সূক্ত 88

88.1

৭ মৈত্রাবরুণির্বসিষ্ঠঃ। বরুণঃ, ( ৭ পাশবিমোচনী) । ত্রিষ্টুপ্ ।

প্র শুন্ধ্যুবং বরুণায় প্রেষ্ঠাং মতিং বসিষ্ঠ মীল্হুষে ভরস্ব ।
য ঈমর্বাঞ্চং করতে যজত্রং সহস্রামঘং বৃষণং বৃহন্তম্ ॥১॥

88.2

অধা ন্বস্য সংদৃশং জগন্বানগ্নেরনীকং বরুণস্য মংসি ।
স্ব১র্যদশ্মন্নধিপা উ অন্ধোঽভি মা বপুর্দৃশয়ে নিনীয়াৎ ॥২॥

88.3

আ যদ্রুহাব বরুণশ্চ নাবং প্র যত্সমুদ্রমীরয়াব মধ্যম্ ।
অধি যদপাং স্নুভিশ্চরাব প্র প্রেঙ্খ ঈঙ্খয়াবহৈ শুভে কম্ ॥৩॥

88.4

বসিষ্ঠং হ বরুণো নাব্যাধাদৃষিং চকার স্বপা মহোভিঃ ।
স্তোতারং বিপ্রঃ সুদিনত্বে অহ্নাং যান্নু দ্যাবস্ততনন্যাদুষাসঃ ॥৪॥

88.5

ক্ব১ ত্যানি নৌ সখ্যা বভূবুঃ সচাবহে যদবৃকং পুরা চিৎ ।
বৃহন্তং মানং বরুণ স্বধাবঃ সহস্রদ্বারং জগমা গৃহং তে ॥৫॥

88.6

য আপির্নিত্যো বরুণ প্রিয়ঃ সন্ত্বামাগাংসি কৃণবত্সখা তে ।
মা ত এনস্বন্তো যক্ষিন্ভুজেম যন্ধি ষ্মা বিপ্রঃ স্তুবতে বরূথম্ ॥৬॥

88.7

ধ্রুবাসু ত্বাসু ক্ষিতিষু ক্ষিয়ন্তো ব্য১স্মত্পাশং বরুণো মুমোচৎ ।
অবো বন্বানা অদিতেরুপস্থাদ্যূয়ং পাত স্বস্তিভিঃ সদা নঃ ॥৭॥