সূক্ত 62

62.1

১১ বার্হস্পত্যো ভরদ্বাজঃ ।অশ্বিনৌ । ত্রিষ্টুপ্ ।

স্তুষে নরা দিবো অস্য প্রসন্তাঽশ্বিনা হুবে জরমাণো অর্কৈঃ ।
যা সদ্য উস্রা ব্যুষি জ্মো অন্তান্যুয়ূষতঃ পর্যুরূ বরাংসি ॥১॥

62.2

তা যজ্ঞমা শুচিভিশ্চক্রমাণা রথস্য ভানুং রুরুচূ রজোভিঃ ।
পুরূ বরাংস্যমিতা মিমানাঽপো ধন্বান্যতি যাথো অজ্রান্ ॥২॥

62.3

তা হ ত্যদ্বর্তির্যদরধ্রমুগ্রেত্থা ধিয় ঊহথুঃ শশ্বদশ্বৈঃ ।
মনোজবেভিরিষিরৈঃ শয়ধ্যৈ পরি ব্যথির্দাশুষো মর্ত্যস্য ॥৩॥

62.4

তা নব্যসো জরমাণস্য মন্মোপ ভূষতো যুয়ুজানসপ্তী ।
শুভং পৃক্ষমিষমূর্জং বহন্তা হোতা যক্ষত্প্রত্নো অধ্রুগ্যুবানা ॥৪॥

62.5

তা বল্গূ দস্রা পুরুশাকতমা প্রত্না নব্যসা বচসা বিবাসে ।
যা শংসতে স্তুবতে শম্ভবিষ্ঠা বভূবতুর্গৃণতে চিত্ররাতী ॥৫॥

62.6

তা ভুজ্যুং বিভিরদ্ভ্যঃ সমুদ্রাত্তুগ্রস্য সূনুমূহথূ রজোভিঃ ।
অরেণুভির্যোজনেভির্ভুজন্তা পতত্রিভিরর্ণসো নিরুপস্থাৎ ॥৬॥

62.7

বি জয়ুষা রথ্যা যাতমদ্রিং শ্রুতং হবং বৃষণা বধ্রিমত্যাঃ ।
দশস্যন্তা শয়বে পিপ্যথুর্গামিতি চ্যবানা সুমতিং ভুরণ্যূ ॥৭॥

62.8

যদ্রোদসী প্রদিবো অস্তি ভূমা হেলো দেবানামুত মর্ত্যত্রা ।
তদাদিত্যা বসবো রুদ্রিয়াসো রক্ষোয়ুজে তপুরঘং দধাত ॥৮॥

62.9

য ঈং রাজানাবৃতুথা বিদধদ্রজসো মিত্রো বরুণশ্চিকেতৎ ।
গম্ভীরায় রক্ষসে হেতিমস্য দ্রোঘায় চিদ্বচস আনবায় ॥৯॥

62.10

অন্তরৈশ্চক্রৈস্তনয়ায় বর্তির্দ্যুমতা যাতং নৃবতা রথেন ।
সনুত্যেন ত্যজসা মর্ত্যস্য বনুষ্যতামপি শীর্ষা ববৃক্তম্ ॥১০॥

62.11

আ পরমাভিরুত মধ্যমাভির্নিয়ুদ্ভির্যাতমবমাভিরর্বাক্ ।
দৃল্হস্য চিদ্গোমতো বি ব্রজস্য দুরো বর্তং গৃণতে চিত্ররাতী ॥১১॥