সূক্ত 53

53.1

১১ দেবাঃ,৪-৫ সৌচীকোঽগ্নিঃ। অগ্নিঃ,৪-৫ দেবাঃ। ১-৫ ,৮ত্রিষ্টুপ্ , ৬-৭,৯-১১ জগতী।

যমৈচ্ছাম মনসা সো৩ঽয়মাগাদ্যজ্ঞস্য বিদ্বান্পরুষশ্চিকিত্বান্ ।
স নো যক্ষদ্দেবতাতা যজীয়ান্নি হি ষত্সদন্তরঃ পূর্বো অস্মৎ ॥১॥

53.2

অরাধি হোতা নিষদা যজীয়ানভি প্রয়াংসি সুধিতানি হি খ্যৎ ।
যজামহৈ যজ্ঞিয়ান্হন্ত দেবাঁ ঈলামহা ঈড্যাঁ আজ্যেন ॥২॥

53.3

সাধ্বীমকর্দেববীতিং নো অদ্য যজ্ঞস্য জিহ্বামবিদাম গুহ্যাম্ ।
স আয়ুরাগাত্সুরভির্বসানো ভদ্রামকর্দেবহূতিং নো অদ্য ॥৩॥

53.4

তদদ্য বাচঃ প্রথমং মসীয় যেনাসুরাঁ অভি দেবা অসাম ।
ঊর্জাদ উত যজ্ঞিয়াসঃ পঞ্চ জনা মম হোত্রং জুষধ্বম্ ॥৪॥

53.5

পঞ্চ জনা মম হোত্রং জুষন্তাং গোজাতা উত যে যজ্ঞিয়াসঃ ।
পৃথিবী নঃ পার্থিবাত্পাত্বংহসোঽন্তরিক্ষং দিব্যাত্পাত্বস্মান্ ॥৫॥

53.6

তন্তুং তন্বন্রজসো ভানুমন্বিহি জ্যোতিষ্মতঃ পথো রক্ষ ধিয়া কৃতান্ ।
অনুল্বণং বয়ত জোগুবামপো মনুর্ভব জনয়া দৈব্যং জনম্ ॥৬॥

53.7

অক্ষানহো নহ্যতনোত সোম্যা ইষ্কৃণুধ্বং রশনা ওত পিংশত ।
অষ্টাবন্ধুরং বহতাভিতো রথং যেন দেবাসো অনয়ন্নভি প্রিয়ম্ ॥৭॥

53.8

অশ্মন্বতী রীয়তে সং রভধ্বমুত্তিষ্ঠত প্র তরতা সখায়ঃ ।
অত্রা জহাম যে অসন্নশেবাঃ শিবান্বয়মুত্তরেমাভি বাজান্ ॥৮॥

53.9

ত্বষ্টা মায়া বেদপসামপস্তমো বিভ্রত্পাত্রা দেবপানানি শংতমা ।
শিশীতে নূনং পরশুং স্বায়সং যেন বৃশ্চাদেতশো ব্রহ্মণস্পতিঃ ॥৯॥

53.10

সতো নূনং কবয়ঃ সং শিশীত বাশীভির্যাভিরমৃতায় তক্ষথ ।
বিদ্বাংসঃ পদা গুহ্যানি কর্তন যেন দেবাসো অমৃতত্বমানশুঃ ॥১০॥

53.11

গর্ভে যোষামদধুর্বত্সমাসন্যপীচ্যেন মনসোত জিহ্বয়া ।
স বিশ্বাহা সুমনা যোগ্যা অভি সিষাসনির্বনতে কার ইজ্জিতিম্ ॥১১॥