সূক্ত 48

48.1

বৈকুণ্ঠ ইন্দ্রঃ। ইন্দ্রঃ। জগতীঃ, ৭, ১০-১১ ত্রিষ্টুপ্।

অহং ভুবং বসুনঃ পূর্ব্যস্পতিরহং ধনানি সং জয়ামি শশ্বতঃ ।
মাং হবন্তে পিতরং ন জন্তবোঽহং দাশুষে বি ভজামি ভোজনম্ ॥১॥

48.2

অহমিন্দ্রো রোধো বক্ষো অথর্বণস্ত্রিতায় গা অজনয়মহেরধি ।
অহং দস্যুভ্যঃ পরি নৃম্ণমা দদে গোত্রা শিক্ষন্দধীচে মাতরিশ্বনে ॥২॥

48.3

মহ্যং ত্বষ্টা বজ্রমতক্ষদায়সং ময়ি দেবাসোঽবৃজন্নপি ক্রতুম্ ।
মমানীকং সূর্যস্যেব দুষ্টরং মামার্যন্তি কৃতেন কর্ত্বেন চ ॥৩॥

48.4

অহমেতং গব্যয়মশ্ব্যং পশুং পুরীষিণং সায়কেনা হিরণ্যয়ম্ ।
পুরূ সহস্রা নি শিশামি দাশুষে যন্মা সোমাস উক্থিনো অমন্দিষুঃ ॥৪॥

48.5

অহমিন্দ্রো ন পরা জিগ্য ইদ্ধনং ন মৃত্যবেঽব তস্থে কদা চন ।
সোমমিন্মা সুন্বন্তো যাচতা বসু ন মে পূরবঃ সখ্যে রিষাথন ॥৫॥

48.6

অহমেতাঞ্ছাশ্বসতো দ্বাদ্বেন্দ্রং যে বজ্রং যুধয়েঽকৃণ্বত ।
আহ্বয়মানাঁ অব হন্মনাহনং দৃল্হা বদন্ননমস্যুর্নমস্বিনঃ ॥৬॥

48.7

অভী৩দমেকমেকো অস্মি নিষ্ষালভী দ্বা কিমু ত্রয়ঃ করন্তি ।
খলে ন পর্ষান্প্রতি হন্মি ভূরি কিং মা নিন্দন্তি শত্রবোঽনিন্দ্রাঃ ॥৭॥

48.8

অহং গুঙ্গুভ্যো অতিথিগ্বমিষ্করমিষং ন বৃত্রতুরং বিক্ষু ধারয়ম্ ।
যত্পর্ণয়ঘ্ন উত বা করঞ্জহে প্রাহং মহে বৃত্রহত্যে অশুশ্রবি ॥৮॥

48.9

প্র মে নমী সাপ্য ইষে ভুজে ভূদ্গবামেষে সখ্যা কৃণুত দ্বিতা ।
দিদ্যুং যদস্য সমিথেষু মংহয়মাদিদেনং শংস্যমুক্থ্যং করম্ ॥৯॥

48.10

প্র নেমস্মিন্দদৃশে সোমো অন্তর্গোপা নেমমাবিরস্থা কৃণোতি ।
স তিগ্মশৃঙ্গং বৃষভং যুয়ুত্সন্দ্রুহস্তস্থৌ বহুলে বদ্ধো অন্তঃ ॥১০॥

48.11

আদিত্যানাং বসূনাং রুদ্রিয়াণাং দেবো দেবানাং ন মিনামি ধাম ।
তে মা ভদ্রায় শবসে ততক্ষুরপরাজিতমস্তৃতমষাল্হম্ ॥১১॥