সূক্ত 99

99.1

১২ বম্রো বৈখানসঃ। ইন্দ্রঃ। ত্রিষ্টুপ্।

কং নশ্চিত্রমিষণ্যসি চিকিত্বান্পৃথুগ্মানং বাশ্রং বাবৃধধ্যৈ ।
কত্তস্য দাতু শবসো ব্যুষ্টৌ তক্ষদ্বজ্রং বৃত্রতুরমপিন্বৎ ॥১॥

99.2

স হি দ্যুতা বিদ্যুতা বেতি সাম পৃথুং যোনিমসুরত্বা সসাদ ।
স সনীলেভিঃ প্রসহানো অস্য ভ্রাতুর্ন ঋতে সপ্তথস্য মায়াঃ ॥২॥

99.3

স বাজং যাতাপদুষ্পদা যন্ত্স্বর্ষাতা পরি ষদত্সনিষ্যন্ ।
অনর্বা যচ্ছতদুরস্য বেদো ঘ্নঞ্ছিশ্নদেবাঁ অভি বর্পসা ভূৎ ॥৩॥

99.4

স যহ্ব্যো৩ঽবনীর্গোষ্বর্বা ঽঽজুহোতি প্রধন্যাসু সস্রিঃ ।
অপাদো যত্র যুজ্যাসোঽরথা দ্রোণ্যশ্বাস ঈরতে ঘৃতং বাঃ ॥৪॥

99.5

স রুদ্রেভিরশস্তবার ঋভ্বা হিত্বী গয়মারেঅবদ্য আগাৎ ।
বম্রস্য মন্যে মিথুনা বিবব্রী অন্নমভীত্যারোদয়ন্মুষায়ন্ ॥৫॥

99.6

স ইদ্দাসং তুবীরবং পতির্দন্ষলক্ষং ত্রিশীর্ষাণং দমন্যৎ ।
অস্য ত্রিতো ন্বোজসা বৃধানো বিপা বরাহময়োঅগ্রয়া হন্ ॥৬॥

99.7

স দ্রুহ্বণে মনুষ ঊর্ধ্বসান আ সাবিষদর্শসানায় শরুম্ ।
স নৃতমো নহুষোঽস্মত্সুজাতঃ পুরোঽভিনদর্হন্দস্যুহত্যে ॥৭॥

99.8

সো অভ্রিয়ো ন যবস উদন্যন্ক্ষয়ায় গাতুং বিদন্নো অস্মে ।
উপ যত্সীদদিন্দুং শরীরৈঃ শ্যেনোঽয়োপাষ্টির্হন্তি দস্যূন্ ॥৮॥

99.9

স ব্রাধতঃ শবসানেভিরস্য কুত্সায় শুষ্ণং কৃপণে পরাদাৎ ।
অয়ং কবিমনয়চ্ছস্যমানমত্কং যো অস্য সনিতোত নৃণাম্ ॥৯॥

99.10

অয়ং দশস্যন্নর্যেভিরস্য দস্মো দেবেভির্বরুণো ন মায়ী ।
অয়ং কনীন ঋতুপা অবেদ্যমিমীতাররুং যশ্চতুষ্পাৎ ॥১০॥

99.11

অস্য স্তোমেভিরৌশিজ ঋজিশ্বা ব্রজং দরয়দ্বৃষভেণ পিপ্রোঃ ।
সুত্বা যদ্যজতো দীদয়দ্গীঃ পুর ইয়ানো অভি বর্পসা ভূৎ ॥১১॥

99.12

এবা মহো অসুর বক্ষথায় বম্রকঃ পড্ভিরুপ সর্পদিন্দ্রম্ ।
স ইয়ানঃ করতি স্বস্তিমস্মা ইষমূর্জং সুক্ষিতিং বিশ্বমাভাঃ ॥১২॥