সূক্ত 101

101.1

(১৬) ১-৩অন্ধীগুঃ শ্যাবাশ্বিঃ,৪-৬ যায়াতির্নাহুষঃ,৭-৯ নহুষো মানবঃ,১০-১২ মনুঃ সাংবরণঃ, ১৩-১৬ বৈশ্বামিত্রো বাচ্যো বা প্রজাপতিঃ । পবমানঃ সোমঃ । অনুষ্টুপ্ , ২-৩ গায়ত্রী ।

পুরোজিতী বো অন্ধসঃ সুতায় মাদয়িত্নবে । অপ শ্বানং শ্নথিষ্টন সখায়ো দীর্ঘজিহ্ব্যম্ ॥১॥

101.2

যো ধারয়া পাবকয়া পরিপ্রস্যন্দতে সুতঃ । ইন্দুরশ্বো ন কৃত্ব্যঃ ॥২॥

101.3

তং দুরোষমভী নরঃ সোমং বিশ্বাচ্যা ধিয়া । যজ্ঞং হিন্বন্ত্যদ্রিভিঃ ॥৩॥

101.4

সুতাসো মধুমত্তমাঃ সোমা ইন্দ্রায় মন্দিনঃ । পবিত্রবন্তো অক্ষরন্দেবান্গচ্ছন্তু বো মদাঃ ॥৪॥

101.5

ইন্দুরিন্দ্রায় পবত ইতি দেবাসো অব্রুবন্ । বাচস্পতির্মখস্যতে বিশ্বস্যেশান ওজসা ॥৫॥

101.6

সহস্রধারঃ পবতে সমুদ্রো বাচমীঙ্খয়ঃ । সোমঃ পতী রয়ীণাং সখেন্দ্রস্য দিবেদিবে ॥৬॥

101.7

অয়ং পূষা রয়ির্ভগঃ সোমঃ পুনানো অর্ষতি । পতির্বিশ্বস্য ভূমনো ব্যখ্যদ্রোদসী উভে ॥৭॥

101.8

সমু প্রিয়া অনূষত গাবো মদায় ঘৃষ্বয়ঃ । সোমাসঃ কৃণ্বতে পথঃ পবমানাস ইন্দবঃ ॥৮॥

101.9

য ওজিষ্ঠস্তমা ভর পবমান শ্রবায্যম্ । যঃ পঞ্চ চর্ষণীরভি রয়িং যেন বনামহৈ ॥৯॥

101.10

সোমাঃ পবন্ত ইন্দবোঽস্মভ্যং গাতুবিত্তমাঃ । মিত্রাঃ সুবানা অরেপসঃ স্বাধ্যঃ স্বর্বিদঃ ॥১০॥

101.11

সুষ্বাণাসো ব্যদ্রিভিশ্চিতানা গোরধি ত্বচি । ইষমস্মভ্যমভিতঃ সমস্বরন্বসুবিদঃ ॥১১॥

101.12

এতে পূতা বিপশ্চিতঃ সোমাসো দধ্যাশিরঃ । সূর্যাসো ন দর্শতাসো জিগত্নবো ধ্রুবা ঘৃতে ॥১২॥

101.13

প্র সুন্বানস্যান্ধসো মর্তো ন বৃত তদ্বচঃ । অপ শ্বানমরাধসং হতা মখং ন ভৃগবঃ ॥১৩॥

101.14

আ জামিরত্কে অব্যত ভুজে ন পুত্র ওণ্যোঃ । সরজ্জারো ন যোষণাং বরো ন যোনিমাসদম্ ॥১৪॥

101.15

স বীরো দক্ষসাধনো বি যস্তস্তম্ভ রোদসী । হরিঃ পবিত্রে অব্যত বেধা ন যোনিমাসদম্ ॥১৫॥

101.16

অব্যো বারেভিঃ পবতে সোমো গব্যে অধি ত্বচি । কনিক্রদদ্বৃষা হরিরিন্দ্রস্যাভ্যেতি নিষ্কৃতম্ ॥১৬॥