সূক্ত 38

38.1

১০ বামদেবো গৌতমঃ। দধিক্রা, দ্যাবাপৃথিবী। ত্রিষ্টুপ্।

উতো হি বাং দাত্রা সন্তি পূর্বা যা পূরুভ্যস্ত্রসদস্যুর্নিতোশে ।
ক্ষেত্রাসাং দদথুরুর্বরাসাং ঘনং দস্যুভ্যো অভিভূতিমুগ্রম্ ॥১॥

38.2

উত বাজিনং পুরুনিষ্ষিধ্বানং দধিক্রামু দদথুর্বিশ্বকৃষ্টিম্ ।
ঋজিপ্যং শ্যেনং প্রুষিতপ্সুমাশুং চর্কৃত্যমর্যো নৃপতিং ন শূরম্ ॥২॥

38.3

যং সীমনু প্রবতেব দ্রবন্তং বিশ্বঃ পূরুর্মদতি হর্ষমাণঃ ।
পড্ভির্গৃধ্যন্তং মেধয়ুং ন শূরং রথতুরং বাতমিব ধ্রজন্তম্ ॥৩॥

38.4

যঃ স্মারুন্ধানো গধ্যা সমত্সু সনুতরশ্চরতি গোষু গচ্ছন্ ।
আবির্ঋজীকো বিদথা নিচিক্যৎ তিরো অরতিং পর্যাপ আয়োঃ ॥৪॥

38.5

উত স্মৈনং বস্ত্রমথিং ন তায়ুমনু ক্রোশন্তি ক্ষিতয়ো ভরেষু ।
নীচায়মানং জসুরিং ন শ্যেনং শ্রবশ্চাচ্ছা পশুমচ্চ যূথম্ ॥৫॥

38.6

উত স্মাসু প্রথমঃ সরিষ্যন্ নি বেবেতি শ্রেণিভী রথানাম্ ।
স্রজং কৃণ্বানো জন্যো ন শুভ্বা রেণুং রেরিহৎ কিরণং দদশ্বান্ ॥৬॥

38.7

উত স্য বাজী সহুরির্ঋতাবা শুশ্রূষমাণস্তন্বা সমর্যে ।
তুরং যতীষু তুরয়ন্নৃজিপ্যোঽধি ভ্রুবোঃ কিরতে রেণুমৃঞ্জন্ ॥৭॥

38.8

উত স্মাস্য তন্যতোরিব দ্যোর্ঋঘায়তো অভিয়ুজো ভয়ন্তে ।
যদা সহস্রমভি ষীময়োধীদ্ দুর্বর্তুঃ স্মা ভবতি ভীম ঋঞ্জন্ ॥৮॥

38.9

উত স্মাস্য পনয়ন্তি জনা জূতিং কৃষ্টিপ্রো অভিভূতিমাশোঃ ।
উতৈনমাহুঃ সমিথে বিয়ন্তঃ পরা দধিক্রা অসরৎ সহস্রৈঃ ॥৯॥

38.10

আ দধিক্রাঃ শবসা পঞ্চ কৃষ্টীঃ সূর্য ইব জ্যোতিষাপস্ততান ।
সহস্রসাঃ শতসা বাজ্যর্বা পৃণক্তু মধ্বা সমিমা বচাংসি ॥১০॥