সূক্ত 15

15.1

১৫ মৈত্রাবরুণির্বসিষ্ঠঃ। অগ্নিঃ ।গায়ত্রী ।

উপসদ্যায় মীল্হুষ আস্যে জুহুতা হবিঃ । যো নো নেদিষ্ঠমাপ্যম্ ॥১॥

যঃ পঞ্চ চর্ষণীরভি নিষসাদ দমেদমে । কবির্গৃহপতির্যুবা ॥২॥

স নো বেদো অমাত্যমগ্নী রক্ষতু বিশ্বতঃ । উতাস্মান্পাত্বংহসঃ ॥৩॥

নবং নু স্তোমমগ্নয়ে দিবঃ শ্যেনায় জীজনম্ । বস্বঃ কুবিদ্বনাতি নঃ ॥৪॥

স্পার্হা যস্য শ্রিয়ো দৃশে রয়ির্বীরবতো যথা । অগ্রে যজ্ঞস্য শোচতঃ ॥৫॥

সেমাং বেতু বষট্কৃতিমগ্নির্জুষত নো গিরঃ । যজিষ্ঠো হব্যবাহনঃ ॥৬॥

নি ত্বা নক্ষ্য বিশ্পতে দ্যুমন্তং দেব ধীমহি । সুবীরমগ্ন আহুত ॥৭॥

ক্ষপ উস্রশ্চ দীদিহি স্বগ্নয়স্ত্বয়া বয়ম্ । সুবীরস্ত্বমস্ময়ুঃ ॥৮॥

উপ ত্বা সাতয়ে নরো বিপ্রাসো যন্তি ধীতিভিঃ । উপাক্ষরা সহস্রিণী ॥৯॥

অগ্নী রক্ষাংসি সেধতি শুক্রশোচিরমর্ত্যঃ । শুচিঃ পাবক ঈড্যঃ ॥১০॥

স নো রাধাংস্যা ভরেশানঃ সহসো যহো । ভগশ্চ দাতু বার্যম্ ॥১১॥

ত্বমগ্নে বীরবদ্যশো দেবশ্চ সবিতা ভগঃ । দিতিশ্চ দাতি বার্যম্ ॥১২॥

অগ্নে রক্ষা ণো অংহসঃ প্রতি ষ্ম দেব রীষতঃ । তপিষ্ঠৈরজরো দহ ॥১৩॥

অধা মহী ন আয়স্যনাধৃষ্টো নৃপীতয়ে । পূর্ভবা শতভুজিঃ ॥১৪॥

ত্বং নঃ পাহ্যংহসো দোষাবস্তরঘায়তঃ । দিবা নক্তমদাভ্য ॥১৫॥