সূক্ত 113

113.1

১১ কশ্যপো মারীচঃ । পবমানঃ সোমঃ । পঙ্ক্তিঃ ।

শর্যণাবতি সোমমিন্দ্রঃ পিবতু বৃত্রহা ।
বলং দধান আত্মনি করিষ্যন্বীর্যং মহদিন্দ্রায়েন্দো পরি স্রব ॥১॥

113.2

আ পবস্ব দিশাং পত আর্জীকাত্সোম মীঢ্বঃ ।
ঋতবাকেন সত্যেন শ্রদ্ধয়া তপসা সুত ইন্দ্রায়েন্দো পরি স্রব ॥২॥

113.3

পর্জন্যবৃদ্ধং মহিষং তং সূর্যস্য দুহিতাভরৎ ।
তং গন্ধর্বাঃ প্রত্যগৃভ্ণন্তং সোমে রসমাদধুরিন্দ্রায়েন্দো পরি স্রব ॥৩॥

113.4

ঋতং বদন্নৃতদ্যুম্ন সত্যং বদন্ত্সত্যকর্মন্ ।
শ্রদ্ধাং বদন্ত্সোম রাজন্ধাত্রা সোম পরিষ্কৃত ইন্দ্রায়েন্দো পরি স্রব ॥৪॥

113.5

সত্যমুগ্রস্য বৃহতঃ সং স্রবন্তি সংস্রবাঃ ।
সং যন্তি রসিনো রসাঃ পুনানো ব্রহ্মণা হর ইন্দ্রায়েন্দো পরি স্রব ॥৫॥

113.6

যত্র ব্রহ্মা পবমান ছন্দস্যাং৩ বাচং বদন্ ।
গ্রাব্ণা সোমে মহীয়তে সোমেনানন্দং জনয়ন্নিন্দ্রায়েন্দো পরি স্রব ॥৬॥

113.7

যত্র জ্যোতিরজস্রং যস্মিঁল্লোকে স্বর্হিতম্ ।
তস্মিন্মাং ধেহি পবমানাঽমৃতে লোকে অক্ষিত ইন্দ্রায়েন্দো পরি স্রব ॥৭॥

113.8

যত্র রাজা বৈবস্বতো যত্রাবরোধনং দিবঃ ।
যত্রামূর্যহ্বতীরাপস্তত্র মামমৃতং কৃধীন্দ্রায়েন্দো পরি স্রব ॥৮॥

113.9

যত্রানুকামং চরণং ত্রিনাকে ত্রিদিবে দিবঃ ।
লোকা যত্র জ্যোতিষ্মন্তস্তত্র মামমৃতং কৃধীন্দ্রায়েন্দো পরি স্রব ॥৯॥

113.10

যত্র কামা নিকামাশ্চ যত্র ব্রধ্নস্য বিষ্টপম্ ।
স্বধা চ যত্র তৃপ্তিশ্চ তত্র মামমৃতং কৃধীন্দ্রায়েন্দো পরি স্রব ॥১০॥

113.11

যত্রানন্দাশ্চ মোদাশ্চ মুদঃ প্রমুদ আসতে ।
কামস্য যত্রাপ্তাঃ কামাস্তত্র মামমৃতং কৃধীন্দ্রায়েন্দো পরি স্রব ॥১১॥