সূক্ত 16

16.1

১২ মৈত্রাবরুণির্বসিষ্ঠঃ। অগ্নিঃ । প্রগাথঃ (=বিষমা বৃহতী , সমা সতোবৃহতী ) ।

এনা বো অগ্নিং নমসোর্জো নপাতমা হুবে । প্রিয়ং চেতিষ্ঠমরতিং স্বধ্বরং বিশ্বস্য দূতমমৃতম্ ॥১॥

স যোজতে অরুষা বিশ্বভোজসা স দুদ্রবত্স্বাহুতঃ ।
সুব্রহ্মা যজ্ঞঃ সুশমী বসূনাং দেবং রাধো জনানাম্ ॥২॥

উদস্য শোচিরস্থাদাজুহ্বানস্য মীল্হুষঃ ।
উদ্ধূমাসো অরুষাসো দিবিস্পৃশঃ সমগ্নিমিন্ধতে নরঃ ॥৩॥

তং ত্বা দূতং কৃণ্মহে যশস্তমং দেবাঁ আ বীতয়ে বহ ।
বিশ্বা সূনো সহসো মর্তভোজনা রাস্ব তদ্যত্ত্বেমহে ॥৪॥

ত্বমগ্নে গৃহপতিস্ত্বং হোতা নো অধ্বরে । ত্বং পোতা বিশ্ববার প্রচেতা যক্ষি বেষি চ বার্যম্ ॥৫॥

কৃধি রত্নং যজমানায় সুক্রতো ত্বং হি রত্নধা অসি ।
আ ন ঋতে শিশীহি বিশ্বমৃত্বিজং সুশংসো যশ্চ দক্ষতে ॥৬॥

ত্বে অগ্নে স্বাহুত প্রিয়াসঃ সন্তু সূরয়ঃ । যন্তারো যে মঘবানো জনানামূর্বান্দয়ন্ত গোনাম্ ॥৭॥

যেষামিলা ঘৃতহস্তা দুরোণ আঁ অপি প্রাতা নিষীদতি ।
তাঁস্ত্রায়স্ব সহস্য দ্রুহো নিদো যচ্ছা নঃ শর্ম দীর্ঘশ্রুৎ ॥৮॥

স মন্দ্রয়া চ জিহ্বয়া বহ্নিরাসা বিদুষ্টরঃ । অগ্নে রয়িং মঘবদ্ভ্যো ন আ বহ হব্যদাতিং চ সূদয় ॥৯॥

যে রাধাংসি দদত্যশ্ব্যা মঘা কামেন শ্রবসো মহঃ । তাঁ অংহসঃ পিপৃহি পর্তৃভিষ্ট্বং শতং পূর্ভির্যবিষ্ঠ্য ॥১০॥

দেবো বো দ্রবিণোদাঃ পূর্ণাং বিবষ্ট্যাসিচম্ । উদ্বা সিঞ্চধ্বমুপ বা পৃণধ্বমাদিদ্বো দেব ওহতে ॥১১॥

তং হোতারমধ্বরস্য প্রচেতসং বহ্নিং দেবা অকৃণ্বত । দধাতি রত্নং বিধতে সুবীর্যমগ্নির্জনায় দাশুষে ॥১২॥