সূক্ত 14

14.1

৮ কাশ্যপোঽসিতো দেবলো বা । পবমানঃ সোমঃ । গায়ত্রী ।

পরি প্রাসিষ্যদত্কবিঃ সিন্ধোরূর্মাবধি শ্রিতঃ । কারং বিভ্রত্পুরুস্পৃহম্ ॥১॥

14.2

গিরা যদী সবন্ধবঃ পঞ্চ ব্রাতা অপস্যবঃ । পরিষ্কৃণ্বন্তি ধর্ণসিম্ ॥২॥

14.3

আদস্য শুষ্মিণো রসে বিশ্বে দেবা অমত্সত । যদী গোভির্বসায়তে ॥৩॥

14.4

নিরিণানো বি ধাবতি জহচ্ছর্যাণি তান্বা । অত্রা সং জিঘ্নতে যুজা ॥৪॥

14.5

নপ্তীভির্যো বিবস্বতঃ শুভ্রো ন মামৃজে যুবা । গাঃ কৃণ্বানো ন নির্ণিজম্ ॥৫॥

14.6

অতি শ্রিতী তিরশ্চতা গব্যা জিগাত্যণ্ব্যা । বগ্নুমিয়র্তি যং বিদে ॥৬॥

14.7

অভি ক্ষিপঃ সমগ্মত মর্জয়ন্তীরিষস্পতিম্ । পৃষ্ঠা গৃভ্ণত বাজিনঃ ॥৭॥

14.8

পরি দিব্যানি মর্মৃশদ্বিশ্বানি সোম পার্থিবা । বসূনি যাহ্যস্ময়ুঃ ॥৮॥