সূক্ত 139

139.1

৬ দেবগন্ধর্বো বিশ্বাবসুঃ। সবিতা, ৪-৬ আত্মা। ত্রিষ্টুপ্।

সূর্যরশ্মির্হরিকেশঃ পুরস্তাত্সবিতা জ্যোতিরুদয়াঁ অজস্রম্ ।
তস্য পূষা প্রসবে যাতি বিদ্বান্ত্সম্পশ্যন্বিশ্বা ভুবনানি গোপাঃ ॥১॥

139.2

নৃচক্ষা এষ দিবো মধ্য আস্ত আপপ্রিবান্রোদসী অন্তরিক্ষম্ ।
স বিশ্বাচীরভি চষ্টে ঘৃতাচীরন্তরা পূর্বমপরং চ কেতুম্ ॥২॥

139.3

রায়ো বুধ্নঃ সংগমনো বসূনাং বিশ্বা রূপাভি চষ্টে শচীভিঃ ।
দেব ইব সবিতা সত্যধর্মেন্দ্রো ন তস্থৌ সমরে ধনানাম্ ॥৩॥

139.4

বিশ্বাবসুং সোম গন্ধর্বমাপো দদৃশুষীস্তদৃতেনা ব্যায়ন্ ।
তদন্ববৈদিন্দ্রো রারহাণ আসাং পরি সূর্যস্য পরিধীঁরপশ্যৎ ॥৪॥

139.5

বিশ্বাবসুরভি তন্নো গৃণাতু দিব্যো গন্ধর্বো রজসো বিমানঃ ।
যদ্বা ঘা সত্যমুত যন্ন বিদ্ম ধিয়ো হিন্বানো ধিয় ইন্নো অব্যাঃ ॥৫॥

139.6

সস্নিমবিন্দচ্চরণে নদীনামপাবৃণোদ্দুরো অশ্মব্রজানাম্ ।
প্রাসাং গন্ধর্বো অমৃতানি বোচদিন্দ্রো দক্ষং পরি জানাদহীনাম্ ॥৬॥