সূক্ত 35

35.1

২৪ শ্যাবাশ্ব আত্রেয়ঃ । অশ্বিনৌ । উপরিষ্টাজ্জ্যোতিঃ ( ত্রিষ্টুপ্ ), ২২, ২৪ পংক্তিঃ, ২৩ মহাবৃহতী ।

অগ্নিনেন্দ্রেণ বরুণেন বিষ্ণুনাঽঽদিত্যৈ রুদ্রৈর্বসুভিঃ সচাভুবা ।
সজোষসা উষসা সূর্যেণ চ সোমং পিবতমশ্বিনা ॥১॥

35.2

বিশ্বাভির্ধীভির্ভুবনেন বাজিনা দিবা পৃথিব্যাদ্রিভিঃ সচাভুবা ।
সজোষসা উষসা সূর্যেণ চ সোমং পিবতমশ্বিনা ॥২॥

35.3

বিশ্বৈর্দেবৈস্ত্রিভিরেকাদশৈরিহাঽদ্ভির্মরুদ্ভির্ভৃগুভিঃ সচাভুবা ।
সজোষসা উষসা সূর্যেণ চ সোমং পিবতমশ্বিনা ॥৩॥

35.4

জুষেথাং যজ্ঞং বোধতং হবস্য মে বিশ্বেহ দেবৌ সবনাব গচ্ছতম্ ।
সজোষসা উষসা সূর্যেণ চেষং নো বোল্হমশ্বিনা ॥৪॥

35.5

স্তোমং জুষেথাং যুবশেব কন্যনাং বিশ্বেহ দেবৌ সবনাব গচ্ছতম্ ।
সজোষসা উষসা সূর্যেণ চেষং নো বোল্হমশ্বিনা ॥৫॥

35.6

গিরো জুষেথামধ্বরং জুষেথাং বিশ্বেহ দেবৌ সবনাব গচ্ছতম্ ।
সজোষসা উষসা সূর্যেণ চেষং নো বোল্হমশ্বিনা ॥৬॥

35.7

হারিদ্রবেব পতথো বনেদুপ সোমং সুতং মহিষেবাব গচ্ছথঃ ।
সজোষসা উষসা সূর্যেণ চ ত্রির্বর্তির্যাতমশ্বিনা ॥৭॥

35.8

হংসাবিব পতথো অধ্বগাবিব সোমং সুতং মহিষেবাব গচ্ছথঃ ।
সজোষসা উষসা সূর্যেণ চ ত্রির্বর্তির্যাতমশ্বিনা ॥৮॥

35.9

শ্যেনাবিব পতথো হব্যদাতয়ে সোমং সুতং মহিষেবাব গচ্ছথঃ ।
সজোষসা উষসা সূর্যেণ চ ত্রির্বর্তির্যাতমশ্বিনা ॥৯॥

35.10

পিবতং চ তৃপ্ণুতং চা চ গচ্ছতং প্রজাং চ ধত্তং দ্রবিণং চ ধত্তম্ ।
সজোষসা উষসা সূর্যেণ চোর্জং নো ধত্তমশ্বিনা ॥১০॥

35.11

জয়তং চ প্র স্তুতং চ প্র চাবতং প্রজাং চ ধত্তং দ্রবিণং চ ধত্তম্ ।
সজোষসা উষসা সূর্যেণ চোর্জং নো ধত্তমশ্বিনা ॥১১॥

35.12

হতং চ শত্রূন্যততং চ মিত্রিণঃ প্রজাং চ ধত্তং দ্রবিণং চ ধত্তম্ ।
সজোষসা উষসা সূর্যেণ চোর্জং নো ধত্তমশ্বিনা ॥১২॥

35.13

মিত্রাবরুণবন্তা উত ধর্মবন্তা মরুত্বন্তা জরিতুর্গচ্ছথো হবম্ ।
সজোষসা উষসা সূর্যেণ চাঽঽদিত্যৈর্যাতমশ্বিনা ॥১৩॥

35.14

অঙ্গিরস্বন্তা উত বিষ্ণুবন্তা মরুত্বন্তা জরিতুর্গচ্ছথো হবম্ ।
সজোষসা উষসা সূর্যেণ চাঽঽদিত্যৈর্যাতমশ্বিনা ॥১৪॥

35.15

ঋভুমন্তা বৃষণা বাজবন্তা মরুত্বন্তা জরিতুর্গচ্ছথো হবম্ ।
সজোষসা উষসা সূর্যেণ চাঽঽদিত্যৈর্যাতমশ্বিনা ॥১৫॥

35.16

ব্রহ্ম জিন্বতমুত জিন্বতং ধিয়ো হতং রক্ষাংসি সেধতমমীবাঃ ।
সজোষসা উষসা সূর্যেণ চ সোমং সুন্বতো অশ্বিনা ॥১৬॥

35.17

ক্ষত্রং জিন্বতমুত জিন্বতং নৄন্হতং রক্ষাংসি সেধতমমীবাঃ ।
সজোষসা উষসা সূর্যেণ চ সোমং সুন্বতো অশ্বিনা ॥১৭॥

35.18

ধেনূর্জিন্বতমুত জিন্বতং বিশো হতং রক্ষাংসি সেধতমমীবাঃ ।
সজোষসা উষসা সূর্যেণ চ সোমং সুন্বতো অশ্বিনা ॥১৮॥

35.19

অত্রেরিব শৃণুতং পূর্ব্যস্তুতিং শ্যাবাশ্বস্য সুন্বতো মদচ্যুতা ।
সজোষসা উষসা সূর্যেণ চাশ্বিনা তিরোঅহ্ন্যম্ ॥১৯॥

35.20

সর্গাঁ ইব সৃজতং সুষ্টুতীরুপ শ্যাবাশ্বস্য সুন্বতো মদচ্যুতা ।
সজোষসা উষসা সূর্যেণ চাঽশ্বিনা তিরোঅহ্ন্যম্ ॥২০॥

35.21

রশ্মীঁরিব যচ্ছতমধ্বরাঁ উপ শ্যাবাশ্বস্য সুন্বতো মদচ্যুতা ।
সজোষসা উষসা সূর্যেণ চাঽশ্বিনা তিরোঅহ্ন্যম্ ॥২১॥

35.22

অর্বাগ্রথং নি যচ্ছতং পিবতং সোম্যং মধু ।
আ যাতমশ্বিনা গতমবস্যুর্বামহং হুবে ধত্তং রত্নানি দাশুষে ॥২২॥

35.23

নমোবাকে প্রস্থিতে অধ্বরে নরা বিবক্ষণস্য পীতয়ে ।
আ যাতমশ্বিনা গতমবস্যুর্বামহং হুবে ধত্তং রত্নানি দাশুষে ॥২৩॥

35.24

স্বাহাকৃতস্য তৃম্পতং সুতস্য দেবাবন্ধসঃ ।
আ যাতমশ্বিনা গতমবস্যুর্বামহং হুবে ধত্তং রত্নানি দাশুষে ॥২৪॥