সূক্ত 41

41.1

২১ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ১-২ বায়ুঃ, ৩ ইংদ্রবায়ূ, ৪-৬ মিত্রাবরুণৌ, ৭-৯ অশ্বিনৌ, ১০-১২ ইন্দ্রঃ, ১৩-১৫ বিশ্বেদেবাঃ, ১৬-১৮ সরস্বতী, ১৯-২১ দ্যাবাপৃথিব্যৌ হবির্ধানে বাঃ (১৯ তৃতীয়পাদস্য অগ্নির্বা)।গায়ত্রী, ১৬-১৭ অনুষ্টুপ্, ১৮ বৃহতী।

বায়ো যে তে সহস্রিণো রথাসস্তেভিরা গহি । নিয়ুত্বান্ত্সোমপীতয়ে ॥১॥

41.2

নিয়ুত্বান্ বায়বা গহ্যয়ং শুক্রো অয়ামি তে । গন্তাসি সুন্বতো গৃহম্ ॥২॥

41.3

শুক্রস্যাদ্য গবাশির ইন্দ্রবায়ূ নিয়ুত্বতঃ । আ যাতং পিবতং নরা ॥৩॥

41.4

অয়ং বাং মিত্রাবরুণা সুতঃ সোম ঋতাবৃধা ।মমেদিহ শ্রুতং হবম্ ॥৪॥

41.5

রাজানাবনভিদ্রুহা ধ্রুবে সদস্যুত্তমে । সহস্রস্থূণ আসাতে ॥৫॥

41.6

তা সম্রাজা ঘৃতাসুতী আদিত্যা দানুনস্পতী ।সচেতে অনবহ্বরম্ ॥৬॥

41.7

গোমদূ ষু নাসত্যাশ্বাবদ্যাতমশ্বিনা । বর্তী রুদ্রা নৃপায্যম্ ॥৭॥

41.8

ন যৎ পরো নান্তর আদধর্ষদ্ বৃষণ্বসূ । দুঃশংসো মর্ত্যো রিপুঃ ॥৮॥

41.9

তা ন আ বোলহমশ্বিনা রয়িং পিশঙ্গসংদৃশম্ । ধিষ্ণ্যা বরিবোবিদম্ ॥৯॥

41.10

ইন্দ্রো অঙ্গ মহদ্ ভয়মভী ষদপ চুচ্যবৎ । স হি স্থিরো বিচর্ষণিঃ ॥১০॥

41.11

ইন্দ্রশ্চ মৃলয়াতি নো ন নঃ পশ্চাদঘং নশৎ । ভদ্রং ভবাতি নঃ পুরঃ ॥১১॥

41.12

ইন্দ্র আশাভ্যস্পরি সর্বাভ্যো অভয়ং করৎ । জেতা শত্রূন্ বিচর্ষণিঃ ॥১২॥

41.13

বিশ্বে দেবাস আ গত শৃণুতা ম ইমং হবম্ । এদং বর্হির্নি ষীদত ॥১৩॥

41.14

তীব্রো বো মধুমাঁ অয়ং শুনহোত্রেষু মত্সরঃ । এতং পিবত কাম্যম্ ॥১৪॥

41.15

ইন্দ্রজ্যেষ্ঠা মরুদ্গণা দেবাসঃ পূষরাতয়ঃ । বিশ্বে মম শ্রুতা হবম্ ॥১৫॥

41.16

অম্বিতমে নদীতমে দেবিতমে সরস্বতি ।
অপ্রশস্তা ইব স্মসি প্রশস্তিমম্ব নস্কৃধি ॥১৬॥

41.17

ত্বে বিশ্বা সরস্বতি শ্রিতায়ূংষি দেব্যাম্ ।
শুনহোত্রেষু মত্স্ব প্রজাং দেবি দিদিড্ঢি নঃ ॥১৭॥

41.18

ইমা ব্রহ্ম সরস্বতি জুষস্ব বাজিনীবতি ।
যা তে মন্ম গৃত্সমদা ঋতাবরি প্রিয়া দেবেষু জুহ্বতি ॥১৮॥

41.19

প্রেতাং যজ্ঞস্য শম্ভুবা যুবামিদা বৃণীমহে । অগ্নিং চ হব্যবাহনম্ ॥১৯॥

41.20

দ্যাবা নঃ পৃথিবী ইমং সিধ্রমদ্য দিবিস্পৃশম্ । যজ্ঞং দেবেষু যচ্ছতাম্ ॥২০॥

41.21

আ বামুপস্থমদ্রুহা দেবাঃ সীদন্তু যজ্ঞিয়াঃ । ইহাদ্য সোমপীতয়ে ॥২১॥