি সূরমুস্রয়ঃ পবমানং মধুশ্চুতম্ । অভি গিরা সমস্বরন্ ॥৯॥

67.10

অবিতা নো অজাশ্বঃ পূষা যামনিয়ামনি । আ ভক্ষত্কন্যাসু নঃ ॥১০॥

67.11

অয়ং সোমঃ কপর্দিনে ঘৃতং ন পবতে মধু । আ ভক্ষত্কন্যাসু নঃ ॥১১॥

67.12

অয়ং ত আঘৃণে সুতো ঘৃতং ন পবতে শুচি । আ ভক্ষত্কন্যাসু নঃ ॥১২॥

67.13

বাচো জন্তুঃ কবীনাং পবস্ব সোম ধারয়া । দেবেষু রত্নধা অসি ॥১৩॥

67.14

আ কলশেষু ধাবতি শ্যেনো বর্ম বি গাহতে । অভি দ্রোণা কনিক্রদৎ ॥১৪॥

67.15

পরি প্র সোম তে রসোঽসর্জি কলশে সুতঃ । শ্যেনো ন তক্তো অর্ষতি ॥১৫॥

67.16

পবস্ব সোম মন্দয়ন্নিন্দ্রায় মধুমত্তমঃ ॥১৬॥

67.17

অসৃগ্রন্দেববীতয়ে বাজয়ন্তো রথা ইব ॥১৭॥

67.18

তে সুতাসো মদিন্তমাঃ শুক্রা বায়ুমসৃক্ষত ॥১৮॥

67.19

গ্রাব্ণা তুন্নো অভিষ্টুতঃ পবিত্রং সোম গচ্ছসি । দধত্স্তোত্রে সুবীর্যম্ ॥১৯॥

67.20

এষ তুন্নো অভিষ্টুতঃ পবিত্রমতি গাহতে । রক্ষোহা বারমব্যয়ম্ ॥২০॥

67.21

যদন্তি যচ্চ দূরকে ভয়ং বিন্দতি মামিহ । পবমান বি তজ্জহি ॥২১॥

67.22

পবমানঃ সো অদ্য নঃ পবিত্রেণ বিচর্ষণিঃ । যঃ পোতা স পুনাতু নঃ ॥২২॥

67.23

যত্তে পবিত্রমর্চিষ্যগ্নে বিততমন্তরা । ব্রহ্ম তেন পুনীহি নঃ ॥২৩॥

67.24

যত্তে পবিত্রমর্চিবদগ্নে তেন পুনীহি নঃ । ব্রহ্মসবৈঃ পুনীহি নঃ ॥২৪॥

67.25

উভাভ্যাং দেব সবিতঃ পবিত্রেণ সবেন চ । মাং পুনীহি বিশ্বতঃ ॥২৫॥

67.26

ত্রিভিষ্ট্বং দেব সবিতর্বর্ষিষ্ঠৈঃ সোম ধামভিঃ । অগ্নে দক্ষৈঃ পুনীহি নঃ ॥২৬॥

67.27

পুনন্তু মাং দেবজনাঃ পুনন্তু বসবো ধিয়া । বিশ্বে দেবাঃ পুনীত মা জাতবেদঃ পুনীহি মা ॥২৭॥

67.28

প্র প্যায়স্ব প্র স্যন্দস্ব সোম বিশ্বেভিরংশুভিঃ । দেবেভ্য উত্তমং হবিঃ ॥২৮॥

67.29

উপ প্রিয়ং পনিপ্নতং যুবানমাহুতীবৃধম্ । অগন্ম বিভ্রতো নমঃ ॥২৯॥

67.30

অলায্যস্য পরশুর্ননাশ তমা পবস্ব দেব সোম । আখুং চিদেব দেব সোম ॥৩০॥

67.31

যঃ পাবমানীরধ্যেত্যৃষিভিঃ সম্ভৃতং রসম্ । সর্বং স পূতমশ্নাতি স্বদিতং মাতরিশ্বনা ॥৩১॥

67.32

পাবমানীর্যো অধ্যেত্যৃষিভিঃ সম্ভৃতং রসম্ । তস্মৈ সরস্বতী দুহে ক্ষীরং সর্পির্মধূদকম্ ॥৩২॥