সূক্ত 62

62.1

১১ নাভানেদিষ্ঠো মানবঃ। বিশ্বে দেবাঃ, ১-৬ অংগিরসো বা, ৮-১১ সাবর্ণেদানম্। জগতী, ৫,৮,৯ অনুষ্টুপ্ প্রগাথঃ =(৬ বৃহতী, ৭ সতোবৃহতী ) ১০ গায়ত্রী, ১১ ত্রিষ্টুপ্।

যে যজ্ঞেন দক্ষিণয়া সমক্তা ইন্দ্রস্য সখ্যমমৃতত্বমানশ ।
তেভ্যো ভদ্রমঙ্গিরসো বো অস্তু প্রতি গৃভ্ণীত মানবং সুমেধসঃ ॥১॥

62.2

য উদাজন্পিতরো গোময়ং বস্বৃতেনাভিন্দন্পরিবত্সরে বলম্ ।
দীর্ঘায়ুত্বমঙ্গিরসো বো অস্তু প্রতি গৃভ্ণীত মানবং সুমেধসঃ ॥২॥

62.3

য ঋতেন সূর্যমারোহয়ন্দিব্যপ্রথয়ন্পৃথিবীং মাতরং বি ।
সুপ্রজাস্ত্বমঙ্গিরসো বো অস্তু প্রতি গৃভ্ণীত মানবং সুমেধসঃ ॥৩॥

62.4

অয়ং নাভা বদতি বল্গু বো গৃহে দেবপুত্রা ঋষয়স্তচ্ছৃণোতন ।
সুব্রহ্মণ্যমঙ্গিরসো বো অস্তু প্রতি গৃভ্ণীত মানবং সুমেধসঃ ॥৪॥

62.5

বিরূপাস ইদৃষয়স্ত ইদ্গম্ভীরবেপসঃ । তে অঙ্গিরসঃ সূনবস্তে অগ্নেঃ পরি জজ্ঞিরে ॥৫॥

62.6

যে অগ্নেঃ পরি জজ্ঞিরে বিরূপাসো দিবস্পরি । নবগ্বো নু দশগ্বো অঙ্গিরস্তমো সচা দেবেষু মংহতে ॥৬॥

62.7

ইন্দ্রেণ যুজা নিঃ সৃজন্ত বাঘতো ব্রজং গোমন্তমশ্বিনম্ । সহস্রং মে দদতো অষ্টকর্ণ্য১ঃ শ্রবো দেবেষ্বক্রত ॥৭॥

62.8

প্র নূনং জায়তাময়ং মনুস্তোক্মেব রোহতু । যঃ সহস্রং শতাশ্বং সদ্যো দানায় মংহতে ॥৮॥

62.9

ন তমশ্নোতি কশ্চন দিব ইব সান্বারভম্ । সাবর্ণ্যস্য দক্ষিণা বি সিন্ধুরিব পপ্রথে ॥৯॥

62.10

উত দাসা পরিবিষে স্মদ্দিষ্টী গোপরীণসা । যদুস্তুর্বশ্চ মামহে ॥১০॥

62.11

সহস্রদা গ্রামণীর্মা রিষন্মনুঃ সূর্যেণাস্য যতমানৈতু দক্ষিণা ।
সাবর্ণের্দেবাঃ প্র তিরন্ত্বায়ুর্যস্মিন্নশ্রান্তা অসনাম বাজম্ ॥১১॥