সূক্ত 8

8.1

৯ ত্রিশিরাস্ত্বাষ্ট্রঃ। অগ্নিঃ,৭-৯ ইন্দ্রঃ। ত্রিষ্টুপ্।

প্র কেতুনা বৃহতা যাত্যগ্নিরা রোদসী বৃষভো রোরবীতি ।
দিবশ্চিদন্তাঁ উপমাঁ উদানলপামুপস্থে মহিষো ববর্ধ ॥১॥

8.2

মুমোদ গর্ভো বৃষভঃ ককুদ্মানস্রেমা বত্সঃ শিমীবাঁ অরাবীৎ ।
স দেবতাত্যুদ্যতানি কৃণ্বন্ত্স্বেষু ক্ষয়েষু প্রথমো জিগাতি ॥২॥

8.3

আ যো মূর্ধানং পিত্রোররব্ধ ন্যধ্বরে দধিরে সূরো অর্ণঃ ।
অস্য পত্মন্নরুষীরশ্ববুধ্না ঋতস্য যোনৌ তন্বো জুষন্ত ॥৩॥

8.4

উষউষো হি বসো অগ্রমেষি ত্বং যময়োরভবো বিভাবা ।
ঋতায় সপ্ত দধিষে পদানি জনয়ন্মিত্রং তন্বে৩ স্বায়ৈ ॥৪॥

8.5

ভুবশ্চক্ষুর্মহ ঋতস্য গোপা ভুবো বরুণো যদৃতায় বেষি ।
ভুবো অপাং নপাজ্জাতবেদো ভুবো দূতো যস্য হব্যং জুজোষঃ ॥৫॥

8.6

ভুবো যজ্ঞস্য রজসশ্চ নেতা যত্রা নিয়ুদ্ভিঃ সচসে শিবাভিঃ ।
দিবি মূর্ধানং দধিষে স্বর্ষাং জিহ্বামগ্নে চকৃষে হব্যবাহম্ ॥৬॥

8.7

অস্য ত্রিতঃ ক্রতুনা বব্রে অন্তরিচ্ছন্ধীতিং পিতুরেবৈঃ পরস্য ।
সচস্যমানঃ পিত্রোরুপস্থে জামি ব্রুবাণ আয়ুধানি বেতি ॥৭॥

8.8

স পিত্র্যাণ্যায়ুধানি বিদ্বানিন্দ্রেষিত আপ্ত্যো অভ্যয়ুধ্যৎ ।
ত্রিশীর্ষাণং সপ্তরশ্মিং জঘন্বান্ত্বাষ্ট্রস্য চিন্নিঃ সসৃজে ত্রিতো গাঃ ॥৮॥

8.9

ভূরীদিন্দ্র উদিনক্ষন্তমোজোঽবাভিনত্সত্পতির্মন্যমানম্ ।
ত্বাষ্ট্রস্য চিদ্বিশ্বরূপস্য গোনামাচক্রাণস্ত্রীণি শীর্ষা পরা বর্ক্ ॥৯॥