সূক্ত 90

90.1

৭ মৈত্রাবরুণির্বসিষ্ঠঃ। বায়ুঃ, ৫ -৭ ইন্দ্রবায়ূ। ত্রিষ্টুপ্ ।

প্র বীরয়া শুচয়ো দদ্রিরে বামধ্বর্যুভির্মধুমন্তঃ সুতাসঃ ।
বহ বায়ো নিয়ুতো যাহ্যচ্ছা পিবা সুতস্যান্ধসো মদায় ॥১॥

90.2

ঈশানায় প্রহুতিং যস্ত আনট্ শুচিং সোমং শুচিপাস্তুভ্যং বায়ো ।
কৃণোষি তং মর্ত্যেষু প্রশস্তং জাতোজাতো জায়তে বাজ্যস্য ॥২॥

90.3

রায়ে নু যং জজ্ঞতূ রোদসীমে রায়ে দেবী ধিষণা ধাতি দেবম্ ।
অধ বায়ুং নিয়ুতঃ সশ্চত স্বা উত শ্বেতং বসুধিতিং নিরেকে ॥৩॥

90.4

উচ্ছন্নুষসঃ সুদিনা অরিপ্রা উরু জ্যোতির্বিবিদুর্দীধ্যানাঃ ।
গব্যং চিদূর্বমুশিজো বি বব্রুস্তেষামনু প্রদিবঃ সস্রুরাপঃ ॥৪॥

90.5

তে সত্যেন মনসা দীধ্যানাঃ স্বেন যুক্তাসঃ ক্রতুনা বহন্তি ।
ইন্দ্রবায়ূ বীরবাহং রথং বামীশানয়োরভি পৃক্ষঃ সচন্তে ॥৫॥

90.6

ঈশানাসো যে দধতে স্বর্ণো গোভিরশ্বেভির্বসুভির্হিরণ্যৈঃ ।
ইন্দ্রবায়ূ সূরয়ো বিশ্বমায়ুরর্বদ্ভির্বীরৈঃ পৃতনাসু সহ্যুঃ ॥৬॥

90.7

অর্বন্তো ন শ্রবসো ভিক্ষমাণা ইন্দ্রবায়ূ সুষ্টুতিভির্বসিষ্ঠাঃ ।
বাজয়ন্তঃ স্ববসে হুবেম যূয়ং পাত স্বস্তিভিঃ সদা নঃ ॥৭॥