সূক্ত 14

14.1

৭ ঋষভো বৈশ্বামিত্রঃ। অগ্নিঃ। ত্রিষ্টুপ্।

আ হোতা মন্দ্রো বিদথান্যস্থাৎ সত্যো যজ্বা কবিতমঃ স বেধাঃ ।
বিদ্যুদ্রথঃ সহসস্পুত্রো অগ্নিঃ শোচিষ্কেশঃ পৃথিব্যাং পাজো অশ্রেৎ ॥১॥

অয়ামি তে নমউক্তিং জুষস্ব ঋতাবস্তুভ্যং চেততে সহস্বঃ ।
বিদ্বাঁ আ বক্ষি বিদুষো নি ষত্সি মধ্য আ বর্হিরূতয়ে যজত্র ॥২॥

দ্রবতাং ত উষসা বাজয়ন্তী অগ্নে বাতস্য পথ্যাভিরচ্ছ ।
যৎ সীমঞ্জন্তি পূর্ব্যং হবির্ভিরা বন্ধুরেব তস্থতুর্দুরোণে ॥৩॥

মিত্রশ্চ তুভ্যং বরুণঃ সহস্বোঽগ্নে বিশ্বে মরুতঃ সুম্নমর্চন্ ।
যচ্ছোচিষা সহসস্পুত্র তিষ্ঠা অভি ক্ষিতীঃ প্রথয়ন্ ত্সূর্যো নৄন্ ॥৪॥

বয়ং তে অদ্য ররিমা হি কামমুত্তানহস্তা নমসোপসদ্য ।
যজিষ্ঠেন মনসা যক্ষি দেবানস্রেধতা মন্মনা বিপ্রো অগ্নে ॥৫॥

ত্বদ্ধি পুত্র সহসো বি পূর্বীর্দেবস্য যন্ত্যূতয়ো বি বাজাঃ ।
ত্বং দেহি সহস্রিণং রয়িং নোঽদ্রোঘেণ বচসা সত্যমগ্নে ॥৬॥

তুভ্যং দক্ষ কবিক্রতো যানীমা দেব মর্তাসো অধ্বরে অকর্ম ।
ত্বং বিশ্বস্য সুরথস্য বোধি সর্বং তদগ্নে অমৃত স্বদেহ ॥৭॥